Oluembia Lua Huku Lutalelwa Koluembia Lua Ina Nomona Wae
“Omukai upondola okulimbwa olukembe lwae, ahakala nokankhenda nomona watunda meimo liae? Namphila ovakai vapondola okulimbwako, mahi, ame ove himekulimbwa.”—ISAÍAS 49:15.
OLUKEMBE luokuatyitwa pahetyino, lulitehelela nawa pomavoko a ina tyina elunyamisa. Omuvo watyo oo, o wokankhenda noluembia. Omukai umue utiwa o Pam wati, “Etyi nakuata olukembe luange luotete pomavoko ange, neiva oluembia nolukembe olo notyilinga mandyikala natyo konthele yae.”
Otyo okutyisoka nawa otyili, mokonda ovanongo konthele oyo, vati oluembia lua ina lukuatesako unene olukembe okukula. Omukanda umue Weongano Liomauvela Okomutue wati: “Ovipuka tuelilongesa vialekesa okuti ovana vokusiwapo ine vokuliyapuka no voina, vakala tyihena ehambu nokueliunga, pamue vakala alo umue nowoma.” Tupu, omukanda oo ulekesa okuti ovana vana vatekulwa noluembia nokuasuka navo tyina ovatutu, vakala vali unene nounongo wokusoka tyipona vana vahatekulilwe nawa.
Pala okulekesa okuti oluembia lua ina luakolela, Alan Schore omulongesi mosikola UCLA, (Universidade da Califórnia, em Los Angeles) ya vana vahakula vokuvela komutue mo Estadu Unidu, wati: “Oupanga wotete womona na ina, ukala elekeso litualako likemukuatesako momaupanga aeho makalinga na vakuavo.”
Anthi mokonda yonkhalelo yomuenyo isoyesa, nomauvela, ine ovitateka ovikuavo pamue ina kasuku namona wae ine “ulimbwa olukembe lwae.” (Isaías 49:15) Mahi, otyo haavehoko vetyilinga. Ovoina tyokukala noluembia novana vavo otyipuka vatungwa natyo. Ovanongo konthele oyo, vaimbuka okuti pomuvo wokukutula omukai una oumuhipa ulunda olutu opo momavele muye omahini. Oumuhipa oo aveho venao, tyilinge omukai ine omulume. Tupu, vetavela okuti oumuhipa watyo oo, una otyilinga tyokulunda omukai opo akale noluembia nolukembe luae.
Opi Kuatuka Oluembia?
Vana vokutavela ondongeso yokuti ovanthu vatuka kovinyama, valongesa okuti oluembia luotyotyili nga luna lukala pokati kaina nomona wae, luya vala aluike. Iya mokonda vati oluembia olo luya vala aluike, ovanthu velupaka nawa mokonda luetela ouwa vana vena oluembia olo. Mongeleka, omukanda Mothering Magazine wati: “Onthele yotete yowongo wetu iya vala aike, aikulu okuyawisila kowongo tuvasiwa nao vati tuapiñgana kovinyama tuatundilila. Tupu, vati oyo ituetela omalusoke. Onthele oyo yowongo vati oyo ikuatesako ovoina novana okukala nohole pokati kavo.”
Tyotyili, ounongo ulekesa okuti onthele imue mowongo, ina otyilinga tyakolela momalusoke etu. Mahi, okuti tyina utyitala kuove tyaviuka okupopia okuti oluembia ina ena nomona wae lueya vala aluike okutundilila mokawongo kotyinyama?
Tupu, nkhele soka vali. Ombimbiliya yati ovanthu vatungwa otyifuika tya Huku, nounongo wokulekesa ovituwa via Huku. (Gênesis 1:27) Otyituwa tyavilapo tya Huku, oluembia. Apostolu João wahoneka okuti: “Omunthu uhena oluembia, kenenoñgonoke Huku.” Omokonda yatyi? “Omokonda Huku oe oluembia.” (1 João 4:8) Tala okuti oversikulu ei yo Mbimbiliya kayatile Huku una oluembia. Anthi yati Huku oe oluembia. Huku oe Ondyivindyivi yoluembia.
Ombimbiliya ihangununa oluembia okuti: “Oluembia luapwa-elundo nokuna omutima omuwa. Oluembia lutupu ounkhuelume, kalulisape, kalulipake kounene, oluembia kalulingi ovivi, kaluovola okulinga ehando lialo muene, kalunumana. Oluembia kaluasukile nokulingwa omapita. Oluembia kaluhambukwa netyi tyahaviukile, anthi luhambukilwa otyili. Oluembia lulikuatesila movipuka aviho, lutavela ovipuka aviho, lukevelela ovipuka aviho, lukoleleya movipuka aviho. Oluembia kaluponyo nalumue.” (1 Coríntios 13:4-8) Okuti tyaviuka okutavela okuti otyituwa otyo tyokuapandwa ngotyo, tyeya vala atyike momunthu?
Oñgeni Otyo Tyikukalesa?
Puetyi watanga etyi oluembia luhangununa popalagrafu tualamba, okuti tyekuavela ehando enene liokulekesa komunthu umue ohole ngoyo? Katyihuvisa okukala nohole yatyo oyo. Omokonda yatyi? Omokonda “tuvana va Huku.” (Atos 17:29) Onthue tuatungwa opo tukale noluembia na vakuetu, iya navo avakala noluembia nonthue. Iya tupondola okukala nonthumbi yokuti Huku una oluembia olunene nonthue. (João 3:16; 1 Pedro 5:6, 7) Otestu yovihonekwa yapopiwa konthyimbi yonthele ino, ipopia okuti oluembia Huku ena nonthue olunene unene, tyipona lua ina nomona wae!
Pamue ulipula okuti: ‘Inkha Huku omunongo, una ononkhono ononene, noluembia, omokonda yatyi kamaneko ononkhumbi? Oityi ayekela ovana vankhie, nokuyeka ovanthu vatualeko okumoneswa ononkhumbi, nokuyeka oohi ihanyaunwe novanthu velulu?’ Oo, omapulo amue omawa, atokala omakumbululo aviuka.
Namphila pamue vokuhetavela okuti kuna Huku, vena omakumbululo avo konthele oyo, mahi upondola okuvasa omakumbululo aviuka nawa omapulo oo. Otyinyingi tyovanthu movilongo ovinyingi, vavasale omakumbululo atyo oo, mokulilongesa Ombimbiliya no Nombangi mba Jeova. Ovahoneki vomukanda ou, vekukonga opo nove ulilongese navo Ombimbiliya. Tyina ulilongesa Ondaka ya Huku novipuka atunga, enoñgonoko liove konthele ya Huku malitualako okuliyawisa. Moluotyo, ove moimbuka okuti Huku kekahi kokule, tyitavela okumunoñgonoka. Moimbuka okuti, tyotyili Huku kekahi “kokule na kese umue puonthue.”—Atos 17:27.
[Onondaka Mbavilapo pefo 8]
Oluembia Huku ena nonthue olunene unene, tyipona luna ina ena nomona wae