Andau na Eva Kavetavelele ku Huku

Nthiki imwe etyi Eva ekahi aike, onyoka aimupulu okuti: ‘Otyili Huku wati kamupondola okulia kovinyango aviho?’ Eva ati: ‘Tupondola okulia komiti aviho, mahi pena vala omuti wike twahapondola okulia. Inkha tulia otyinyango tyomuti oo, matunkhi.’ Onyoka aiti: ‘Kamamunkhi. Tyotyili, inkha mulia komuti oo, mamukala nga Huku.’ Okuti otyo otyili? Au, omatutu. Mahi Eva etavela komatutu oo. Putyina Eva atala otyinyango, etyipeleya unene. Eva ali kotyinyango tupu aavela Andau. Andau ankho utyii okuti inkha kavetavela ku Huku mavankhi. Mahi no ngootyo ali kotyinyango.

Pahe Siovaa apopi na Andau na Eva. Evepulu omokonda yatyi valila kotyinyango. Eva atatehila monyoka, Andau atatehila mu Eva. Mokonda Andau na Eva kavetavelele ku Siovaa, avataatwa motyitaka. Opo vahakondoke motyitaka, Siovaa apake pombundi onoandyu nomutunga wotupia.

Siovaa wapopia okuti una wakemba Eva maipawa. Hanyoka-ko yapopile na Eva. Siovaa katungile onyoka nounongo wokupopia. Ankho oandyu imwe ondingavivi yalinga ngatyina onyoka ipopia. Yalinga ngootyo opo Eva emutavele. Oandyu oyo itiwa o Satanasi Eliapu. Apa katutu, Siovaa makahanya-ko Satanasi opo ahahindile vali ovanthu okulinga ovivi.