Twii Otyipuka Tyeheiwe Novanthu Ovanyingi

Pena umwe wekupopilile otyipuka tyeheiwe novanthu ovakuavo?—a Ombimbiliya ipopia konthele yotyipuka tyakolela tyiihanwa okuti “otyipuka tyaholekwa.” Tyiihanwa okuti tyaholekwa mokonda katyiiwe novanthu. Alo umwe onoandyu ankho mbuhanda okutyinoñgonoka vali nawa. Uhanda okutyinoñgonoka?—

Kohale-hale, Huku watungile omulume wotete nomukai wotete. Ankho vatiwa ovo Andau na Eva. Wevepakele momphangu imwe ongwa itiwa otyikunino tyo Endene. Inkha Andau na Eva vetavelele ku Huku, ñgeno ovo, novana vavo vakalesa ohi aiho omphangu ongwa aikala ngotyikunino otyo. Iya ñgeno vakalako apeho Momphangu Yombembwa. Okuti uhinangela etyi Andau na Eva valingile?—

Andau na Eva kavetavelele ku Huku, iya mokonda yotyo hono katukahi momphangu yombembwa. Mahi Huku wapopia okuti ohi aiho meilingi omphangu ongwa, iya ovanthu aveho mavakakala nehambu, nomuenyo wahapu. Oñgeni metyilingi? Mokueenda kuomuvo omunyingi ovanthu ankho kavetyii. Ankho tyaholekwa.

Etyi Jesus eile pano pohi, walongesile vali unene ovanthu konthele yotyo. Wapopile okuti otyipuka otyo tyaholekwa ankho tyelikuata Nouhamba wa Huku. Wapopilile ovanthu velikuambele opo Ouhamba oo uye. Ouhamba oo maukakalesa ohi aiho omphangu ongwa.

Okuti wahambukua etyi wanoñgonoka otyipuka otyo ankho tyaholekwa?— Hinangela okuti Momphangu Yombembwa mamukakala vala vana vetavela ku Jeova. Ombimbiliya itupopila omahipululo ovalume novakai ovanyingi vetavelele ku Jeova. Okuti uhanda okulilongesa konthele yavo?— Matulilongesa konthele ya vamwe, nokutala oñgeni tupondola okuvehetekela.