Esitala Ulongesa Ovitumino Vya Huku

Okutuka apa ova Isilayeli vamwe vakondoka ko Selusalei apalambe omanima 70, mahi vamwe nkhele ankho vakala kovilongo ovikwavo vituminwa no Pelesa. Umwe puvo omunakwa utiwa o Esitala, ankho ulongesa ovanthu Ovitumino vya Siovaa. Esitala eivi okuti ovanthu mo Selusalei kavekahi nokulandula Ovitumino vya Huku, pahe ankho uhanda okwenda-ko opo ekevekwateseko. Ohamba yo Pelesa Alitaselesi aimupopila okuti: ‘Huku yove wekwavela ounongo wokulongesa Ovitumino viae. Enda, ine pena ou uhanda okwenda noove enda nae.’ Esitala aihana ovanthu aveho vahanda okukondoka ko Selusalei. Avelikwambela ku Siovaa opo vehike nawa, pahe avaende.

Avaende onohanyi ononkhwana, avehiki ko Selusalei. Ovatumini avapopila Esitala okuti: ‘Ova Isilayeli kavetavelele ku Siovaa, velinepa novakai vafenda ono huku mbomatutu.’ Oityi Esitala alingile? Waikila konongolo otyo ovanthu vemutala elikwambela ati: ‘Siovaa, ove wetulingila ovipuka ovinyingi, mahi onthwe twalinga vali onkhali.’ Ovanthu avelivele, mahi ovipuka ovivi valinga aveheviyeke-po. Esitala akoyo ovakulu vamwe novokuteta onomphela opo vatetulule otyitateka otyo. Etyi palamba onohanyi ononthatu, mo Selusalei ankho mutupu vali omunthu wahafende Siovaa, aveho vataatwa.

Apalambe omanima 12. Ovimato vyo Selusalei avipindulwa-po. Esitala aihana ovanthu aveho opo evetangele Ovitumino vya Huku. Etyi aikula omukanda, ovanthu aveho avakatuka. Esitala ahivilika Siovaa, ovanthu aveho navo avemuhivilika. Esitala pokuli nokutanga Ovitumino, evihangununa umwe nawa, ovanthu aveho otyo vemutehelela nawa. Ova Isilayeli avetyimono okuti kavetavelele vali ku Siovaa, avahimbika okulila. Onthiki onkhwavo, Esitala evetangela vali Ovitumino. Ova Isilayeli avetyinoñgonoka okuti omuvo wokulinga Otyipito Tyomakaka wehika-po. Avakaovola omiti novifo, avatungu omakaka.

Otyipito tyakalele ononthiki epandu-vali, ovanthu avahambukwa unene, avapandula Siovaa mokonda ovikuna viavo viayelele. Mo Selusalei kamunelingwe vali Otyipito Tyomakaka otyinene ngatyina, okutuka ponthiki mba Susuwee. Etyi otyipito tyapwa, ovanthu aveho aveliongiya, avelikwambela avati: ‘Siovaa, ove wetuyovola koupika, otwavelela okulia moluhandya, otwavela otyilongo etyi otyiwa. Mahi ankho tukalela umwe vala okuhekutavela. Ove wetutumine ovauli opo vetulondole, mahi otyo tuhetavela. Mahi ove wapwile elundo. Wafwisapo etyi wapopilile Ambalayau. Pahe tuhanda okutavela kwoove.’ Etyi vapopia vomuhoko wa Levii novanakwa avetyihoneka pomukanda, avapake-po otyilimbo.