OMALONGESO 10
Oñgeni Moimbuka Efendelo Liotyotyili?
1. Okuti Kuna Vala Ongeleya ike Yotyotyili?
“Lungukei novauli vomatutu.”—MATEUS 7:15.
Jesus walongesa ovalanduli vae ongeleya ike vala, ongeleya yotyotyili. Ikahi ngo ndyila ituala komuenyo uhapu. Jesus wati: ‘Kavehi vekahi nokuvasa’ ondyila oyo. (Mateus 7:14) Huku utavela vala efendelo litunda Mondaka yae Ombimbiliya. Ovafendeli aveho votyotyili veliwaneka mekolelo like.—Tanga João 4:23, 24; 14:6; Efésios 4:4, 5.
Tala ovidiu yati kuti Huku Utavela Onongeleya Ambuho?
2. Oityi Jesus apopia konthele yo Vakristau vomatutu?
“Mounyingi vapopia okuti vei Huku, mahi, novilinga viavo vaanya Huku.”—TITO 1:16.
Jesus walondola okuti ovauli womatutu mavanyono Oukristau. Ovauli ovo, kombanda vamoneka ngoti ovafendi votyotyili. Onongeleya mbavo mbupopia okuti Ovakristau. Mahi, ove upondola okuimbuka ovanthu vatyo ovo, mokutala etyi vatuwa tyili-tyili. Ñgeni? Efendelo liotyotyili, olio vala lina Ovakristau wotyotyili, vena ovituwa oviwa nononkhalelo oku vaimbukilwa.—Tanga Mateus 7:13-23.
3. Oñgeni moimbuka ovafendeli votyotyili?
Tala omanyingilikilo aa etano:
Ovafendi votyotyili vena onthilo Nondaka ya Huku Ombimbiliya. Valinga ononkhono mbokuendela movitumino viayo. Moluotyo, ongeleya yotyotyili yelikalela nonongeleya mbulongesa omalusoke ovanthu. (Mateus 15:7-9) Ovafendeli votyotyili kavalongesa otyipuka tyimwe iya avalingi otyipuka otyikuavo.—Tanga João 17:17; 2 Timóteo 3:16, 17.
Ovalanduli votyotyili va Jesus vahumba enyina lia Huku, Jeova. Jesus wahumbile enyina lia Huku mokulipopila ovanthu. Oe wakuatesileko ovanthu okunoñgonoka Huku, nokuvelongesa okulikuambela opo enyina lia Huku lisukukiswe. (Mateus 6:9) Apa ukala, ongeleya patyi ilongesa ovanthu enyina lia Huku?—Tanga João 17:26; Romanos 10:13, 14.
Ovakristau votyotyili vaivisa Ouhamba wa Huku. Huku watumine Jesus opo aivise onondaka onongwa Mbouhamba wae. Ouhamba wa Huku, oo vala ekevelelo liovanthu. Jesus watuaileko okupopia konthele Youhamba oo alo onthiki ankhia. (Lucas 4:43; 8:1; 23:42, 43) Oe wapopia okuti ovalanduli vae mavaivisa Ouhamba oo. Inkha omunthu umwe eya, apopi nove konthele Youhamba wa Huku, mosoko okuti owongeleya patyi?—Tanga Mateus 24:14.
Ovalanduli va Jesus kavalingi onthele youye ou wovivi. Ove upondola okuveimbuka, mokonda kavelipake mopulitika no movilwa viouye. (João 17:16; 18:36) Tupu, kavahetekela ovituwa nononkhalelo mbouye.—Tanga Tiago 4:4.
Ovakristau votyotyili vena ohole yotyotyili pokati kavo. Velilongesa Mondaka ya Huku, okuhumba omihoko aviho viovanthu. Namphila onongeleya mbomatutu mbukuatesako ovita viomalongo, ovafendeli votyotyili vaanya. (Miquéias 4:1-3) Anthi, Ovakristau votyotyili vaava omuwo wavo nomalumono avo otyali, opo vakuateseko nokupameka vakuavo.—Tanga João 13:34, 35; 1 João 4:20.
4. Okuti upondola okuimbuka ongeleya yotyotyili?
Ongeleya patyi ipola omalongeso ayo aeho Mondaka ya Huku, nokuhumba enyina lia Huku, nokupopila ovanthu okuti ekevelelo liavo Ouhamba wa Huku vala? Ovanthu vongeleya patyi vena ohole nokulityilika ovita? Oityi ove usoka?—Tanga 1 João 3:10-12.