Uundapesa Omukuyu Opo Alongese Konthele Yekolelo

Motyasikunda kekumbi, Sesusi atundu mo Selusalei, akondoka ko Betania, koutundilo Womphunda Yomindyambi. Tyafuile alala meumbo liomapanga ae ovo Lasalu, na Malata na Maliya.

Pahe ankho okomuhuka monthiki 11 ya Nisan. Sesusi novalongwa vae ankho vekahi vali mondyila, vakondoka ko Selusalei, kuna ankho makaya mondyuo ya Huku otyikando tyahulilila. Tupu ankho onthiki yahulilila yovilinga viae, putyina nkhele ehenelinge Opasikwa, nokuhimbika Ehinangelo liononkhia mbae, konyima amoneswa ononkhumbi iya aipawa.

Putyina valamba Omphunda Yomindyambi, okutunda mo Betania okuenda no ko Selusalei, Petulu amono omukuyu Sesusi atelele onkhano monthiki yokualamba komuhuka. Ati: “Mulongesi, tala! omukuyu una wateyela onkhano wakukuta.” — Maluku 11:21.

Omokonda yatyi Sesusi akukutisilile omuti oo? Otyo wetyipopia mekumbululo liae, etyi ati: “Tyotyili ame ndyimupopila okuti, inkha mukala nekolelo, amuhakala nondima, kamamulingi vala ngetyi ame nalinga omukuyu. Mahi tupu inkha mupopila omphunda ei okuti: ‘Tunda apa keliyumbe melunga,’ matyeende umwe ngotyo. Iya ovipuka aviho muiita nekolelo melikuambelo, mamuvipewa.” (Mateusi 21:21, 22) Ngotyo, ankho ukahi nokuwana vali etyi apopile-ale konthele yekolelo lipondola okuhondovola omphunda. — Mateusi 17:20.

Mokuakukutisa omuti una, Sesusi walongesa esilivilo liokukala nekolelo mu Huku. Wati: “Ovipuka aviho mulikuambela nevi muiita, viitei nekolelo, amuvitale ngatyina muevitambula-le iya mamukevipewa.” (Maluku 11:24) Otyo, tyina esilivilo enene kovalanduli aveho va Sesusi! Iya ankho tyina vali esilivilo enene kono apositolu, mokonda yononkhumbi ankho mavamoneswa. Okuakukutisa omukuyu oo, nokukala nekolelo, tyelikuata kumwe monkhalelo onkhuavo.

Ngomukuyu oo, elongo lyo Isilayeli ankho limoneka ngoti likahi nawa. Ovanthu velongo olio ankho vekahi momphango youpanga na Huku, iya ankho velilekesa ngatyina valandula Ovitumino. Mahi, velongo olio aliho valekesile okuti ankho vetupu ekolelo, tupu kavaave ovinyango. Avaanye alo umwe Omona wa Huku! Ngotyo, etyi akukutisa omukuyu una uhaave ovinyango, Sesusi walekesa oityi ankho matyimonekela elongo olio lihaave ovinyango, tupu lihena ekolelo.

Pakala vala katutu, Sesusi novalongwa vae avanyingila mo Selusalei. Ngetyi ankho alinga-le, Sesusi aende mondyuo ya Huku, ahimbika okulongesa. Tyafuile ovanene-nakwa, novakulu ankho vekahi nokusoka kuetyi Sesusi alingile ovakumani vonombongo monthiki yokualamba, avemupulu okuti: “Epondolo lialie ulinga nalio ovipuka evi? Olie wekutuma okuvilinga?” — Maluku 11:28.

Sesusi akumbulula okuti: “Na ame mandyimulingi epulo like. Inkha munkhumbulula, na ame mandyimupopila olie wanthuma okulinga ovipuka evi. Ombatisimu Suau alinga yatukile keulu ine yatukile movanthu?” Pahe onondyale mbae, ankho ovo vena okumukumbulula. Ovanene-nakwa, novakulu avelipulu poyavo oñgeni mavakumbulula, avati: “Inkha tuti: ‘Yatukile keulu,’ metupulu okuti: ‘Kamuemutavelele mokonda yatyi?’ Okuti tutiei: ‘Yatukile movanthu’?” Ankho tyevepuiya okusoka etyi mavalingi mokonda vatila owoma ovanthu, “mokonda kuvo Suau ankho omuuli.” — Maluku 11:29-32.

Onondyale mba Sesusi ankho kavetyivilile okuava ekumbululo liaviuka. Ngotyo, avati: “Onthue katutyii.” Sesusi evepopila okuti: “Na ame himemupopila olie wanthuma okulinga ovipuka evi.” — Maluku 11:33.