Lityilika “Ontheto Youye”

“Katuatambulile ontheto youye, anthi tuapewa ononkhono mba Huku.” —1 CORÍNTIOS 2:12.

1, 2. (a) Omokonda yatyi ovatumini vo Britania vatuminine okupaka oviila momatoto muheyua omamanya akolela? (b) Ovakristau vekahi pokati kotyiponga patyi?

MENIMA 1911, ovatumini vo Britania vaavele otyitumino tyimue, pala okukuatesako ovaundapi vaheya omamanya akolela. Kese metoto ankho muna okukala oviila vivali. Omokonda yatyi? Tyina metoto muamakuate otupia, vana vakayovola ovaundapi kese umue utyindapo okaila keke potyipepe, avalauka kohi yetoto. Oviila ovio viliyele nomphepo yahonya nomuihi wotupia oto. Inkha omphepo ina omuihi oo, oviila ovio vihimbika okusosoloka avitokela pohi. Iya olio elondolo liakolela unene. Mokonda omuihi oo kaumoneka komaiho, tupu kauniki, mahi kauyeke omphepo ongwa inyingile molutu. Inkha petupu etyi tyilondola ovayovoli, kavaimbuka omuihi oo, iya navo vapondola okunkhilamo.

² Tupu, Ovakristau vekahi monkhalelo ngo yovaundapi ovo. Ñgeni? Etyi Jesus aavela ovalongwa vae otyilinga tyokuivisa onondaka onongwa mouye auho, ankho utyii okuti ukahi nokuvetuma mouye utuminwa na Satanasi wokuna ontheto ombi. (Mateus 10:16; 1 João 5:19) Jesus ankho wasukalala unene novalongwa vae. Moluotyo, motyinthiki tyahulililako etyi ehenenkhie, welikuambelele ku Tate yae ati: “Ndyikuita, hapala uvepole mouye, mahi o pala uveyunge, mokonda yondingavivi”—João 17:15.

3, 4. Elondolo patyi Jesus aavelele ovalongwa vae? Elondolo olio liakolela pala onthue mokonda yatyi?

³ Jesus walondolele ovalanduli vae konthele yotyiponga ankho tyipondola okuveipaa mopamphepo. Onondaka mbae mbakolela unene pala onthue tukahi mononthiki mbahulilila mbouye uno. Walondola ovalongwa okuti: “Tualeiko okukala tyalunguka . . . opo muhupe kovipuka ovio aviho mavikeya, amukala lutai kolupala lwo Mona womunthu.” (Lucas 21:34-36) Otyo tyihambukiswa unene, tupu Jesus walaa okuti Tate yae mevepe ononkhono mbae opo mbuvevatele okuhinangela ovipuka valongeswa, nokutualako tyalunguka nokuapama.—João 14:26.

⁴ Iya hono oñgeni? Okuti na hono ononkhono ombo mbupondola okutukuatesako? Inkha mbutuvatela, oityi tuna okulinga opo tumbupewe? Ontheto youye otyityi? Oñgeni ihongiliya ovanthu? Iya oñgeni matutyivili okulityilika ontheto youye?—Tanga 1 Coríntios 2:12.

Ononkhono mba Huku ine Ontheto Youye?

5, 6. Oñgeni ononkhono mba Huku mbutuvatela? Oityi tuna okulinga opo tutambule ononkhono ombo?

⁵ Huku kaavele vala ononkhono mbae kotyita tyotete, no hono wava. Iya ononkhono mbae mbupondola okutupameka opo tulinge etyi tyaviuka, nokulinga ovilinga viae. (Romanos 12:11; Filipenses 4:13) Tupu, ononkhono ombo mbutuvatela okukala novituwa oviwa, ngohole, noundalawa. Ovituwa ovio, onthele “yovinyango viopamphepo.” (Gálatas 5:22, 23) Mahi, Jeova Huku kaavela ononkhono mbae komafa vana vahahande.

