Elongeso 15

Kwatesako Vakwenyi Okulinga Ehando lya Huku

Omokonda yatyi kutolela vakwenyi kombinga yetyi ukahi nokulilongesa? (1)

Ovalye upondola okutolelako onondaka ombu onongwa? (2)

Oityi otyituwo tyove tyipondola okulinga kuvakwenyi? (2)

Onalupi ove upondola okuivisila kumwe newaneno? (3)

1. Pahe ove welilongesa ovipuka ovinyingi oviwa Mombimbiliya. Enoñgonoko eli likutwale kokwovola okukala notyituwo Tyoukristau. (Efésios 4:​22-24) Enoñgonoko lyatyo olyo lyakolela opo upondole okumona omwenyo waapeho. (João 17:⁠3) Anthi, tupu vakwenyi vasukila okutehelela onondaka onongwa opo navo vapondole okuyovolwa. Ovakristau aveho vena yokuavela oumbangi kuvakwavo. Etyi otyitumino tya Huku. ​—⁠ Romanos 10:10; 1 Coríntios 9:16; 1 Timóteo 4:⁠16.

2. Ove upondola okuhimbika okutolelako vana veli popepi nove, ovipuka oviwa ukahi nokulilongesa. Vipopilavo ombunga yove, omapanga, vakwenyi kosikola, nokovilinga. Tyilinga nomutima omuwa, nokuapwa ounye. (2 Timóteo 2:​24, 25) Hinangela okuti ovanthu ovikando ovinyingi vatala vali kwetyi omunthu alinga tyipona okutehelela kwetyi oe apopia. Molwotyo otyituwo tyove otyiwa tyipondola okukoka vakwenyi opo vatehelele onondaka ove uvetolela. ​—⁠ Mateus 5:16; 1 Pedro 3:​1, 2, 16.

3. Mokwenda kwomuvo, ove upondola okukala tyafwapo opo uhimbike okuivisila kumwe newaneno lyo Nombangi mba Yehova apa ukala. Ei ondiatuko imwe yokwakolela kokukula kwove. (Mateus 24:14) Ehambu ngatyi inkha uvila okukwatesako omunthu umwe okukala omuumbili wa Yehova nokumona omwenyo waapeho! ​—⁠ 1 Tessalonicenses 2:​19, 20.