Otyimbulu tya Mbalaau Tyipopia

Palamba-le omanima 40 otyo ova Isilayeli vekahi moluhandya. Ova Isilayeli ankho vatambula-le omapunda-umbo omanyingi apama. Pahe, ankho vatula momaluhandya popepi notyilongo tyitiwa o Moambe koutundilo Wondongi Solondau. Pahe ankho mavanyingila Motyilongo Tyalaelwe. Mbalake, ohamba yo Moambe, atili owoma wokuti mavapolwa otyilongo tyavo. Aihana omulume umwe utiwa o Mbalaau opo eye ko Moambe ahingane ova Isilayeli.

Mahi Siovaa apopila Mbalaau okuti: ‘Wahakahingane ova Isilayeli.’ Mbalaau ahaende vali ko Moambe. Ohamba Mbalake aimwiihana vali aiti, mankhwavela atyiho wahanda. No ngootyo, Mbalaau ahaende. Pahe Huku emupopila okuti: ‘Upondola okwenda, mahi kapopie vala etyi mandyikutumu.’

Mbalaau avelama kotyimbulu tyae aende ko Moambe. Mahi asoko okukahingana ova Isilayeli, namphila Siovaa emupopila okuti wehevehingane. Pweetyi veli mondyila, Siovaa atumu oandyu yae. Otyimbulu ankho tyiete oandyu, mahi Mbalaau ankho keyeete. Etyi otyimbulu tyamona oandyu, atyitundu metapalo atyiviuku mofika. Mbalaau etyivete. Etyi etyiveta, otyimbulu atyilitutuminya motyimato tyomamanya, otyikalo tya Mbalaau atyiominiyilwa motyimato. Mbalaau etyivete vali. Pahe otyimbulu atyilangala-po metapalo. Mbalaau etyivete vali.

Etyi Mbalaau etyiveta, Siovaa alingi otyipuka tyihuvisa, otyimbulu atyipopi. Atyipulu Mbalaau atyiti: ‘Oityi umbetela?’ Mbalaau ati: ‘Omokonda ukahi nokunkhundisa. Inkha nali nomutunga ñgeno nekwipaa.’ Otyimbulu atyipopi okuti: ‘Nkhele wahimbikile hame otyimbulu tyove wendela vala atee hono? Kumbi limwe nekulingile-ale ñgaa?’

Siovaa aikula omaiho a Mbalaau, Mbalaau pahe oandyu ina eimono. Oandyu aipopi okuti: ‘Siovaa wekupopila opo wahahingane ova Isilayeli.’ Mbalaau apopi okuti: ‘Napengesa. Mandyikondoka keumbo.’ Mahi oandyu aimupopila okuti: ‘Ove upondola okwenda ko Moambe, mahi kapopie vala etyi Siovaa ekupopila ulinge.’

Okuti Mbalaau una etyi elilongesila-ko? Au. Etyi ehika ko Moambe, Mbalaau ahetekela okuhingana ova Isilayeli tutatu, mahi pokwapopia Siovaa emulingisa ehevehingana, evepeleyila oviwa. Etyi pakala, ova Isilayeli avakalwisa ova Moambe, Mbalaau nae aipawa. Okuti inkha Mbalaau wetavelele ku Siovaa ñgeno wankhile?