Huku Watunga Omulume Wotete Nomukai Wotete

Siovaa walinga otyitaka pohika pamwe patiwa o Endene. Motyitaka ankho muna ononthemo ononyingi, nomiti ominyingi, novinyama. Pahe Huku atungu omulume wotete, utiwa o Andau, wemutunga nonthata afili momayulu ae. Ove utyii oityi tyamoneka-po etyi emufila momayulu? Omulume akala nomwenyo! Siovaa aavela Andau otyilinga tyokuyunga otyitaka, nokuluka ovinyama aviho.

Siovaa apopila Andau okuti: ‘Upondola okulia ovinyango viomiti aviho. Mahi kuna omuti wahapondola okulia. Inkha ulia kotyinyango tyomuti oo monkhi.’

Pahe Siovaa apopi okuti: ‘Ame mandyitungu omukwatesiko wa Andau.’ Huku alalesa Andau, emupolo olupati atungu nalo omukai wa Andau. Enyina liae o Eva. Andau na Eva avakala ovalinepi votete. Andau wakalele ñgeni etyi amona omukai wae? Andau ahambukwa ati: ‘Tala etyi Siovaa alinga nolupati lwange! Ou omunthu ukahi ngame.’

Siovaa atolela Andau na Eva okuti kalei novana, amuyulisa ohi. Huku ankho uhanda vaundape kumwe nehambu opo valinge ohi aiho ikale Omphangu Yombembwa, ngotyitaka tyo Endene. Mahi ovipuka kaviakalele ngeetyi Huku ahandele. Omokonda yatyi? Matulilongesa-tyo melongeso malilandula-ko.