ONTHELE 2
Kalei Ovakuatyili Kese Umwe na Mukuavo
Etyi Huku apaka mokanga ike, omunthu ehetyiyapule.”—Marcos 10:9
Jeova uhanda tukale “ ovakuatyili.” (Miquéias 6:8) Otyo tyakolela haunene motyinepo, mokonda inkha kamukala ovakuatyili kamamuliyumbu onthumbi. Iya onthumbi yakolela opo ohole yenyi iliyawise.
Hono, okukala noukuatyili motyinepo katyapepukile. Opo uyakulile otyinepo tyove una okutokola okulinga ovipuka vivali.
1 TETE SUKA NOTYINEPO TYOVE
ETYI OMBIMBILIYA IPOPIA: “Punga nawa ovipuka viakolela vali.” (Filipenses 1:10) Tyimwe povipuka viakolela vali momuenyo wove, oyou muelinepa nae. Tete oe una okusuka nae.
Jeova uhanda ove usuke vali na una muelinepa nae, “nokukala nehambu” amuho. (Eclesiastes 9:9) Jeova walekesa nawa okuti nalumwe upondola okukala tyihesukile na una mulinepa nae, mahi amuho muesukisa okuovola ononkhalelo mbokulihambukiswa kese umwe na mukuavo. (1 Coríntios 10:24) Lekesa una muelinepa nae okuti wesuka nae tupu wemupanda.
OITYI UNA OKULINGA:
Taindya omuvo opo mukale apeho kumwe na una muelinepa, iya omutehelela nawa
Tyina usoka uti “onthwe” uhatie “ame”
2 YUNGA VALI NAWA OMUTIMA WOVE
ETYI OMBIMBILIYA IPOPIA: “Kese umwe utualako okutala omukai, nepeleyo liokumuhanda, ngotyo momutima walingale nae oumbalehi.” (Mateus 5:28) Inkha omunthu umwe utualako okusoka koundalelapo, otyo tyilekesa okuti hamukuatyili ku una elinepa nae.
Jeova wati ove wesukisa ‘okuyunga vali nawa omutima wove.’ (Provérbios 4:23; Jeremias 17:9) Opo ulinge ngotyo, una okuyunga omaiho ove. (Mateus 5:29, 30) Landula ongeleka yohongoi Jobe, walingile omphango nomaiho ae opo ahatale komukai omukuavo nepeleyo liokumuhanda. (Jó 31:1) Tokola okuhatale ovipuka vihongiliya otyihola. Tokola okulityilika okunyana omalele nomunthu muhelinepele nae.
OITYI UNA OKULINGA:
Lekesa nawa kovanthu okuti uhole unene una muelinepa nae
Tala omasuka-suka a una muelinepa nae, nokuyekapo liwa-liwa oupanga upondola okumunumanesa