Onalupi Ouhamba wa Huku Mauya?

“TATEKULU, okuti o momuvo uno mopindulapo Ouhamba wo Isilayeli?” (Atos 1:⁠6) Ono apostolu vahandele unene okunoñgonoka onalupi Jesus mavialeka Ouhamba wae. Hono, papitale omanima 2.000, mahi nkhele ovanthu vahanda unene okunoñgonoka: Onalupi Ouhamba wa Huku mauya?

Mokonda osapi yovilinga via Jesus viokuivisa ankho Ouhamba wa Huku, ove upondola okutavela okuti Jesus wapopile konthele yepulo olio. Tyotyili, wapopile! Jesus wapopile unene konthele yomuvo maulekesa okuti ‘oe weyale.’ (Mateus 24:​37) Omuvo watyo ankho maulekesa okuti Jesus weyale, welikuata kumue nomuvo wokuvialekua Kuouhamba wa Mesiya. Omuvo oo, uhangununa tyi? Tutalei ononthele ononkhuana mbo Mbimbiliya mbulekesa okuti Kristu weyale.

1. Kristu ankho mahimbika okutumina tyina pamapiti omanima omanyingi konyima yononkhia mbae. Jesus wapopile ongeleka imue omu elieleka nomulume umue ‘walinga oungendi kotyilongo tyimue kokule opo akapewe ounene wokutumina,’ ine ‘ouhamba.’ (Lucas 19:​12) Oñgeni ongeleka oyo yafuiswapo? Tyotyili, Jesus wankhia iya atutiliswa, alingi oungendi ‘kotyilongo tyimue kokule,’ keulu. Ngetyi Jesus apopile mongeleka oyo, oe ankho makondoka vala nounene wokutumina ‘tyina palamba omuvo omunyingi.’​—⁠Mateus 25:⁠19.

Etyi papita omanima amue tunde etyi Jesus alonda keulu, apostolu Paulu wahoneka okuti: “Omulume oo [Jesus] waava otyilikutila tyike vala tyaapeho pala ononkhali, apumphama kokulio kua Huku. Okupolelela opo, akevelela alo onondyale mbae mbupakwa pombuelo yonomphai mbae.” (Hebreus 10:​12, 13) Moluotyo, omuvo wokukevelela wahimbika etyi Jesus ehika keulu. Omuvo oo, wokukevelela wapua etyi Jeova Huku avialeka Omona wae Kouhamba wa Mesiya, walaelue kohale. Kristu weyale okuhimbikila pomuvo watyo opo. Okuti ovanthu pano pohi vetyimona etyi Jesus avialekwa Kouhamba?

2. Ovanthu kavetyimuene etyi Jesus avialekwa Kouhamba. Hinangela okuti Jesus wapopile enyingilikilo malilekesa okuti weyale. (Mateus 24:⁠3) Inkha ovanthu ankho mavetyimono etyi Jesus mavialekwa Kouhamba, okuti ñgeno tyesukisa vali enyingilikilo? Mongeleka: Sokolola ñgeno ukahi nokulinga oungendi opo ukatale enyana. Ove pamue uluete omanyingilikilo ekahi nokukuyulika ondyila. Mahi okuti tyina wehika penyana, pahe watalama omeva otyo ekuveta konomphai, nkhele mokevelela vali okumona evai enene liahonekwa okuti ‘Eli Enyana’? Au! Okuti tyesukisa vali enyingilikilo pala okulekesa etyi ulueteale nomaiho ove?

Etyi Jesus apopia enyingilikilo malilekesa okuti oe weyale, ankho kekahi nokupopia etyi ovanthu vapondola okutala nomaiho avo. Ankho upopia enyingilikilo malivekuatesako okuimbuka etyi matyikapita keulu. Moluotyo, Jesus wapopia okuti: ‘Ouhamba wa Huku kamauya monkhalelo imoneka komaiho ovanthu.’ (Lucas 17:​20) Mahi, oñgeni ankho enyingilikilo olio malilekesa kovanthu pano pohi okuti Kristu wahimbikale okutumina?

