O Armagedon Ovita Via Huku Mavikamanako Ovita Aviho
“Kovanthu votyilongo tyo Groenlandia, ovanthu okuliipaa pokati otyivi unene. Kovanthu ovo, ovita otyipuka otyivi unene. Tyitupu ondaka ityihangununa nawa melaka liavo.”—OMBO ONONDAKA MBOVANTHU VOMUHOKO WO INUIT KO GROENLANDIA, MBAPOPIWA NOMULUME UMUE WO KO NOROEGA UTIWA FRIDTJOF NANSEN, MENIMA 1888.
OLIE uhahande okukala motyilongo ‘tyihena ovita nokuyele ovita’? Olie uhahande okukala mouye uhena ondaka ovita, mokonda ovanthu mouye oo ovita kavevii? Ouye ngoo upondola okukala ngondyoi, haunene tyina tuyumba onthumbi yokuti ovanthu mavaeta ouye wombembua.
Anthi, meulo lia Isaia, Huku walaa okuti makaeta ouye watyo oo. Ombimbiliya yati: “Mavakanthila omitunga viavo omatemo, iya omaonga avo avekeenthila onofoso. Kamavekelilwisa vali, tupu kamavekelilongesa vali ovita.”—Isaías 2:4.
Tyotyili, hono mouye muna onomiliau 20 mbomasualali ekahi nokulwa, novita 20 vikahi nokupita. Iya otyo ñgeno tyapilululale unene onkhalelo yovanthu pala okufuisapo omulao oo. Mahi, katyihuvisa, okuti Jeova Huku wepondolo aliho, mekelipaka povipuka ovanthu vekahi nokulinga. Iya etyi Jeova makalinga matyikamanuhukila movita vina Ombimbiliya iihana okuti o Armagedon.—Revelação (Apocalipse) 16:14, 16.
Momanima o pahetyino ondaka “Armagedon,” vati ovita ovinene mavikalingwa novanthu ouye auho. Mahi, omukanda umue ulekesa oityi ondaka oyo tyotyili ihangununa. Wati: Armagedon, “Omphangu mapalingilwa ovilwa ovinene viahulililako viomasualali ouwa nomafualali ovivi.” Okuti ouwa maukafinda apeho ovivi, ine ovita viatyo ovio onoñgano vala?
Tupondola okupama omutima, mokutala okuti Ombimbiliya ipitaulula okupopia onthyulilo yovivi. Omuhoneki umue wono salmu wati, “Vokulinga ononkhali mavakanyimuako kombanda yoohi, iya onondingavivi kamambukakalako vali.” (Salmo 104:35) Omukanda wa Proverbio wati: “Ovaviuki mavakakala kombanda yoohi, iya vana vahavelwa onombei mavakatualako okukala kombanda yeheke. Anthi, onondingavivi mavakanyimuako kombanda yoohi, iya onongangala mavakatukuluako keheke.”—Provérbios 2:21, 22.
Tupu, Ombimbiliya ipopia nawa okuti onondingavivi kamavayekepo ovilwa viavo kombembwa vala. Moluotyo, tyesukisa Huku aete ovita viae viahulililako opo anyimeko ovita novivi aviho. (Salmo 2:2) Ovita ovio, vina enyina liakolela unene, Mombimbiliya litiwa Armagedon.
Kohale Ovita Ovinyingi Vialingaililwe Popepi no Megido
Ondaka “Armagedon” ihangununa okuti “Omphunda yo Megido.” Epundaumbo lio Megido kohale kumue Noluhandya luo Jezireele luokueliseta nayo, vina ehipululo liovilwa ovinene vialingaililwepo. Omulume utiwa o Eric H. Cline momukanda wae Ovilwa vio Armagedon, wahoneka okuti: “Mokueenda kuehipululo, o Megido Nevota lio Jezireele viali omphangu yovita ovinene viatokolele onkhalelo yovanthu.”
