Jesus Oityi Ovanthu Vapopia Konthele Yae
“Jesus wo ko Nazare . . . wiiwe nawa okuti omunthu wankhimana wali kouye.” —H. G. Wells, English historian.
“Kristu . . . oe vala aike wankhimana pokati ka aveho vankhimana vakalele kouye.”—Philip Schaff, Swiss-born theologian and historian.
OLIE wafuapo okuihanwa okuti omulume wavilapo waliko? Oityi tyilekesa ounene womunthu? Okuti ounongo wae movita? Ononkhono mbae ononene? Okuti omokonda yokuakola omutima? Ine utalelwa kovituwa, onondaka mbae, no ñgeni vikalesa ovanthu, nongeleka evesila?
Tala etyi ovanongo, novahipululi, novahoneki, no nonkhalamutue mbo pulitika no vakuavo vali mouye, vapopia kohale no hono konthele ya Jesus Kristu wo ko Nazare. Vati:
“Nkhuali mopilulula otyili opo wanye okuti Jesus omu Nazare, wankhimana unene movanthu aveho valiko.”—Reynolds Price, American writer and Bible scholar.
“Omulume umue ankho uhena onkhali, weliava oe muene otyilikutila pala ouwa wa vakuavo, alo umue onondyale mbae, iya akala otyilikutila tyofeto youye. Ankho otyilinga tyimue tyaviuka unene.”—Mohandas K. Gandhi, political and spiritual leader of India.
“Etyi ankho ndyimona, nalongeswa konthele Yombimbiliya nomukanda utiwa Talmud. Ame ndyi mu Judeu, mahi nahuva nenkhimano liomulume oo omu Nazare.”—Albert Einstein, German-born scientist.
“Kuame, Jesus Kristu Omona wa Huku, no Mona Womulume wokuankhimana omivo aviho, mehipululo liovanthu. Kese tyipuka apopia ine alinga, tyina esilivilo pala onthue. Mahi ove kupondola okupopia ngotyo konthele yomunthu omukuavo una omuenyo ine wokuankhia.”—Sholem Asch, Polish-born essayist as quoted in Christian Herald; italics theirs.
“Mokueenda kuomanima 35 omuenyo wange, ame ankho ndyi mu niilista, omunthu wehetavela natyike. Momanima 5 okualamba netavela okuti Jesus tyotyili omunthu waliko. Ame netavela elongeso lia Jesus Kristu, iya omuenyo wange auho wapiluluka.”—Count Leo Tolstoy, Russian novelist and philosopher.
“Onkhalelo yomuenyo wa [Jesus] yehika unene komitima viovanthu aveho kombanda yoohi, na hono ovanthu vatualako nokutavela.”—Kenneth Scott Latourette, American historian and author.
“Tusoka okuti ehipululo lio no evandyeliu onoñgano vala? Tyotyili, panga liange etyi katyimoneka okuti onoñgano. Anthi, ehipululo lia Socrates, una ovanthu vetavela okuti waliko, utupu ehipululo liahonekwa nawa ngo lia Jesus Kristu.”—Jean-Jacques Rousseau, French philosopher.
Tyayandyuluka nawa okuti, inkha kuna omunthu tuatokala okuhetekela momuenyo wetu, o Jesus Kristu. Paulu omulume ankho wokuatanga, no kuaholovonenwe na Jesus opo akale omulanduli Wae, nokupopila omalongo konthele Yae, wetulondola “okutala nawa” ku Jesus. (Hebreus 12:2; Atos 9:3) Oityi Jesus etulongesa konthele yokueendesa omuenyo? Oñgeni onkhalelo yomuenyo wae ikuvatela?