Siovaa Waamena Seosafaa

Seosafaa, ohamba yo Sundaa, wahanya-po omitala viovilikutila viotyika-huku tyitiwa o Mbaale novilolo ankho vikahi motyilongo. Ankho uhanda ovanthu vanoñgonoke ovitumino vya Siovaa. Atumu ovatumini no vomuhoko wa Levii vakalongese ova Sundaa motyilongo atyiho ovitumino vya Siovaa.

Ovilongo vikala popepi ankho vina owoma wokulwisa otyilongo tyo Sundaa mokonda ankho vetyii okuti Siovaa waamena ovanthu vae. Ovanthu vo movilongo ovio ankho vatwaila ovipuka Ohamba Seosafaa. Mahi konyima ovanthu voko Moambe, no voko Amoo, na vana vatunda kotyilongo tyo Seili aveya okulwisa o Sundaa. Seosafaa ankho utyii okuti wesukisa okukwateswako na Siovaa. Atumu ovanthu aveho, ovalume, novakai, novana vende ko Selusalei. Elikwambelela komutwe wovanthu aveho, ati: ‘Siovaa inkha kutukwatesako kamatutyivili okulwa. Mbambavo tupopile etyi tuna okulinga.’

Siovaa akumbulula elikwambelo ati: ‘Mwahatilei owoma. Ame mandyimukwatesako. Kalei tyitai, amutale oñgeni mandyimuyovola.’ Oñgeni Siovaa eveyovolele?

Monthiki yalandula-ko, Seosafaa aholovona ovanthu ovanongo kokwimba, evepopila vapite komutwe wovakwa-vita otyo vaimba. Avaende okutunda ko Selusalei atee ko Tekowa, pana mavalwila.

Etyi ovalume ovo veli nokuhivilika Siovaa noviimbo nonondaka mbaya peulu, Siovaa alingi otyipuka tyimwe tyihuvisa. Angwangwanesa ova Amoo nova Moambe avelilwisa poyavo, aveliipaa. Siovaa aamena ovanthu vo Sundaa, ngeetyi apopile. Ovilongo aviho vikahi popepi avetyiivi etyi Siovaa alinga, avetyimono okuti Siovaa nkhele waamena ovanthu vae. Oñgeni Siovaa ayovola ovanthu vae? Ulinga ovipuka ovinyingi eveyovole. Opo eveyovole kesukisa okukwateswako novanthu.