Ovimato Vyo Selusalei

Nkhele tusokei katutu konyima. Neemiya ankho omuundapi Wohamba Alitaselesi. Neemiya omu Isilayeli ukala ko Pelesa, mepunda-umbo lyo Susaa. Ondenge ya Neemiya watundile ko Sundaa, apopila Neemiya ati: ‘Ovanthu vokuli mo Selusalei, vokwahupile koupika, veli nokumona ononkhumbi. Ovimato viokwahanywa-po nova Mbambilonia kavinetungwe.’ Neemiya anumana. Ankho uhanda okwenda ko Selusalei opo ekevekwateseko, elikwambela aiti ku Siovaa opo ohamba imuyeke.

Ohamba aityimono okuti Neemiya kekahi nawa. Aipopi okuti: ‘Ame hinekumone ukahi ñga. Oityi wiivite?’ Neemiya ati: ‘Nanumana mokonda ovimato viepunda-umbo lietu lyo Selusalei viahanywa-po.’ Ohamba aimupulu okuti: ‘Oityi ove uhanda ndyilinge?’ Neemiya elikwambelela momutima. Etyi elikwambela ati: ‘Ndyeke-vo ndyende nkhapindule-po ovimato vyo Selusalei.’ Ohamba Alitaselesi aitolela Neemiya okuti upondola okwenda, ohamba aimwaavela omukanda novakwa-vita vemuhindikilile. Ohamba ailingi Neemiya akale omutumini wova Sundaa, emwaavela omavai opo alinge omapito epunda-umbo.

Etyi Neemiya ehika ko Selusalei, atale oñgeni ovimato vikahi. Etyi evitala, aihana ovanakwa novatumini, evepopila okuti: ‘Tukahi omapita. Tupindulei-po ovimato.’ Ovanthu avetavela avahimbika okutunga ovimato.

Mahi vamwe vokuyele ova Isilayeli avahimbika okuvekwela, avati: ‘Otyimato etyi nolunga vala okuliata-ko tyiwapo.’ Ova Isilayeli avehesuku neetyi vapopiwa, avatwalako nokutunga. Ovimato avikulu, avatungu umwe ovimato viakola.

Etyi vokuveyele vatala okuti ova Isilayeli kavesukile-ale, vatwalako vala nokutunga, avati matukevelwisa. Etyi ova Sundaa veiva otyo tyapopia vokuveyele, avatili owoma. Mahi Neemiya ati: ‘Mwahatilei owoma. Siovaa una onthwe.’ Neemiya akoyo ovanthu vamwe vayunge opo vokuveyele veheye okuvelwisa.

Avatungu vala ononthiki 52 avamane. Neemiya aihana vomuhoko wa Levii aveho opo vakapakule o Selusalei. Evetepula, atyiti ava veli nthele yooku, ava veli nthele yooku. Otyo vahika onombendo, novihumba, nouñgoma, otyo vaimbila Siovaa. Esitala ankho una otyikundyi tyimwe, Neemiya una otyikwavo, avahonyena mondywo ya Huku. Ovanthu aveho — ovalume, novakai, novana — avaave ovilikutila ku Siovaa, avalingi otyipito. Ankho vahambukwa unene, avaviele, atyiivala umwe kokule.