Walolwa Atalwe Onthumbi Yae

Ambalayau walongesile omona wae Isake okuhumba Siovaa nokuyumba onthumbi mweevi apopia. Mahi etyi Isake ena omanima 25, Siovaa aiti Ambalayau alinge otyipuka tyimwe tyalema. Otyipuka patyi?

Huku wapopilile Ambalayau okuti: ‘Kwata omona wove, omona wike vala una-e, enda ko Moliaa ngako umulingila otyilikutila.’ Ambalayau ankho ketyii omokonda yatyi Siovaa emwitila otyipuka otyo. Mahi no ngootyo etavela ku Siovaa.

Etyi kwatya, Ambalayau apopila Isake novaundapi vae vevali ati twendei ko Moliaa. Etyi vaenda ononthiki ononthatu, tyina vakati ñgaa onomphunda mbo Moliaa mbumonekela kokule. Ambalayau apopila ovaundapi vae okuti: ‘Salei pano, ame na Isake matukalinga otyilikutila.’ Ambalayau aavela Isake otyipandi tyononkhwii atyinde, ngwe Ambalayau atyindi onkhiki. Isake apulu tate yae ati: ‘Otyinyama matukalinga otyilikutila tyili-pi?’ Ambalayau emuti: ‘Mona wange, Siovaa metyieta.’

Etyi vehika komphunda, avatungu omutala wovilikutila. Pahe Ambalayau akutu Isake komavoko nokovikalo, emulangeka kombanda yomutala.

Ambalayau akwate onkhiki. Ukati ñgaa wiiva oandyu ya Siovaa iihana aiti: ‘Ambalayau! Wahaipae omona! Ame ndyityii okuti uyumba onthumbi mu Huku mokonda kwaanyenene okulinga otyilikutila omona wove.’ Ambalayau amono ongi yaanyena motyinkhondo. Akutulula Isake, alingi ongi oyo otyilikutila.

Okutuka umwe opo, Siovaa opo akaihana Ambalayau okuti epanga liae. Ove utyii omokonda yatyi? Omokonda walingile etyi Siovaa emwiita namphila ehetyii omokonda yatyi emwiitila etyilinge.

Siovaa apopila vali Ambalayau okuti: ‘Ame mandyikuyambe okala novana ovanyingi.’ Otyo ankho tyihangununa okuti ovanthu aveho mavakapewa oviwa na Siovaa mokonda ya Ambalayau.