Okuti Ove ‘Umuumbili Uundapesa Okankhenda ka Huku Tuahatokalele’?
“Nohole youkuatate, kalei noluembia kese umue na mukuavo. Kalei ovatete kokulekesa ehumbilo kese umue na mukuavo.”—ROMANOS 12:10.
1. Ombatelo patyi tuvasa mondaka ya Huku?
ONDAKA YA HUKU ovikando ovinyingi itupopila okuti Jeova metuvatela tyina tuasoya ine tyina tuna ovitateka. Nkhele soka, konondaka ombu mbuungumanesa: “Jeova ukahi nokuavela ombatelo aveho vekahi nokutoka, nokukatula aveho velinyongamena.” “Oe ukahi nokuvelula vokuna omutima watekateka, ukahi nokukuta ovipute via vana vaihamenwa.” (Salmo 145:14; 147:3) Moluotyo, tate yetu keulu wapopia konthele yae okuti: “Mokonda ame, Jeova Huku yove, ndyikuata mokulio kuove, Una okupopila okuti: ‘Uhakale nowoma. Ame madyikukuatesako.’”—Isaías 41:13.
2. Oñgeni Jeova avatela ovaumbili vae?
2 Oñgeni Jeova, ukala keulu kuahamoneka, metukuate kokulio kuetu? Oñgeni etupindulapo tyina tuna omutima watekateka? Jeova Huku utuavela ombatelo mononkhalelo mbelikalela. Oe wavela ovanthu vae “ononkhono mbavilapo” mokuundapesa ospilitu sandu yae. (2 Coríntios 4:7; João 14:16, 17) Tupu ovaumbili va Huku veiva ononkhono ombo mbupameka, mbutundilila kondaka ya Huku Ombimbiliya. (Hebreus 4:12) Okuti nkhele kuna onkhalelo onkhuavo Jeova aundapesa opo etupameke? Ekumbululo tulivasa momukanda wo tete wa Petulu.
‘Huku Ulekesa Okankhenda Kae’
3. (a) Onondaka patyi konthele yovitateka Petulu apopia? (b) Omukanda wo 1 wa Petulu upopia konthele yatyi?
3 O Apostolu Petulu wahonekela Ovakristau ovanakwa okuti vena ehunga ewa liokuhambukwa mokonda yekevelo vena. Ayawisako okuti: “Namphila pamue hono mupondola okunumaneswa mokamuvo kehehi, mokonda yononkhumbi mbelikalaila mumoneswa.” (1 Pedro 1:1-6) Tala ondaka ei itiwa “mbelikalaila.”Otyo tyilekesa okuti ovitateka mavilikalaila. Mahi, Petulu kehulilile vala opo, okuyeka ovakuatate velipule inkha mavetyivili okufinda ovitateka ovio vielikalaila. Petulu walekesile okuti Ovakristau vapondola okukala nonthumbi yokuti Jeova mevekuatesako okufinda ovitateka aviho mavavasi. Omulao oo uvasiwa konthyulilo yomukanda wa Petulu, oku apopia konthele “yonthyulilo yovipuka aviho.”—1 Pedro 4:7.
4. Onondaka mba 1 Pedro 4:10 mbutuungumanesa mokonda yatyi?
4 Petulu wati: “Kese umue aundape nongelo apewa, pala okulivatela otyikati kese umue na mukuavo, ngovaumbili ovawa vaundapesa okankhenda ka Huku tuahatokalele, alekesa mononkhalelo mbelikalaila.” (1 Pedro 4:10) Petulu tupu wawana vali ondaka yokuati “mbelikalaila.” Oe wati, ‘ovitateka viya mononkhalelo ononyingi mbelikalaila, mahi tupu Huku ulekesa okankhenda kae tuahatokalele mononkhalelo ononyingi mbelikalaila.’ Onondaka ombo mbuungumanesa mokonda yatyi? Otyo tyilekesa okuti kese tyitateka tyitutumbukila, Huku malekesa okankhenda kae tuahatokalele pala okutuvatela. Monondaka mba Petulu, wetyimona oñgeni Jeova etulekesa okankhenda kae tuahatokalele? Uundapesa ovakuatate Ovakristau.
‘Livatelei Pokati Kese Umue na Mukuavo’
5. (a) Oityi kese Mukristau esukisa okulinga? (b) Omapulo patyi alingwa?
5 Petulu wapopila aveho mewaneno lio Vakristau okuti: “Kuaviho ovio, kalei nohole kese umue na mukuavo” Ayawisako okuti: “Kese umue aundapese ongelo apewa, pala okulivatela otyikati kese umue na mukuavo.” (1 Pedro 4:8, 10) Ngotyo kese umue mewaneno una yokupameka ovakuatate vae Ovakristau. Onthue tuapewa otyipuka tyimue tyakolela tya Jeova, iya tuna otyilinga tyoku tyitepulila vakuetu. Otyipuka otyo tyakolela tuapewa oityi? Petulu wati “otyiawa.” Otyiawa oityi? Oñgeni matutyiundapesa “pokulivatela otyikati kese umue na mukuavo”?
