Oityi Tukevelela Komutue?
OKUVASA EKUMBULULO LIEPULO OLIO TYAKOLELA MOKONDA YATYI? Etyi ovanthu vakevelela komutue, tyitalelwa kuetyi vekahi nokulinga hono. Mongeleka, vana vehena ekevelelo enene komutue, vapopia okuti: “Tuliei, tunuei, mokonda muhuka matunkhi.” (1 Coríntios 15:32) Otyituwa otyo tyihole okutuala ovanthu kokulia unene, nokunwa unene, nokukala notyiho, katyiveetela ombembwa yotyotyili momutima.
Inkha ekevelelo lietu liakalele peke liovanthu, ñgeno tukevelela ovivi. Oohi, nomphepo tufuima, nomeva, vikahi nokusiliswa unene. Hono ovanthu vena owoma omunene wovita viomauta omanene, nomakongombanda ekahi nokuliyawisa nokutualako okuipaa ovanthu ovanyingi. Omauvela no luhepo, vikahi nokumonesa ononkhumbi ovanthu ovanyingi mouye auho. Mahi no ngotyo, nkhele kuna omahunga omawa pala okukala nekevelelo.
Namphila ovanthu vetupu epondolo liokupopia etyi matyikamoneka komutue, mahi, Jeova Huku ulipopia oe muene okuti “Una upopia unthyulilo tunde konthyimbi, ulekesa tunde kohale ovipuka nkhele vihenelingwe.” (Isaías 46:10) Oityi Jeova apopia konthele yekevelelo liovanthu?
Oityi Ombimbiliya Ipopia
Jeova kamayeke ovanthu noohi vihanyaunueko. Ombimbiliya ilaa okuti Huku “makaipaa vana vekahi nokuhanyauna oohi.” (Revelação [Apocalipse] 11:18) Jeova maundapesa Ouhamba wae, ine outumini wo keulu, opo anyimeko ovivi aviho kombanda yoohi, iya aetako onkhalelo ongwa ahandele ponthyimbi. (Gênesis 1:26-31; 2:8, 9; Mateus 6:9, 10) Onoversikulu mbo Mbimbiliya mambulandulako, mbutukuatesako okunoñgonoka etyi matyikamoneka komutue, mbupopia ovipuka mavikapita apa katutu kombanda yoohi.
Salmo 46:8, 9. “Endyuei mutale ovilinga via Jeova, oñgeni alinga ovipuka vihuvisa kombanda yoohi. Huku makamanako ovita alo kuna kuaoyela oohi. Uhanyauna ononkhondyi nokuteya-teya omaonga. Omatemba ovita weepaka otupia.”
Isaías 35:5, 6.“Komuvo watyo oo, omaiho ovamphoki maakapatuluka, omakutui onompholo maakahituluka. Komuvo watyo oo, otyilema matyikalombauka ngombambi, elaka liotyihita mulungu malikaimba no kukakwilila nehambu. Moluotyo mehoko mamukakala nonomphupa mbomeva, iya aekiliyandyana ofika yatyo aiho.”
Isaías 65:21, 22. “Mavakatunga onondyuo avakalamo, mavakatuika omiti avakalia ovinyango viatyo. Kavakatunga iya mukuavo ngae akakalamo, kamavakatuika iya mukuavo ngae ukalia.”
Daniel 2:44. “Iya kononthiki mbovatumini vatyo ovo, Huku yokeulu makavialeka ouhamba umue kamaukahanyaunuako vali. Ouhamba oo kamaukapita pomaoko elongo ekuavo. Maukahanyaunako omautumini atyo aeho no kukenyimako. Iya ouhamba watyo oo, ngao ukakalako apeho.”
João 5:28, 29. “Makuya omuvo umue iya aveho vekahi momalangalo mavekeiva ondaka ya [Jesus] avatundumo.”
Revelação [Apocalipse] 21:3, 4. “Muene Huku makakala navo. Iya makasekuna ononkhuka momaiho avo, ononkhia, nokulila, no nongembia kamavikakalako vali. Mokonda ovipuka ovio aviho mavikalamba.”
Oñgeni Omakumbululo Ombimbiliya Etuetela Ombembwa Yotyotyili Momutima
Ovanthu ovanyingi kavetavela kovipuka ovio viapopiwa pombanda. Mahi, ovipuka ovio o Huku wevilaa, kavilaelwe nomunthu. Ngue Jeova Huku “kakembe.”—Tito 1:2.
Inkha ulilongesa okuyumba onthumbi komilao via Huku, nokuendela movitumino viae, mokala nombembwa momutima, namphila pamue utumbukilwa nononkhumbi. Tyilinge ovita, oluhepo, nomauvela, alo umue ovitateka vitundilila kokukulupa ine ononkhia, natyike matyikupolo ombembwa yove apeho. Omokonda yatyi? Mokonda ove mokala nonthumbi yokuti Ouhamba wa Huku maukamanako ononkhumbi ombo ambuho.
Oñgeni mokala nekevelelo olio? Ove una “okupilulula omalusoke ove” opo wimbuke “ouwa wehando liafuapo lia Huku.” (Romanos 12:2) Ove mosukisa okunoñgonoka vali omalekeso omakuavo alekesa okuti omilao Viombimbiliya viayumbwa onthumbi. Okulilongesa konthele yotyo, tyesukisa okulinga ononkhono. Kavihi ovipuka ulinga momuenyo, vipondola okukuetela ombembwa onene momutima.
[Omalutalatu pefo 7, 8]
Oityi Ondaka ya Huku yapopia konthele yekevelelo lietu komutue?