POKULONGESA OMUNTHU ALINGE OMULONGWA
ELONGESO 12
Mupopila Wehemuholeke
Etyi Ombimbiliya ipopia: “Okuviyula omunthu ohemuholeka, oupanga utuka-po uhambukiswa omutima, wafwa omulela, wafwa ombao inika nawa.” — Omih. 27:9.
Oityi Sesusi Alingile?
1. Tala OVINDIU, okuti hatyo, tanga Maluku 10:17-22. Pahe haa osoko komapulo aa:
Oviwa patyi Sesusi amwene momukwendye una omuhona?
Oityi Sesusi esukisile umwe okukala nolwembia, nokukola omutima etyivile okupopia nomukwendye una ehemuholeka?
Oityi Tulilongesila ku Sesusi?
2. Pokupopia nomulongwa wetu, tuna okupopia nolwembia, mahi atwehemuholeka, na tumukwaseko ekule motyili.
Hetekela Sesusi
3. Kwatesako omulongwa wove apange evi ena okulinga, evilingi.
Tompholei nomulongwa wove apa pokwati: “Hetekela Okulinga Ñgaa” momukanda Kalako Nomwenyo Apeho!
Kwatesako omulongwa wove etyimone etyi ena okulinga etyivile okulinga etyi apanga, tyilinge etyi apanga okulinga pahetyino, tyilinge etyi ahanda okukalinga haa komutwe.
Apeho tyina wamatale una etyi alinga-ko, mupandula.
4. Tala otyityi tyina nokutyika omulongwa wove ehekule motyili, omukwatesako.
Lipula ñgaa:
‘Oityi tyina nokutyika omulongwa wange ehehike kokumbatisalwa?’
‘Oityi ndyina okulinga ndyimukwateseko?’
Likwambela, oiti Siovaa ekukwateseko ukole omutima na utyivile okupopila omulongwa wove etyi ena okulinga ohemuholeka, mahi opopi nolwembia.
5. Ou wehena nokukula motyili, muyeka-po.
Opo utyimone ine omulongwa wove una umwe nokukula, lipula ñgaa:
‘Uli umwe nokweendela mweetyi elilongesa?’
‘Wenda komaliongiyo? Upopila vakwavo etyi elilongesa?’
‘Ine mwahimbika-le okulilongesa kohale, okuti pahe nae wahanda umwe okulinga Ombangi ya Siovaa?’
Ine utala ñgaa kena nokukula motyili, linga ñgaa:
Tomphola nae atale otyityi tyina nokumutyika.
Mupopila omokonda yatyi wahamemulongesila vali, mahi opopi nolwembia.
Mupopila etyi ena okulinga ine haa wahanda okulongesiwa vali.