Potyipito Tyomanima Palekwa Omunthu

Putyina ono apositolu mba Sesusi vekahi nokulinga ovilinga viavo ko Ngalileya, Suau Batisita ankho ukahi mokaleya. Ankho wakalale mokaleya omanima evali.

Suau ankho wapopila povanthu okuti, Ohamba Helode Antipa wapengesa etyi apola omukai womukulu wae Filipe ankho utiwa o Helodiya, emunepe. Helode ankho wahenga omukai wae muene, anepe Helodiya. Ngetyi Ovitumino Viapelwe Moisesi vipopia, vina ankho Helode alandula, ankho ukahi nokulinga oumbalehi, otyipuka tyailikwa. Mokonda Suau wapopia okuti tyapenga, Helode emupake mokaleya, tyafuile ankho wahongiliyua na Helodiya.

Helode ankho kei oityi malingi Suau, mokonda ovanthu ankho vati, “Suau omuuli.” (Mateusi 14:5) Mahi Helodiya ankho utyiiale etyi ahanda okumulinga. “Ankho una onkhongo na Suau,” iya moluotyo, ankho wovola okumuipaa. (Maluku 6:19) Pahe amono omphitilo.

Etyi kuakamba katutu, na valinge Opasikwa menima 32 P.K., Helode alingi otyipito otyinene tyomanima ae. Akongo omanene atyo, nononkhalamutwe mbomafualali novanthu vankhimana vomo Ngalileya, aveya kotyipito. Motyipito, Salomee omona wa Helodiya nomulume wae wo tete Filipe, anyane unene, okunyanena-po ovanthu veya motyipito. Ovalume ankho vekahi-po avetyipande unene.

Mokonda Helode ankho wahambukwa unene netyi omona wae anyana, emupopila okuti: “Ndyite etyi uhanda, ame mandyikupe-tyo.” Alo umwe aane, ati: “Kese etyi mondyiti, ame mandyikupe-tyo, alo umwe onthele imwe youhamba wange, mandyikupe-yo.” Salomee ahakumbulula liwa, akapula ku me yae, ati: “Ndyimuita-tyi?” — Maluku 6:22-24.

Oyo, ankho omphitilo Helodiya aovola-le unene! Tyihatale vali konyima, ati: “Ita omutwe wa Suau Omumbatisali.” Liwa-liwa, Salomee akondoka ku Helode, ati: “Nahanda umphe pahetyino omutwe wa Suau Batisita pelonga.” — Maluku 6:24, 25.

Otyipuka otyo atyitokotesa Helode omutwe, mahi ovaenda vae ankho vetyiiva etyi apopila Salomee. Okuhetyilingi ankho matyimukundisa, namphila ngotyo ankho maipaa omunthu uhena etyi alinga. Helode atumu omuyungi wokaleya, alinge otyipuka ankho tyemuihama unene. Omuyungi kasetele-ale, aeta omutwe wa Suau pelonga. Ewaavela Salomee, ngwe eutuala ku me yae.

Etyi ovalongwa vae vetyiiva avaende-ko, avapolopo olutu luatyo, avekelupaka. Konyima aveketyipopila Sesusi.

Etyi Helode eiva okuti Sesusi ukahi nokuhakula ovanthu nokutaata ovilulu, atili owoma. Ankho walinga otyiho, wati hamwe Sesusi ukahi nokulinga ovipuka ovio, o Suau Batisita “wapindulwa-po kononkhia.” (Luka 9:7) Moluotyo, Helode Antipa ankho uhanda unene okulimona na Sesusi. Ankho kahande velimone na atehelele etyi alongesa, mahi ankho uhanda okutala inkha tyili-tyili Sesusi ha Suau-ko opo ahakale vali notyiho.