Omuyungi Wokaleya Unoñgonoka Otyili

Mo Filipu ankho muna omuhikwena umwe omupika una otyilulu. Otyilulu otyo tyimukwatesako okutapesa. Vana aundapela otyo vamona onombongo ononyingi. Etyi oo Paulu na Sila vapita ko Filipu, omuhikwena oo evekwama-kwama ononthiki ononyingi. Nga evemona vala, otyilulu tyiliyavela atyiti: “Ovalume ava ovapika va Huku Omunene.” Onthiki imwe, Paulu apopila otyilulu okuti: ‘Menyina lya Sesusi tunda mwe.’ Otyilulu atyimutundu.

Etyi vana aundapela vetyimona okuti omuhikwena oo kevelingila vali onombongo, avanumana unene. Avatwala Paulu na Sila kovatumini, avati: ‘Ovalume ava kavekahi nokweendela movitumino, vekahi nokweetela epunda-umbo ovitateka!’ Ovatumini avatumu okuveta o Paulu na Sila, avevepake mokaleya. Omuyungi evetwala kuna kokwanthikovela unene, evekutu.

Ovanthu navo vokwali mokaleya, aveivi o Paulu na Sila vekahi nokuhilivika Siovaa noviimbo. Tyina tyiti mokati kovinthiki akuya otyinimawe, atyivete motyimato tyokaleya, omapito aaikuka. Etyi omapito aikuka, omalienge ankho vakutwa nao, aakutuluka. Wokuyunga kokaleya, amono okuti omapito eumbululu. Asoko okuti ononkhwatwa ambuho mbahena, akwate omutunga wae opo eliipae.

Etyi Paulu etyimona emupopila okuti: ‘Weheliipae! Atuho tuli muno!’ Omuyungi eya ponthele ya Paulu na Sila aikila konongolo. Evepulu okuti: “Oityi-vo ñgeno ndyilinga ndyikamone eyovo?” Avemupopila okuti: ‘Ove no vomeumbo liove yumbei onthumbi mu Sesusi.’ Paulu na Sila avemulongesa ondaka ya Siovaa, omuyungi oo wokaleya no vomeumbo liae avambatisalwa.