Ovakwa-Kilisitu Veliyandyana Movilongo Ovinyingi

Ovatumwa vetavelele etyi Sesusi evetumine tyokuyandyanesa oviwa ovipe mouye auho. Menima 47 Pomuvo wa Kilisitu, Ovakwa-Kilisitu mo Andiokiya avatumu o Paulu na Mbalanambee vakaivise. Ovaivisi ovo vevali avakaivisa movilongo vyo Asiya Menor, ko Ndelembe noko Lisitala noko Ikoniu.

O Paulu na Mbalanambee avalongesa ovanthu ovanyingi, ovahona, novahepi, novana, novakulu. Ovanthu ovanyingi avetavela otyili konthele ya Kilisitu. Etyi o Paulu na Mbalanambee veli nokulongesa omutumini woko Sipele utiwa o Selesiu Paulu, omulume umwe wokwatambula ahande okuvetalameka. Paulu emupopila okuti: ‘Siovaa uyele etyi ulinga.’ Wati vala ivee otyipuka otyo, akala omumphoki. Etyi omutumini Selesiu Paulu etyimona, etavela ondaka ya Huku.

O Paulu na Mbalanambee ankho valongesila ponohika ambuho, tyilinge umbo-na-umbo, tyilinge momatapalo, no ponopalasa, no monondywo mbokufendela. Etyi vahakula omulume umwe otyilema ko Lisitala, ovanthu vetyimwene avasoko okuti o Paulu ono huku, avahimbika okuvefenda. Mahi o Paulu na Mbalanambee avevetalameka, avati: ‘Fendei vala Huku! Onthwe tuvanthu vala.’ Ova Sundaa vamwe aveya, avahongiliya ovanthu vayale o Paulu. Avavete Paulu nomamanya, avemuyumbu kondye yepunda-umbo, avemusi enthuvia. Mahi, Paulu ankho nkhele una omwenyo! Vakwavo ovalanduli va Sesusi aveya okumupola-po, avemutwala vali mokati kepunda-umbo. Pahe Paulu akondoka ko Andiokiya.

Menima 49 Pomuvo wa Kilisitu, Paulu akondoka vali ko Asiya Menor opo akatalele-po ovalanduli va Sesusi, akaivisa oviwa ovipe kovilongo ovikwavo mo Europa. Aende noko Atena noko Efesu noko Filipu noko Tesalonika, no kovilongo ovikwavo vali. Sila na Luka nomukwendye umwe utiwa o Timotiu avaende na Paulu moungendi wae. Avaundapela kumwe opo vakwateseko omawaneno okukala vali tyapama. Paulu wakalele enima notyihupe ko Kolindu nokupameka ovalanduli va Kilisitu. Evelongesa nokuvepameka, ahonekela omikanda omawaneno omanyingi. Ankho utunga omakaka. Etyi pakala, Paulu akondoka ko Andiokiya.

Menima 52 Pomuvo wa Kilisitu, Paulu alingi oungendi wa tatu, okuhimbikila ko Asiya Menor. Aende noko Filipu, konyima alauka noko Kolindu. Paulu akala omanima omanyingi mo Efesu, otyo alongesa, nokuhakula, nokukwatesako omawaneno. Tupu ankho ulinga omalongomona ononthiki ambuho mosikola imwe. Ovanthu ovanyingi avetavela, avapiluluka. Etyi ovanthu movilongo ovinyingi veiva oviwa ovipe, Paulu akondoka ko Selusalei.