Ohamba Ndaviti Yalinga Onkhali

Etyi Saulu ankhia, Ndaviti akala ohamba. Ndaviti ankho una omanima 30. Nthiki imwe kokangulohi etyi ekahi keulu liondywo yae, amono omukai umwe omuwa unene. Omukai oo utiwa o Mbate-Semba, wanepwa nomukwa-vita utiwa o Uliya. Ndaviti aihanena Mbate-Semba mondywo yae, alala nae. Mbate-Semba akala omulemi. Ndaviti ahande okuholeka etyi alinga. Apopila omutumini wovakwa-vita apake Uliya komutwe wovakwa-vita pokulwa, avemusipo. Uliya aipawa, Ndaviti anepe Mbate-Semba.

Mahi Siovaa wamwene ovipuka ovio aviho. Oityi Siovaa alingile? Siovaa atumu omuuli Nataa ku Ndaviti. Nataa emupopila okuti: ‘Omulume umwe omuhona, ankho una onongi ononyingi, omukwavo wahepa, una vala ongi ike ehole unene. Omulume wokwamona apolo-po ongi oyo yomulume wahepa.’ Ndaviti anumana unene apopi okuti: ‘Omulume oo wokwamona ñgeno wiipawa!’ Nataa apopila Ndaviti ati: ‘Omulume omuhona ove!’ Ndaviti atyimwiihama, apopi okuti: ‘Nalinga onkhali ku Siovaa.’ Onkhali oyo ayeetela Ndaviti nombunga yae ovitateka ovinene. Siovaa waviyulile Ndaviti, mahi ehemwiipaa mokonda weliolele omutima apopi umwe etyi alinga.

Ndaviti wahandele okutungila ondywo Siovaa, mahi otyilinga otyo Siovaa etyaavela omona wae Salomau. Ndaviti ehimbika okwongiya ovipuka Salomau matungu navio, ati: ‘Ondywo ya Siovaa maikala ongwa unene. Salomau nkhele omona, mahi mandyimukwatesako okwongiya ovipuka.’ Ndaviti aave onombongo ononyingi opo akwateseko ovilinga viokutunga. Ndaviti aovola ovaundapi ovanongo. Aongiya opalata noolu nomavai atunda ko Tilu no ko Sindone. Etyi Ndaviti ehungi kokunkhia, aavela Salomau omukanda upopia oñgeni ondywo ya Huku maitungwa. Apopi okuti: ‘Siovaa oe wahoneka ovipuka aviho evi nekwavela. Siovaa mekukwatesako. Wahatile owoma. Kala tyapama, ovilinga viende nawa.’