Ngetyi tyapopia Cline, ovita vialuilwa popepi no Megido ovikando ovinyingi, ankho viatokolele onkhalelo yovanthu. Omatolopa o Mongol okuafindile ovilongo ovinyingi vio Asia motyita 13, navo vafindilwe otyikando tyavo tyotete mevota liomphunda oyo. Tupu, omafualali o Britania ankho atuminwa na Edmund Allenby, afindilwe no va Turkia popepi no Megido, mokueenda kuovita viotete viouye auho. Omuhipululi umue etolopa, wati ovita Allenby afindile, ankho “viali ovita viavilapo unene nokuahasetele, mehipululo aliho liovanthu.”
Tupu, ovita viapopiwa Mombimbiliya ankho vialuililwe popepi no Megido. Omukoyesi Barake nae oko afindilile omatolopa o Kanaa ankho atuminwa na Sisera. (Juízes 4:14-16; 5:19-21) Gideau novalume vehehi 300 vala, tupu wafindile omatolopa omanyingi unene ova Midian, pofika opo. (Juízes 7:19-22) Ohamba Saulu nomona wae Jonatan, vankhila popepi Nomphunda Gilboa etyi omatolopa ova Filisteu afinda omasualali ova Isilayeli.—1 Samuel 31:1-7.
Mokonda omphunda Megido ikahi pomphangu imue ikahi nawa ku vana velilwisa, pofika opo kumue nevota liomphunda oyo, papitile ovilwa ovinyingi 4.000 yomanima konyima. Omuhipululi umue wavalula ovilwa 34 vialingililwe pofika opo!
Ehipululo liomphunda Megido nomphangu apa ikahi, otyilekeso tyelikuata nawa nondaka “Armagedon.” Namphila ondaka oyo imoneka vala otyikando tyike mo Mbimbiliya, mahi pokati konondaka ivasiwa momukanda wa Revelação, mbulekesa nawa okuti o Armagedon maikeya kovanthu aveho kombanda yoohi.
O Armagedon Ngetyi Tyapopia Ombimbiliya
Namphila popepi no Megido paluililwe ovita ovinyingi, navike viamanako ovivi. Petupu nawike wetyivilile okumanako onondingavivi ambuho. Ovita mavikamanako ovivi aviho, vina okutunda vala ku Huku. Jesus wapopile okuti, “kutupu omunthu omuwa, omuwa o Huku vala.” (Lucas 18:19) Tupu, Ombimbiliya haunene ipopia okuti o Armagedon ovita via Huku.
Omukanda wa Revelação Mombimbiliya, wati “ovatumini aveho kombanda yeheke” mavakaongololwa “pala ovita ovinene vionthiki ya Huku Wepondolo Aliho.” (Revelação [Apocalipse] 16:14) Omukanda oo wayauisako okuti: “Iya aveveongiya pomphangu imue itiwa o Har- Magedon,” ine Armagedon melaka lio Hebreu. (Revelação [Apocalipse] 16:16) Konyima, omukanda wa Revelação uhangununa okuti “ovatumini vo kombanda yoohi nomafualali avo mavakaongiyua opo valwise una wapumphama konkhambe nembamba liae.” (Revelação [Apocalipse] 19:19) Omulume ukahi konkhambe haumue vali, o Jesus Kristu.—1 Timóteo 6:14, 15; Revelação (Apocalipse) 19:11, 12, 16.
Otyityi tuanoñgonoka mono versikulu ombo? Tuanoñgonoka okuti o Armagedon ovita via Huku mavikanyimako ovanthu aveho vokuhetavela. Omokonda yatyi Jeova Nomona wae Jesus Kristu, mavakalingila ovita viatyo ovio? Omokonda yotyipuka tyike. O Armagedon “maikahanyaunako vana vekahi nokuhanyauna oohi.” (Revelação [Apocalipse] 11:18) Tupu, maikaeta ouye wombembua, “oohi omphe tukahi nokukevelela ngetyi [Huku] alaa,” muna “mamukakala ouviuki.”—2 Pedro 3:13.
Omokonda yatyi o Armagedon Yesukisila?
