Paulu Utumwa ko Loma

Oungendi wa tatu wokwivisa wa Paulu wamanuhukila mo Selusalei. Akwatwa, apakwa mokaleya. Sesusi emumonekela kounthiki emuti: ‘Ove moende ko Loma, ngako ukaivisa.’ Avapolo Paulu ko Selusalei avemutwala ko Sesaleya, ngako akala omanima evali mokaleya. Etyi Paulu atwalwa komutumini Fesitu akapopie omphela yae, ati: ‘Nthwalei ko Loma ndyikakoyeswe na Sesale.’ Fesitu ati: ‘Mokonda wahanda okwenda ku Sesale, oko moende.’ Avakutu Paulu, avemupake mombapolo opo vemutwale ko Loma, o Luka na Alisitaluku avaende nae.

Etyi vati melunga, akumoneka epuku-puku enene, liakalele ononthiki ononyingi. Aveho avasoko okuti mavankhi. Mahi Paulu ati: ‘Oandyu imwe yamphopila mondyoi okuti: “Wahatile owoma Paulu. Ove mohiki ko Loma, ovanthu aveho muna-vo mombapolo mavahupu.” Kalei tyapama! Onthwe kamatunkhi.’

Epuku-puku alikala ononthiki 14. Tyina vakati ñgaa eheke limoneka. Ankho okalongo kekahi pokati komeva katiwa o Malata. Ombapolo ailitwala-twala, aiteka-teka, mahi ovanthu 276 vali-mo avahupu. Tyati vamwe avayoo, ovakwavo avakwatelela movinthimbu viombapolo. Ovanthu voko Malata avevetambula nawa, avanthiakana otupia opo vaandulukwe.

Etyi pakala onohanyi ononthatu, ovakwa-vita avatwala Paulu ko Loma nombapolo onkhwavo. Etyi vehika, Ovakwa-Kilisitu aveya ku Paulu velimone-po. Etyi Paulu evemona, apandula Siovaa, akala tyapama. Namphila Paulu akwatelwe, mahi ankho uli mondywo yae mwene otyo ayungwa. Akala-mo omanima evali. Ovanthu ngavekemutala, uvelongesa etyi tyayemba Kouhamba wa Huku, neetyi tyayemba ku Sesusi. Paulu ahonekela omikanda omawaneno o Asiya Menor noo Sundaa. Paulu wapopile oviwa ovipe kovilongo ovinyingi ngeetyi atuminwe na Siovaa.