Onkhalelo Patyi Ongwa Yokulipongiya Pala Omaliongiyo?

Inkha ukahi nokulilongesa Ombimbiliya Nombangi imwe ya Jeova, tyafuile uhole okupongiya etyi mamulilongesa. Tupu opo upole ouwa keliongiyo, otyiwa upongiye ononthele mamulilongesa. Tyina tutyilinga apeho tupolako vali ouwa.

Holovona onalupi naapa molilongesila. Onalupi upondola okulilongesa vali nawa ohatalukwa? Okuti okomuhuka tyina uhenehimbike ovilinga, ine oko kangulohi, tyina ovana velele? Namphila kumelilongesa ehimbwe, tokola omuvo ulifuepi molilongesa, ohayeke natyike tyikutyilike. Ovola omphangu yapoleya, polapo aviho vipondola okukutalula, okuika olaliu, notelevisau, notelefone. Okulikuambela tyina uhenehimbike okulilongesa matyikukuatesako okuhasukalala novipuka ovikuavo osoko vala Kondaka ya Huku.—Filipenses 4:6, 7.

Nthinda omakumbululo, nokulipongiya opo ukumbulule. Tete, ovola okunoñgonoka onthele aiho molilongesa. Soka kosapi yonthele ine okapitulu, tala oñgeni kese okasapi kelikuata nosapi yonthele aiho, tala nawa kese lutalatu, nokupitulula omapulo apopia ononthele mbavilapo. Konyima, tanga kese palagrafu, tala epulo oovola ekumbululo. Ovola onotestu mbukahi-mo nokumbutanga, nokusoka oñgeni mbelikuata netyi ukahi nokulilongesa. (Atos 17:11) Tyina uvasa ekumbululo liepulo, linthinda ine okuhoneka onondaka ponthele yo palagrafu mambukukuatesako okuhinangela ekumbululo mokueenda kueliongiyo. Iya tyina ukahi meliongiyo, upondola okuyelula okuoko inkha uhanda, okumbulula monondaka mbehehi.

Inkha ulilongesa ononthele ambuho mambulilongeswa momaliongiyo a kese simano, moyawisa ovipuka ovipe “kolumono” luove luenoñgonoko Liombimbiliya. —Mateus 13:51, 52.

• Oityi upondola okulinga opo upongiye apeho omaliongiyo?

• Oñgeni upondola okulipongiya opo ukumbulule meliongiyo?