⁶ Tyaviuka okulipula okuti: ‘Ame ndyipondola okutambula ononkhono mba Huku? Ombimbiliya ilekesa okuti kuna ovipuka ovinyingi tupondola okulinga. Otyipuka tyimue tyakolela no kuapepuka, okuita ku Huku ononkhono ombo. (Tanga Lucas 11:13.) Otyikuavo tyakolela, okulilongesa Ondaka ya Huku nokuendela monondonga mbayo. (2 Timóteo 3:16) Tyotyili, haveho vatanga vala Ombimbiliya vapewa ononkhono mba Huku. Mahi, tyina Omukristau wo tyotyili elilongesa Ondaka ya Huku, unoñgonoka nawa omalusoke ondaka oyo. Tupu, tyakolela tutavele okuti Jeova waholovona Jesus opo akale omutumwa Wae. Iya menyina liae, Huku wava ononkhono mbae. (Colossenses 2:6) Ngotyo, onthue tuhanda okuhetekela ongeleka ya Jesus nokuendela muetyi alongesa. (1 Pedro 2:21) Tyina tulinga ononkhono mbokukala nga Kristu, tupu matutambula vali ononkhono mba Huku.

7. Oñgeni ontheto youye ihongiliya ovanthu?

⁷ Anthi, ontheto youye ihongiliya ovanthu opo vakale novituwa ngo via Satanasi. (Tanga Efésios 2:1-3.) Ontheto youye ihongiliya ovanthu mononkhalelo ononyingi. Ngetyi onkhalelo yovanthu hono ilekesa, ontheto youye ihongiliya ovanthu okuanya ovitumino via Huku. Ivehindila okukala “nepeleyo liolutu, nepeleyo liomaiho, nokulisapa mokonda yomalumono omunthu ena.” (1 João 2:16) Ivehindila okulinga ovilinga violutu, ngo maumbalehi, nokufenda ovihuku, no maumbanda, no onkhi, nonyengo onene, nomaunkholwa. (Gálatas 5:19-21) Tupu, ihongiliya ovanthu okulongesa ounkhembi, okupililika etyi tyikahi mondaka ya Huku. (2 Timóteo 2:14-18) Tyina omunthu eliyekelela okuhongiliyua novituwa viomouye, ukala nga Satanasi.

8. Oityi atuho tuna okuholovona?

⁸ Katupondola okukala kokule nomahongiliyo omavi. Kese munthu una okuholovona oityi matyitumina omuenyo wae, ononkhono mba Huku ine ontheto youye. Vana vekahi hono nokutuminwa novituwa viouye, vapondola okuyovokamo, avetavela ononkhono mba Huku opo mbuhongolele omienyo viavo. Anthi, tupu vana vahongolelwa nononkhono mba Huku, vapondola okuhongiliyua novituwa viouye. (Filipenses 3:18, 19) Tutalei oñgeni tupondola okulityilika kovituwa viomouye.

Imbuka Omanyingilikilo Otete Elondolo

9-11. Omanyingilikilo patyi amue apondola okutulondola okuti tukahi nokutokela montheto youye?

⁹ Ovaundapi vapopiwa tete vokuheya omamanya akolela ko Britania, ankho vakala noviila vivevatela okuimbuka enyingilikilo liotete liomphepo ombi. Inkha umue umona okaila katokela pohi, wimbuka okuti wesukisa okutundamo liwa opo ahupe. Iya onthue Vakristau, omanyingilikilo patyi otete maalekesa okuti tukahi nokuhongiliyua nontheto youye?

¹⁰ Etyi tuahimbika okulilongesa otyili tyo Ndaka ya Huku, nokupakula omienyo vietu ku Jeova, tyafuile ankho tutanga Ombimbiliya nombili. Ankho tulikuambela unene apeho. Ankho tuhambukilwa okuenda apeho komaliongiyo ewaneno, mokonda ankho tutyii okuti etupameka, ekahi ngo ndyivindyivi yomeva tyina omunthu ankhia ohunga. Otyo tyetuvatela okuyekapo ovituwa viouye, nokutualako okulityilika vio.

¹¹ Okuti no hono tutualako okutanga Ombimbiliya kese nthiki? (Salmo 1:2) Mahi, okuti tulikuambela apeho, nokuelinga umue nomutima auho? Okuti tuhole omaliongiyo ewaneno, nokukalapo puaeho etano alingwa mosimano? (Salmo 84:10) Ine vimue povituwa ovio oviwa, pamue tueviyekapo? Pamue tuna ovilinga ovinyingi, vitumana omuvo no nonkhono, iya pahe tyitupuiya unene okutualako notyituwa otyiwa tyokutanga nokuenda apeho komaliongiyo. Inkha vimue povituwa ovio oviwa tueviyekapo, okuti tukahi nokuhongiliyua nontheto youye? Okuti pahe matulingi ononkhono ononene, opo tupindulepo ovituwa ovio oviwa ankho tuna?

