Ohamba Yotete yo Isilayeli

Siovaa waavelele ova Isilayeli omukoyesi opo evelulike, mahi ova Isilayeli avahande ohamba. Avapopila Samuwele okuti: ‘Ovilongo aviho tweliyama navio vina onohamba. Noonthwe twahanda ohamba.’ Samuwele atyimukalesa omapita, etyipopila Siovaa. Siovaa emuti: ‘Ovanthu have-ko vekahi nokwaanya. Vekahi nokwaanya ame. Vepopila okuti vapondola okukala nohamba, mahi maivemonesa ononkhumbi.’ Ovanthu avati: ‘Onthwe katwesukile. Twahanda vala ohamba!’

Siovaa apopila Samuwele okuti ohamba yotete mevetumina o Saulu. Etyi Saulu apita ku Samuwele ko Lamaa, Samuwele emulembula akale ohamba, emutili omulela pomutwe.

Samuwele aihana ova Isilayeli aveho opo evelekese ohamba yavo vaita. Mahi Saulu yatyo malingwa ohamba kavemweete. Utyii omokonda yatyi? Omokonda ankho waholama. Etyi vemuvasa, avemupake pokati kovanthu. Saulu ankho omulaale kovanthu aveho, tupu omuwa unene. Samuwele ati: ‘Oyou Siovaa aholovona.’ Ovanthu avapopila peulu okuti: ‘Ohamba ikaleko apeho!’

Potete Ohamba Saulu ankho itehelela Samuwele, tupu ankho itavela ku Siovaa. Mahi etyi pakala, aipiluluka. Ohamba kaipondola okulinga otyilikutila. Onthiki imwe Samuwele apopila Saulu opo emukevele alinge otyilikutila, mahi Samuwele eheya liwa. Saulu ahakevelela vali Samuwele, ngae ulinga otyilikutila. Samuwele emutiwi? Emuti: ‘Ove ñgeno wetavelele ku Siovaa.’ Okuti Saulu una etyi elilongesilile kotyipuka otyo?

Etyi Saulu akalwisa ova Amaleke, Samuwele apopila Saulu okuti wahahupise natyike. Mahi Saulu ahaipaa Ohamba Angange. Siovaa apopila Samuwele okuti: ‘Saulu wandyeka-po, kanthehelela vali.’ Samuwele anumana, akapopila Saulu okuti: ‘Mokonda kutavela vali Siovaa, Siovaa makoyo ohamba onkhwavo.’ Etyi Samuwele emutyindamena akondoke, Saulu akakatela motyikutu tyae atyitanduka. Samuwele apopila Saulu okuti: ‘Siovaa mekupolo kouhamba.’ Siovaa apake-ko omunthu omukwavo umuhole, umutavela.