Elongeso 9
Ovaumbili va Huku Vena Yokukala Vakohokwa
Omokonda yatyi tuna yokukalela tyakohokwa mononkhalo ambuho? (1)
Okukala tyakohokwa kespilitu tyihangununatyi? (2) kovituwo? (3) komalusoke? (4) kolutu? (5)
Omupopio patyi wakaka tuna yokulityilika? (6)
1. Yehova Huku omukohokwe nosandu. Oe ukevelela ovafendeli vae vatwaleko nokwakohokwa — kespilitu, kovituwo, komalusoke, nokolutu. (1 Pedro 1:16) Okukohokwa komaiho a Huku tyihanda okulinga ononkhono mbotyili. Tukahi mouye umwe wokwakaka. Tupu tuna ovilwa vimwe vyomayembelo etu mwene okulinga etyi tyapenga. Anthi katupondola okusoya.
2. Oukohokwe kespilitu: Inkha twahanda okuumbila Yehova, katupondola okutwalako nokulandula omalongeso ine ovityiliyo vyonongeleya mbomatutu. Tuna yokutunda monongeleya mbomatutu ya atuhembuavela ekwateso nalike. (2 Coríntios 6:14-18; Revelação 18:4) Pana okuti twelilongesale otyili kombinga ya Huku, tuna yokutonkhoka opo tuhayondywe novanthu vana vokulongesa omatutu. — 2 João 10, 11.
3. Oukohokwe kovituwo: Yehova wahanda ovafendeli vae vakale novituwa oviwa ngo Vakristau votyili omivo aviho. (1 Pedro 2:12) Oe weete ovipuka aviho tulinga, aló umwe evi tulingila pokamphengi. (Hebreus 4:13) Tuna okulityilika okulinga ovipengi novituwo ovikwavo vyokwakaka vyomouye uno. — 1 Coríntios 6:9-11.
4. Oukohokwe Komalusoke: Inkha tuyulisa omitwe vyetu nomalusoke akohokwa, nokwayela, novituwo vyetu tupu mavikala vyakohokwa. (Filipenses 4:8) Anthi inkha tutwalako nokusoka ovipuka vyokwakaka, matyikatwala kokulinga ovipuka ovivi. (Mateus 15:18-20) Tuna okulityilika kovitalukilo vina okuti vipondola okukakesa omitima vyetu. Tupondola okuyulisa omitwe vyetu nomalusoke okwakohokwa mokulilongesa Ondaka ya Huku.
5. Oukohokwe wokolutu: Mokonda Ovakristau ovatumwa va Huku, ovo vena yokutwalako nokwakohokwa kolutu nokomuvalo wavo. Tuna okukoha omake etu putyina twaile kohika, nokwekoha putyino nkhele tuhenelie ine tuhenekwate kovikulia. Inkha ondywo yove itupu okandywo kokwila kohika, una yokuheiya etoto okuti tyina wamana okutyindamenako ohihilako. (Deuteronômio 23:12, 13) Okutwalako nokwakohokwa kolutu tyikwatesako okukala nekongoko ewa. Eumbo Lyomukristau lina okukala lyakohokwa mokati nokondye, novityuma vyaonganekwa nawa. Lina okukala ngongeleka imwe imoneka nawa kovomunthele.
6. Oukohokwe Kokupopia: Ovaumbili va Huku apeho vena yokupopia otyili. Ononkhembi kamambu kanyingila Mouhamba wa Huku. (Efésios 4:25; Revelação 21:8) Ovakristau kavaundapesa omupopio omuvi. Ovo kavatehelela ni okupopia omihe ine omahipululo okwakaka. Mokonda yokupopia kwavo kwakohokwa kovilinga, kosikola ine opovomunthele ovo vamoneka nawa okuti velikalela. — Efésios 4:29, 31; 5:3.
[Elitalatu kemẽla 19]
Ovaumbili va Huku vena yokukala vakohokwa konombinga ambuho