Ovita Vya Siovaa Viapama

Ohamba yoko Silia itiwa o Mbeni-Handande, ehimbwe yahandele okulwisa ova Isilayeli. Mahi omuuli Eliseu ankho upopila ohamba yo Isilayeli, etyi Mbeni-Handande ahanda okulinga. Mokonda yootyo Mbeni-Handande ahande okwipaa Eliseu. Etyiivi okuti Eliseu uli kepunda-umbo lyo Ndotaa, atumu ovakwa-vita vakakwate Eliseu.

Ovakwa-vita vo Silia avehiki ko Ndotaa kounthiki. Etyi kwatya, omuundapi wa Eliseu alupuka, amono okuti epunda-umbo likahi pokati kovita vimwe ovinene. Awele owoma apopi okuti: ‘Eliseu, matulingi ñgeni?’ Eliseu emupopila okuti: ‘Ava tuna-vo ovanyingi vali tyipona ava vena-vo.’ Opo yatyo opo, Siovaa aikula omaiho omuundapi wa Eliseu, tyina akati ñgaa konomphunda mbukahi popepi nepunda-umbo kweyula ononkhambe mbotupia nomatemba ovita.

Etyi ovakwa-vita ova Silia vahetekela okukwata Eliseu, ngwe elikwambela ati: ‘Siovaa, mbambavo kalesa ovanthu ava ovamphoki.’ Namphila omaiho ovakwa-vita ahapatele, mahi pahe oku venda nako kavekwii vali. Eliseu apopila ovakwa-vita okuti: ‘Mweya mepunda-umbo liehelio. Ndandulei, mandyimulekesa omulume mukahi nokwovola.’ Avalandula Eliseu atee ko Samaliya, kuna kukala ohamba yova Isilayeli.

Ova Silia tyina vakati ñgaa oku vekahi vekwimbuka. Ohamba yova Isilayeli aipulu Eliseu okuti: ‘Ndyipondola okuveipaa?’ Okuti Eliseu wasokele okuti oyo omphitilo yokwipaa ovanthu ankho vahanda okumwipaa? Au. Eliseu ati: ‘Weheveipae. Veavela okulia ovetumu vaye.’ Ohamba yova Isilayeli ailingila ovakwa-vita otyipito tyimwe otyinene, aiveyeke vende.