Omuti Umwe Omunene

Nthiki imwe, Nambukondonosole aloto vali ondyoi imwe itilisa owoma. Aihana ovalume aveho ovanongo opo vahangunune ondyoi oyo. Mahi nawike wetyivilile. Pahe ohamba aiihana Ndaniyele.

Nambukondonosole apopila Ndaniyele ati: ‘Mondyoi yange namona omuti. Omuti oo, wekula, aulingi omuti umwe omunene, ondungu yatyo aikatoma peulu, umoneka umwe mouye. Wayova nawa tupu waima unene. Ovinyama omo viombela, oviila omo vitunga ovityiyu. Akuya oandyu yatunda keulu. Aipopila peulu aiti: “Omuti utyokei-po, onompha mbatyo mbutyokei-tyokei. Mahi otyihingi tyatyo tyikutei notyivela. Omutima walio upiluluke, wahalinge vali omutima womunthu, lipewe omutima wotyinyama momivo epandu-vali. Ovanthu aveho vetyimone okuti Huku oe Omutumini, tyokutumina utyaavela ou ahanda.”’

Siovaa wapopila Ndaniyele oityi ondyoi oyo ihangununa. Etyi Ndaniyele anoñgonoka etyi tyihangununa ondyoi, awele owoma. Apopi okuti: ‘Hamba, nahandele ñgeno ondyoi ipopia onondyale mbove, mahi ipopia ove. Omuti omunene mautyokwa-po ove yatyo. Ouhamba wove moupolwa okakala mohika nokulia eholi ngotyinyama. Mahi ngeetyi tyapopia oandyu okuti, seipo otyihingi tyatyo, ove mokondoka vali okukala ohamba.’

Etyi palamba enima, Nambukondonosole ankho ukahi nokwenda-enda keulu liondywo yae otyo atala o Mbambilonia. Apopi okuti: ‘Tala epunda-umbo eli ewa ame natunga. Ame ndyihamba onene!’ Etyi apopia ngootyo, eivi ondaka yatunda peulu yati: ‘Nambukondonosole! Ouhamba pahe weupolwa.’

Nambukondonosole avele komutwe, akala ngotyinyama. Atundu meumbo, akakala mohika novinyama. Onohuki mba Nambukondonosole ambukala onondande ngomainya onkhombe onohoka mbae ambukala ngo mboviila.

Etyi palamba omanima epandu-vali, Nambukondonosole akala nawa, Siovaa emuyeke akale ohamba yo Mbambilonia. Nambukondonosole ati: ‘Ame ndyihivilika Siovaa, Ohamba yo keulu. Pahe ndyityii okuti Siovaa Omutumini. Siovaa ukondola koututu vana velipaka-ko, tyokutumina utyaavela ou ahanda.’