“Uhakale Nalumue Nelelele”

12. Jesus wapopilile ovalongwa vae “valunguke” natyi? Omokonda yatyi?

¹² Oityi vali tupondola okulinga opo tulityilike ontheto youye? Etyi Jesus alondola ovalongwa vae opo “vatualeko tyalunguka,” ankho wevelondolele vala konthele yoviponga vimue. Oe wati, “Liyungei nawa opo omitima vienyi vihakale nelelele liokulia unene, nokunwa unene, no kusukalala novipuka viomuenyo, iya onthiki oyo aimuhupula ngeliva.”—Lucas 21:34, 35.

13, 14. Omapulo patyi tuesukisa okulipula konthele yokulia nokunwa?

¹³ Pahe soka kelondolo olio. Okuti Jesus wailika ehambu liokulia nokunwa? Au! Mokonda oe ankho wii nawa onondaka mba Salomau mbati: “Nanoñgonoka okuti ovanthu vetupu natyimue otyiwa, tyipona okuhambukwa nokulinga oviwa mokueenda kuomuenyo wavo. Tupu, nanoñgonoka okuti omunthu ulia unwa, ahambukwa mokonda yovilinga viae aundapa no nonkhono. Otyo, otyali tya Huku.” (Eclesiastes 3:12, 13) Jesus ankho utyii okuti ontheto youye, ihongiliya ovanthu okulia unene nokunwa unene.

¹⁴ Oñgeni matunoñgonoka okuti ontheto youye kaikahi nokuhongiliya okulia unene nokunwa unene? Tupondola okulipula okuti: ‘Oñgeni ndyilinga tyina natanga mo Mbimbiliya ine omikanda vieongano vipopia konthele yokutonga? Okuti ndyiovola okuanya elondolo olio, okusoka okuti lialema ine pamue ndyiliamena?a Oñgeni ndyitala omalondolo konthele yokupola pokati kovikunwa vikoleswa, nokulityilika “omaunkholwa”? Okuti ndyitomba omalondolo oo, okusoka okuti kaekahi nokupopia konthele yange? Tyina vakuetu vapopia konthele yonkhalelo yange yokunwa, okuti ndyiliamena ine ndyinumana? Okuti ndyihindila vakuetu okuhesuku nomalondolo oo Ombimbiliya?’ Ovipuka omunthu alinga, vilekesa inkha ukahi nokuhongiliyua nontheto youye.—Romanos 13:11-14.

Lityilika Okukala Tyahitakana Nomasukalalo

15. Jesus walondola konthele yotyituwa patyi tyovanthu?

¹⁵ Otyikuavo tyituvatela okulityilika ovituwa viouye, okuliyunga komasukalalo. Jesus ankho utyii okuti ovanthu ovakuankhali, vena eyembelo liokusukalala novipuka viouye. Noluembia apopila ovalongwa okuti: “Yekeipo okukala tyasukalala.” (Mateus 6:25) Mahi, onthue tuesukisa okusukalala novipuka viakolela unene, ngo kuhambukiswa Huku, okufuisapo otyilinga tyetu tyo Vakristau, nokutekula ombunga. (1 Coríntios 7:32-34) Oityi tupondola okulilongesila kelondolo lia Jesus?

16. Oñgeni ovituwa viouye vikahi nokuhongiliya ovanthu ovanyingi?

¹⁶ Ovituwa viouye, haunene okulisapa mokonda yovipuka omunthu ena, vihongiliya ovanthu ovanyingi, okukala nomasukalalo eheveetela ouwa. Ouye uhanda tutavele okuti onombongo ondyakulilo, nokuti ounene womunthu utalelwa kolumono ena, ha kovituwa oviwa vio Vakristau. Vana vayondyua nomalosoke oo, vakala ovapika vokuovola omalumono nokusukalala apeho nokulanda ovipuka ovipe, novinene vali, vina ovanthu vasukalala vali navio. (Provérbios 18:11) Okukala nomalusoke ngoo konthele yomalumono, tyieta omasukalalo ahitakanesa omunthu okukula mopamphepo.—Tanga Mateus 13:18, 22.

