Oñgeni ove Upondola Okulilongesa Kombinga ya Huku

Ove upondola okulilongesa kombinga ya Yehova mokutanga Ombimbiliya. Omanima omanyingi konyima, Huku waholovona ovalume vamue opo vahoneke omalusoke ae. Omalusoke atyo oo vahoneka avahiwa momukanda wike vala utiwa Ombimbiliya. Hono, tupondola okulilongesa kombinga ya Huku mokutanga Ombimbiliya. Ombimbiliya iihanwa okuti ondaka ya Huku, mokonda onondaka mbuvahiwamo omba Yehova. Tupondola okutavela etyi Ombimbiliya ipopia mokonda Yehova kakembe. Huku kapondola okukemba. (Hebreus 6:18) Ondaka ya Huku otyili.—João 17:17.

Ombimbiliya omukanda umue wokuna esilivilo Huku etuavela. Ukahi ngomukanda he umue wokuna oluembia atumikisa kovana vae. Ombimbiliya itutolela kombinga yomulao wa Huku wokupilulula oohi ino omphangu imue ongwa yokukala. Oyo itutolela oityi oe alingile kohale, oityi oe ekahi nokulinga hono, netyi makalinga komutue wandyila pala ovanthu vae vokuna ekolelo. Tupu Ombimbiliya itukuatesako okupunguhuna ovitateka vietu nokuvasa ehambu.—2 Timóteo 3:16, 17.

Onombangi mba Yehova omapanga a Huku; ovo mavekukuatesako okunoñgonoka etyi Ombimbiliya ilongesa. Vetolela vala okuti ove uhanda okulilongesa Ombimbiliya. Ovo mavekukuatesako vala, kamavekuiti onombongo. (Mateus 10:8) Tupu upondola okuenda komaliongiyo avo. Alingilua ponomphangu mbokufendela mbutiwa Onondyuo mbomaliongiyo Onombangi mba Yehova. Inkha wenda komaliongiyo Onombangi mba Yehova, enoñgonoko liove kombinga ya Huku maliliyauisa liua liua.

Ove upondola okulilongesa kombinga ya Huku mokutala ovipuka alinga. Ngongeleka, Ombimbiliya yati: “Huku walinga eulu noohi.” (Gênesis 1:1) Puetyi Yehova alinga “eulu” tupu walinga ekumbi. Pahe etyi tyitupopilatyi kombinga ya Huku? Tyitupopila okuti Yehova una epondolo enene. Oe vala ankho upondola okulinga ekumbi, otyipuka tyimue tyokuna epondolo enene. Etyi tupu tyitutolela okuti Yehova omunongo, mokonda tyesukisa ounongo pala okulinga ekumbi, lituavela outokotue notyitei, iya alihetuyoko.

Ovipuka Yehova alinga vilekesa okuti oe una ohole nonthue. Sokolola kovinyango ovinyingi Huku etuavela. Yehova ankho upondola okutuavela vala ombuto ike yovinyango. Tupu ankho upondola okuhetuavela otyinyango natyike. Anthi, oe wetuavela ovinyango ovinyingi vielikalaila kovivala, nokokupepa. Etyi tyitulekesa okuti Yehova o Huku wokuna ohole, notyali, nokankhenda, nesuko novanthu.—Salmo 104:24.