Sindeyau Ulwisa Ova Mindiyaa

Etyi pakala, ova Isilayeli avayeke-po vali Siovaa avahimbika okufenda ovika-huku. Ova Mindiyaa avakala omanima epandu-vali nokuvaka ovipako viova Isilayeli, nokuhanyauna omapia avo. Ova Isilayeli ankho vawela owoma ova Mindiyaa, avakaholama momaleva no monomphunda. Avaiti ku Siovaa opo eveyovole. Siovaa atumu oandyu komukwendye umwe utiwa o Sindeyau. Oandyu aimupopila okuti: ‘Siovaa wekukoya opo uyovole ova Isilayeli.’ Sindeyau ati: ‘Ame ñgaa ndyityivila okuyovola ova Isilayeli? Ame ame-lie?’

Oñgeni Sindeyau metyimono okuti wakoywa umwe na Siovaa? Apake otyinyanga pohi, elikwambela ku Siovaa ati: ‘Inkha muhuka otyinyanga tyitalala mahi pohi apakukuta, mandyitavela okuti ove uhanda ndyiyovole ova Isilayeli.’ Etyi kwatya, ukatala otyinyanga tyatalala mahi pohi pakukuta! Mahi Sindeyau aiti vali okuti muhuka nahanda pohi patalale, otyinyanga atyikukuta. Siovaa ngatyo umwe alinga, Sindeyau etyimono umwe okuti wakoywa na Siovaa. Aongiya ovakwa-vita vae opo vakalwe nova Mindiyaa.

Siovaa apopila Sindeyau okuti: ‘Ame mandyikwatesako ova Isilayeli, ova Mindiyaa avahavete-ko kwoonwe. Mokonda muna ovakwa-vita ovanyingi, mupondola okusoka okuti mwetyivila kononkhono mbenyi. Popila aveho vatila owoma vakondoke komaumbo avo.’ Ovakwa-vita 22.000 avakondoka keumbo, apesala vala 10.000. Siovaa emupopila vali ati: ‘Nkhele muvanyingi, tepula-ko vali. Vetwala kondongi ovepopila vanwe omaande. Enda vala kovilwa na vana vanwa otyo vatala konondyale mbavo.’ Ovalume 300 ovo vala vanwine ngootyo. Siovaa apopi okuti ovanthu ovo vehehi mavalwisa umwe ova Mindiyaa 135.000 avatili-ko.

Monthiki oyo kounthiki, Siovaa atolela Sindeyau okuti: ‘Katuka, kalwise ova Mindiyaa!’ Sindeyau aavela ovakwa-vita vae ononkhwino nonombiya muna ovihihi. Sindeyau evepopila okuti: ‘Talei nawa etyi mandyilingi, noonwe ngatyo mulinga.’ Sindeyau ahiki onkhwino atyatyula ombiya, afuku otyihihi eliyavelela peulu ati: ‘Omutunga wa Siovaa no wa Sindeyau!’ Ovalume 300 ngatyo valinga. Ova Mindiyaa avawele owoma avakahateka. Mokonda valimbililwa, avahimbika okuliipaa poyavo. Siovaa akwatesako vali ova Isilayeli okulwisa onondyale mbavo.