Elongeso 14
Oñgeni Onombangi mba Yehova Mbaonganeka
Onalupi Onombangi mba Yehova mbahimbika ovilinga vyavo komivo vyomuhono? (1)
Omaliongiyo Onombangi mba Yehova alingwa ñgeni? (2)
Vapolapi onombongo mbokwendesa ovilinga vyavo? (3)
Olye ukahi komutwe wa kese waneno? (4)
Oepi omaliongiyo omanene alingwa kese nima? (5)
Ovilinga patyi vilingwa kombala noko nondywo mbayo ononkwavo? (6)
1. Onombangi mba Yehova mbahimbika ovilinga vyambo komivo vyomuhono menima lya 1870. Pokuhimbika, ankho vaihanwa okuti Ovalilongesi Vombimbiliya. Anthi menima lya 1931 ovo vetavela enyina Lyombimbiliya Onombangi mba Yehova. (Isaías 43:10) Okuhimbikila kokanthumbo okatutu eongano lyahimbika okukula aló konomilyau mbo Nombangi, mbukahi nokuivisila etyi tyalamba mo 230 yovilongo.
2. Omawaneno omanyingi Onombangi mba Yehova ena omaliongiyo ovikando vitatu kese simano. Ukahi nokukongwa opo ukalepo pomaliongiyo aa. (Hebreus 10:24, 25) Ombimbiliya oyo ehina lyetyi tyilongehiwamo. Omaliongiyo ahimbikwa nokumanuhulwa nelikwambelo. Tupu momaliongiyo omanyingi muimbwa “oviimbo vyopaspilitu” vitundilila komutima. (Efésios 5:18, 19) Munyingilwa otyali, kamuyumbwa onombongo pongalo. — Mateus 10:8.
3. Omawaneno omanyingi alingila omaliongiyo Mondywo Youhamba. Onondywo mbatyo ombu mbuhole okupola vala pokati, mbutungwa Nonombangi vana vokwelipakula ovo mwene. Mondywo Youhamba ove kukamonamo ovilolo, omakulusu, ine ovipuka vyelifwa nevi. Ovipuka aviho vyasukisa vilandwa nonombongo mbuawa otyali. Aveho vana vahanda okulinga ovyawa, pena okakasa kokupaka ovyawa. — 2 Coríntios 9:7.
4. Kese waneno, muna ovakulu vewaneno, ine ononkhalamutwe. Ovo vekahi komutwe welongeso mewaneno. (1 Timóteo 3:1-7; 5:17) Ovo vakwateswako novaumbili vovilinga (servos ministeriais). (1 Timóteo 3:8-10, 12, 13) Ovalume ava kavatalwa ngava vavilapo vali kuvakwavo mewaneno. (2 Coríntios 1:24) Ovo kavapewa omanyina enkhimaneko. (Mateus 23:8-10) Ovo kavavale ovikutu vyelikalela kuvyavakwavo. Tupu kavafetwa mokonda yovilinga vyavo. Ovakulu vewaneno vatala nawa komasuko okespilitu ewaneno. Ovo vapondola okuavela ekwateso nehongolelo pomivo vyovitateka. — Tiago 5:14-16; 1 Pedro 5:2, 3.
5. Onombangi mba Yehova tupu vena onosembeleya ine onokongelesu ononene kese nima. Pomivo evi omawaneno omanyingi eliongiya kumwe pala oprograma imwe yakolela yelongeso Lyombimbiliya. Ombatisimu yovalongwa ovape apeho onthele imwe moprograma ya kese osembeleya ine okongelesu. — Mateus 3:13-17; 28:19, 20.
6. Ombala Yonombangi mba Yehova mouye auho ikahi ko Nova York, EUA. Oko kuvahiwa Olutu lwo Nonkhalamutwe mbo Nombangi mba Yehova, onthumbo yovakulu vokuna enoñgonoko, vahongolela ewaneno ouye auho. Tupu kuna onondywo mbutei kombala oyo mbulamba 100 mononthele ambuho mbouye, mbutiwa onokodyenele nonofiliyale. Monomphangu ombu, muna ava vokwelipakula opo vakwateseko okulinga omikanda Vyombimbiliya, nokuvitumikisa. Tupu kuavelwa ehongolelo lyokwonganeka ovilinga vyokuivisa. Omokonda yatyi kulingila epongiyo lyokutalelapo ofiliale ikahi vali popepi noove?