Ovipuka Swau Amwene

Pweetyi omutumwa Swau eli mokaleya pokalongo kakala pokati komeva katiwa o Patamu, Sesusi wemulekesile ovipuka vina 16 mavikamoneka komutwe. Ovipuka ovio, vialekesile oñgeni enyina lya Siovaa malisukukiswa, oñgeni Ouhamba wae mauya, etyi ahanda atyilingwa pano pohi ngeetyi tyalingwa keulu.

Motyipuka Swau amwene, wamwene Siovaa uli kotyipundi tyae tyomunkhima, uli pokati kovakulu 24 vavala ovikutu vitwela nomilami vioolu. Tupu wamwene omiliakulo vialiaima, eivi omutitimo utundilila kotyipundi tyoutumini. Ovakulu 24 avelinyongamena komutwe wa Siovaa otyo vemufenda. Motyipuka otyikwavo, Swau wamwene ovanthu ovanyingi-nyingi vatunda movilongo aviho, momihoko aviho, nomalaka aeho vafenda Siovaa. Sesusi, oe omunthita wavo, ukahi nokuvehongolela komaande omwenyo. Motyipuka otyikwavo, amono vali Sesusi wakala Ohamba utumina keulu kumwe novakulu 24. Pahe Swau amono vali Sesusi ukahi nokulwisa enyama enene, Satanasi, novilulu viae. Sesusi evetahulila pano pohi.

Swau amono Ondyona kumwe novanthu 144.000 vetai Komphunda Siyau. Tupu amono oandyu imwe ikahi nokunthanana peulu, otyo ipopila ovanthu pano pohi vakale nonthilo na Huku, nokumunkhimaneka.

Motyipuka otyikwavo amwene, amono ovilwa vyo Alumangendon. Movilwa ovio, Sesusi novita viae, veli nokulwa na Satanasi navana vahula kwe, ovo Satanasi avatili-ko. Motyipuka tyahulilila Swau amwene, amono okuti ovipuka keulu no pohi vili nawa, viaviuka. Satanasi nombuto yae vahanywa-ko. Aveho vakala keulu na pano pohi vena onthilo nenyina lya Siovaa, oe vala vafenda.