Ovatali Vononthungululu Vakatalelapo Sesusi

Kuna ovalume vamwe vatundile Koutundilo wekumbi. Ovalume ovo, ovatali vononthungululu — vana vokutanga onkhalelo yononthungululu iya avapopi okuti, vetyivila okupopia etyi tyihangununa ovipuka vimoneka momuenyo womunthu. (Isaías 47:13) Pu etyi nkhele ankho vekahi keumbo liavo Koutundilo wekumbi, vamona “onthungululu,” avaende otyikambo otyile okuilandula, mahi aihevetuala ko Mbelei, aivetuala ko Selusalei.

Etyi ovatali vononthungululu vehika-ko, avapulu okuti: “Omona makala ohamba yova Sundeu ulipi? Tuamona onthungululu yae etyi tukahi Koutundilo, iya tueya okumuliepesa.” — Mateusi 2:1, 2.

Etyi Ohamba Helode eiva otyipuka otyo, anumana unene. Moluotyo, aihana ovanakwa, nononkhalamutwe mbova Sundeu iya evepulu okuti: Opi Kilisitu matyitilwa? Ngwe avakumbulula ngetyi vatanga Movihonekwa, okuti: “Oko Mbelei.” (Mateusi 2:5; Miquéias 5:2) Helode ankho waetelwa ovatali vononthungululu pokamphengi iya evepopila okuti: “Endei kaovolei umwe nawa omona oo, tyina muamemuvasi, amuya okumphopila opo na ame ndyikemuliepese.” (Mateusi 2:8) Mahi, Helode ankho uhanda okuvasa omona na emuipae!

Tyina ovatali vononthungululu venda, akumoneka otyipuka tyimwe tyihuvisa. “Onthungululu” ina yokuamonekele etyi ankho vekahi Koutundilo yeya vali komutwe wavo ivehongolele. Tyotyili, otyo ankho tyimoneka nawa okuti hanthungululu-ko yotyotyili, mahi pena omunthu watuma otyipuka otyo tyikahi ngonthungululu opo tyivehongolele. Ovatali avalandula onthungululu alo yatalama keulu liondyuo omu ankho Suse na Maliya vekahi nomona wavo.

Etyi ovatali vanyingila mondyuo, avavasi Maliya nokana okamukuendye — Sesusi. Moluotyo, ovatali vononthungululu avelinyongamena komona. Iya avemuavela omalumono oolu, nombao inika nawa. Konyima, etyi pahe vahanda okukondoka ku Helode, Huku evelondola mondyoi opo vahakondoke-ko. Ngotyo, avaende nondyila onkhuavo no kotyilongo tyavo muene.

Mokusoka ku ove, olie watumine “onthungululu” ihongolele ovatali? Hinangela okuti, onthungululu kayevetuaile tete ku Sesusi ko Mbelei. Mahi, yevetuala no ko Selusalei, oku ankho kuvasiwa Ohamba Helode, ihanda okuipaa Sesusi. Iya inkha ha Huku wevetyilikile, etyi alondola ovatali vononthungululu vahakapopile Ohamba Helode, ñgeno Helode waipaele Sesusi. Tyimoneka nawa okuti, ankho watuma onthungululu oyo, ondyale ya Huku, Satanasi, wahandele okuipaa Sesusi iya ankho waundapesa ovalume ovo opo valinge etyi ahanda.