3. Ononkhumbi ononene pano pohi, ankho ombo mambulekesa okuti Jesus weyale wahimbika okutumina. Jesus wapopile okuti ovita, nondyala, novinimawe, nomauvela, nokuhetavela ovitumino, mavikalekesa okuti Jesus weyale wahimbika okutumina ngo Hamba keulu. (Mateus 24:​7-12; Lucas 21:​10, 11) Oityi ankho matyieta ovitateka ovio aviho? Ombimbiliya yati Satanasi, ‘omutumini wouye uno,’ una onyengo onene mokonda utyii okuti Kristu wahimbikale okutumina iya okamuvo kae kesalako kakehi. (João 12:31; Revelação [Apocalipse] 12:​9, 12) Hono tuluete ovipuka vilekesa okuti Satanasi una onyengo onene, nokuti Kristu weyale wahimbika okutumina. Ovanongo mouye vanoñgonoka okuti onkhalelo yomuenyo wovanthu yapiluluka unene ouye auho, haunene okupolelela menima lio 1914.

Ovipuka ovio aviho, vimoneka ngoti ovivi, mahi haviviko. Mokonda vilekesa okuti Ouhamba wa Mesiya ukahiale nokutumina keulu. Apa katutu outumini oo, mauya okutumina kombanda yoohi aiho. Oñgeni ovanthu mavanoñgonoka Ouhamba watyo oo, opo vetavela okutuminwa noutumini oo?

4. Ovilinga viokuivisa vikahi nokulingwa mouye auho, vilekesa okuti Jesus weyale. Jesus wapopile okuti okuya kuae makukala ngo ‘kononthiki mba Noe.’a (Mateus 24:​37-​39) Noe katungile vala owato, tupu ankho wali ‘omuivisi wouviuki.’ (2 Pedro 2:⁠5) Noe walondolele ovanthu okuti ekoyeso lia Huku likahi popepi. Jesus wapopile okuti ovalanduli vae pano pohi, navo mavalingi ovilinga ngovio viokulondola ovanthu mokueenda kuoutumini wae tyina ameya. Jesus wati: “Onondaka ombu onongwa mbouhamba mambukaiviswa kombanda yoohi aiho, iya konyima akuya onthyulilo.”​—⁠Mateus 24:⁠14.

Ngetyi tuetyimona monthele yokualamba, Ouhamba wa Huku maukanyimako omautumini aeho ouye uno. Ovilinga viokuivisa vikahi nokulondola ovanthu okuti outumini oo wo keulu apa katutu mauya. Otyo, tyiavela ovanthu aveho omphitilo yokuhupa kehanyauno likahi nokuya, opo vakatuminwe Nouhamba oo. Mokonda apa katutu outumini wo keulu mauya okutumina kombanda yoohi. Pahe epulo liakolela olieli, Oityi ove molingi?

Okuti Ouhamba wa Huku, Kuove Onondaka Onongwa?

Jesus waivisile konthele yekevelelo limue lihaelekwa. Etyi Andau alinga onkhali omanima omanyingi kohale, Jeova Huku alae okuti mavialeka outumini umue maukatetulula otyitateka otyo. Outumini watyo oo, maukakondola ovanthu vekolelo konkhalelo yomuenyo Huku evehandelele tunde ponthyimbi, yokukala nomuenyo wahapu momphangu yombembwa pano pohi. Tyotyili, tyihambukiswa unene okunoñgonoka okuti outumini una Huku alaele kohale, ukahiale nokutumina keulu. Outumini oo, outumini wotyili, hatyihipululo ko vala!

Pahe, Ohamba yaholovonwa na Huku, ikahi nokutumina pokati konondyale mbae. (Salmo 110:⁠2) Mouye uno wovivi wokuayapuka ku Huku, Mesiya ukahi nokufwisapo etyi Tate yae ahanda. Ukahi nokuovola ovanthu aveho vahanda okunoñgonoka Huku, nokumufenda “nospilitu notyili.” (João 4:​24) Ovanthu vovivala aviho, ovakulu, novakuendye, novana, tyilinge vokuahepa ine ovahona, aveho vapondola okukevelela okukala nomuenyo wahapu moutumini Wouhamba wa Huku. (Atos 10:​34, 35) Tukahi nokukuavela ondundo opo utavele omphitilo ongwa ukahi nokupewa. Lilongesa pahetyino konthele Youhamba wa Huku, opo ukakale apeho nomuenyo moutumini oo wokuaviuka!​—⁠1 João 2:17.

[Onondaka Poutoi]