Okuti tyikupuiya okusoka okuti Jeova, “Huku yoluembia,” matumu Omona wae “Omutumini Wombembua,” okulinga ovita? (2 Coríntios 13:11; Isaías 9:6) Inkha unoñgonoka omahunga avo, matyikukuatesako okunoñgonoka omokonda yatyi mavalingila ngotyo. Omukanda wa Salmu uhipulula Jesus okuti ukahi konkhambe. Omokonda yatyi malwila? Omuhoneki wo salmu uhangununa okuti, “Kristu malwila otyili, nepoleyo nouviuki.” Oe makalwa mokonda uhole ouviuki, mahi uyele ovivi.—Salmo 45:4, 7.
Tupu, Ombimbiliya ipopia oñgeni Jeova atala ovivi eete hono mouye. Ombimbiliya imue yati: “Otyo TATEKULU wetyimona, iya atyimunumanesa mokonda kutupu ouviuki. Oe makavala ouviuki ngatyina otyiyakulilo tyotyivela tyomonthete, nepondolo liokuyovola ngatyina okapasete. Mekelivaleka ehando enene liokuviukisa ovipuka, makahitisa nokulwa nonkhongo mokonda yononkhumbi mbovanthu.”—Isaías 59:15, 17.
Putyina onondingavivi vatumina, ovaviuki kamavakakala nombembwa netuliyo. (Provérbios 29:2; Eclesiastes 8:9) Tyotyili, katupondola okuyapula omatutu novivi kovanthu vana vevilinga. Tupu, ombembwa yahapu nouviuki, maviya vala tyina onondingavivi mbamanyimuako. Salomau wahoneka okuti, “Onondingavivi ovo otyilikutila tyofeto yovaviuki.”—Provérbios 21:18.
Mokonda Huku oe omukoyesi, tupondola okukala nonthumbi yokuti, ekoyeso makalinga onondingavivi liaviuka. Abraiau wapula okuti, “Omukoyesi wouye auho kamakalinga etyi tyaviuka?” Mekumbululo apewa, Abraiau wanoñgonoka okuti Jeova apeho omuviuki! (Gênesis 18:25) Tupu, Ombimbiliya itulekesa okuti Jeova kahambukilwa ehanyauno liondingavivi; Utyilinga vala tyina omunthu ahahande okulivela.—Ezequiel 18:32; 2 Pedro 3:9.
Noñgonoka Okuti Armagedon Ovilwa Viotyotyili
Onthue matukakala konthele patyi movilwa ovio vionthyulilo? Otyinyingi puonthue tusoka okuti tukahi konthele ya vana valwila ouwa. Mahi, oñgeni matukala nonthumbi yokuti tyili tukahi konthele oyo? Omuuli Sofonia utulondola okuti, “Ovolei ouviuki, ovolei outendi”. (Sofonias 2:3) Apostolu Paulu wati, “Huku uhanda ovanthu aveho vayovolwe iya avakala nenoñgonoko liafuapo konthele yotyili.”—1 Timóteo 2:4.
Okulilongesa otyili konthele ya Jeova nehando liae liokunyimako ovivi kombanda yoohi, otyo otyipuka tyotete tuesukisa okulinga pala okuyovolwa. Tyavali, tyasukisa okuendela mouviuki opo tupandwe nokuamenwa na Huku.
Inkha tulinga ovipuka ovio viakolela, tupondola okutala okuti Armagedon, tyotyili ovita mavikamanako ovita viovanthu ouye auho. Putyina ovilwa ovio viamapu, ovanthu vatyo aveho mavakaimbuka okuti ovita otyipuka otyivi unene. Moluotyo, “nalumue vali ovanthu mavekelilongesa ovita.”—Isaías 2:4.
[Onondaka Mbavilapo pefo 3]
O Armagedon, ovita via Huku mavikanyimako ovivi viovanthu.
[Olutalatu pefo 4]
Gideau nomasualali ae vafindile ovilwa popepi no Megido
[Olutalatu pefo 4]
OMEGIDO
[Olutalatu pefo 5]
Tyina ovilwa ovio viamapu, ovanthu aveho mavakaimbuka okuti ovita otyipuka otyivi unene
[Olutalatu pefo 6]
Okulilongesa otyili konthele ya Jeova nehando liae, otyo otyipuka tyotete pala okuyovolwa