17. Oñgeni matulityilika okuhitakaneswa nomasukalalo?

¹⁷ Matulityilika okuhitakaneswa nomasukalalo, inkha tutavela etyi Jesus atuma. Wati, “Tualeiko okuovola tete ouhamba nouviuki wa [Huku].” Jesus wati inkha tulinga ngotyo, ovipuka vina tuesukisa tyili, matuviyawisiluako. (Mateus 6:33) Oñgeni matulekesa okuti tyotyili tutavela omulao oo? Mohi omokuovola tete ouviuki wa Huku, okulandula etyi Huku ati tyaviuka, konthele yonombongo. Onthue katukembe tyina tufeta etyi kaputu aita, ine okukemba vala “katutu” monondando. Tuesukisa okulinga ononkhono mbokufeta etyi tuetavela, ine okufeta ongele, opo ondaka yetu “Yoo ikale umue yotyotyili”. (Mateus 5:37; Salmo 37:21) Namphila pamue okukala omukuatyili katyietela omunthu ouhona, mahi upandwa na Huku. Tupu, ukala nomutima wasukuka, nokutepulula unene omasukalalo ove.

18. Ongeleka patyi ongwa Jesus etuavela? Iya okumuhetekela matyituetela ouwa patyi?

¹⁸ Okuovola tete Ouhamba wa Huku, tyakutikinya okunoñgonoka oityi tyakolela vali momuenyo wetu. Tala ongeleka ya Jesus. Pamue ankho uvala ovikutu oviwa unene. (João 19:23) Ankho ulia nokunwa ovinyu kumue nomapanga omawa. (Mateus 11:18, 19) Mahi, ovitalukiso nokulimana ounye ovio vikahi vala ngovisimbulo momuenyo wae, ankho havioko okulia kuakolela kwe. Mokonda okulia kua Jesus, ankho okulinga ehando lia Jeova. (João 4:34-36) Tyina tuhetekela Jesus, tuvasa ondyambi ongwa momuenyo! Tukala nehambu liokuvatela vana vamona ononkhumbi okuvasa ekengelelo lio Mbimbiliya. Tukala nohole nokuvatela ewaneno. Haunene tuhambukiswa omutima wa Jeova. Inkha tuanoñgonoka nawa etyi tyakolela vali momuenyo wetu, omalumono novitalukiso, kamavituhongiliya. Anthi, ovipuka ovio mavituvatela vala okufenda Jeova. Iya tyina tuundapa vali unene movilinga Viouhamba wa Huku, ovituwa viouye kavituvili.

Tualako ‘Nomalusoke Opamphepo’

19-21. Oñgeni matutualako ‘nomalusoke opamphepo?’ Iya oñgeni matutyilingi?

¹⁹ Kese etyi tulinga, tutetekela okusoka. Tyina ovanyingi vati walinga otyipuka tyihasokele, otyo omalusoke opalutu. Moluotyo, apostolu Paulu utuhinangelesa okuti tuesukisa okuyunga onkhalelo yetu yokusoka. Wahoneka okuti: “Vana vayemba kovipuka violutu, vasoka kovipuka violutu, mahi vana vayemba ko viopamphepo, vasoka kovipuka viopamphepo.”—Romanos 8:5.

²⁰ Oñgeni matulityilika okuhongiliyua nouye, konthele yomalusoke etu novituwa vietu? Tuna okuholovona ovipuka tusoka, okulityilika haunene kovipuka vipopiwa mouye. Tyina tuholovona ovitalukiso, tuesukisa okulityilika ovinyano novipuka ovikuavo visilisa omutima, no kunkhimaneka omaumbalehi noungangala. Tuna nokuhinangela okuti ononkhono mba Huku mbasukuka, kambukala momutima wasila. (Salmo 11:5; 2 Coríntios 6:15-18) Tupu, matuiti ononkhono mba Huku mbukale momitima vietu, inkha tutanga apeho Ombimbiliya atusokolola nawa etyi tuatanga, nokulikuambela, nokuenda apeho komaliongiyo. Tupu, tuundapa nononkhono ombo, apeho tyina tuenda movilinga viokuivisa vio Vakristau.

²¹ Tuna okulityilika ovituwa viouye nomalusoke opalutu. Mahi, otyo tyihanda okulinga ononkhono, mokonda Paulu wati, “omalusoke opalutu, ononkhia, mahi okusoka kovipuka viopamphepo, tyieta omuenyo nombembwa.”—Romanos 8:6.

[Onondaka Poutoi]

Okuti Ove Utyihinangela?

• Oityi tuesukisa okulinga opo tupewe ononkhono mba Huku?

• Oityi tyipondola okutuhindila okukala novituwa viouye?

• Oñgeni matulityilika kovituwa viomouye?

[Olutalatu pefo 25]

Likuambela okuita ononkhono mba Huku tyina uheneende kovilinga ine o kosikola

[Olutalatu pefo 26]

Tuna okutualako nomutima wasukuka, mokulinga onondando onongwa, novituwa vipola pokati