6. Oviawa patyi vimue Ovakristau vapewa?
6 Ondaka ya Huku yati: “Kese otyiawa otyiwa notyali tyafuapo, tyitunda keulu.” (Tiago 1:17) Oviawa aviho Jeova aavela ovanthu vae, elekeso liokankhenda kae tuahatokalele. Otyiawa otyinene Jeova etuavela ononkhono mbae. Ononkhono ombo mbutukuatesako okukala novituwa vihambukiswa Huku, ngohole, noundalawa, nepoleyo. Ovituwa viatyo ovio, vitulunda okukala nohole yotyotyili novakuatate, nokukala tyihena elundo liokuvevatela. Tupu, ononkhono mba Huku mbutukuatesako okukala nounongo wotyotyili nenoñgonoko. (1 Coríntios 2:10-16; Gálatas 5:22, 23) Ononkhono mbetu ambuho, nounongo, tuevipewa opo tuviundapese pala enkhimano nehiviliko lia Tate yetu keulu. Huku wetuavela otyilinga tyokuundapesa ounongo wetu novituwa oviwa, opo tulekesa kuvakuetu okankhenda ka Huku tuahatokalele.
‘Tyiundapesa pala Okuumbila’—Ñgeni?
7. (a) Ondaka “ongelo” ilekesa tyi? (b) Omapulo patyi tuesukisa okulipula, iya omokonda yatyi?
7 Tupu, Petulu wapopia konthele yoviawa tuapewa okuti: “Kese umue aundapese ongelo apewa.” Ondaka “ongelo” ilekesa okuti ovituwa oviwa nounongo, ovinyingi nokuelikalaila. Ngotyo, kese umue ukahi nokupewa ondundo ‘yokuundapesa otyiawa otyo [kese umue apewa] pala okulivatela kese umue na mukuavo.’ Mahi, ondaka yokuati ‘vaundapese otyiawa . . . ngovaumbili ovawa,’ otyitumino. Moluotyo, tuesukisa okulipula okuti: ‘Ndyikahi nokuundapesa ovipuka napewa opo ndyipameke ovakuatate?’ (Tyieleka na 1 Timóteo 5:9, 10.) ‘Ine ndyikahi nokuundapesa ounongo napewa na Jeova pala ouwa wange muene, okuovola omalumono, nomunkhima?’ (1 Coríntios 4:7) Inkha tuundapesa ovipuka tuapewa pala “okulivatela kese umue na mukuavo,” matuhambukiswa Jeova.—Provérbios 19:17; Tanga Hebreus 13:16.
8, 9. (a) Omononkhalelo patyi Ovakristau ouye auho vekahi nokuvatela ovakuatate? (b) Oñgeni ovakuatate no nomphange mewaneno lienyi velivatela kese umue namukuavo?
8 Ondaka ya Huku ipopia ononkhalelo ononyingi ovakristau votete vaundapesile pala okulivatela kese umue namukuavo. (Tanga Romanos 15:25, 26; 2 Timóteo 1:16-18.) Tupu, na hono Ovakristau votyotyili vatumwa okuundapesa nomutima auho etyi vapewa pala okupameka ovakuatate vavo. Nkhele tala ononkhalelo mbumue omu tyikahi nokulingwa.
9 Ovakuatate vamue vaundapa onoola ononyingi kese hanyi pala okupongiya ononthele mbomaliongiyo. Iya tyina vaava omakumbululo konthele yovipuka viakolela vavasa melilongeso liavo lio Mbimbiliya, vapameka aveho mewaneno pala okukoleleya. (1 Timóteo 5:17) Ovakuatate ovanyingi no nomphange veiwe nawa mokonda yohole nokankhenda vena novakuatate. (Romanos 12:15) Vamue vehole okutalailapo vokuasoya nokulikuambela kumue navo. (1 Tessalonicenses 5:14) Ovakuavo vahonekela ovakuatate Ovakristau vokuna ovitateka, pala okuvepameka. Nkhele ovakuavo vavatela nohole vokualemana, okuenda komaliongiyo ewaneno. Onombangi ovanyingi vekahi nokulinga ovilinga viakolela, viokuvatela okutunga onondyuo mbovakuatate mbahanyaunwa novipepe ovinene novinimawe. Ohole yotyotyili nombatelo yawa novakuatate ovo no nomphange, aviho otyilekeso ‘tyokankhenda ka Huku tuahatokalele, kalekeswa mononkhalelo mbelikalaila.’—Tanga 1 Pedro 4:11.
Otyipi Tyakolela Vali?
10. (a) Paulu ankho wasukalala novipuka patyi vivali movilinga via Huku? (b) Oñgeni matuhetekela Paulu hono?
10 Ovaumbili va Huku kavapelwe vala otyiawa tyokuvatela ovakuatate vavo, mahi tupu vapewa onondaka pala okulongesa ovanthu vakuavo. O apostolu Petulu tupu nae wanoñgonokele ovipuka ovio vivali movilinga viae viokuumbila Jeova. Oe wahonekelele ewaneno lio Efesu konthele “yotyilinga tyokuundapesa okankhenda ka Huku tuahatokalele” ankho apewa pala ouwa wavo. (Efésios 3:2) Tupu, wati: “tuapandwa okuti tuafuapo pala okutumwa onondaka onongwa.” (1 Tessalonicenses 2:4) Nga Paulu, nonthue tuanoñgonoka okuti tuapewa otyilinga yokuivisa Ouhamba wa Huku. Mokuundapa nombili movilinga viokuivisa, ngotyo tuhetekela Paulu wokuali omuivisi wehepuili wonondaka onongwa. (Atos 20:20, 21; 1 Coríntios 11:1) Onthue tutyii okuti okuivisa onondaka Mbouhamba wa Huku, matyiyovola omienyo. Tupu, tulinga ononkhono mbokuhetekela Paulu, mokuovola onomphitilo ‘mbokuavela otyiawa tyimue tyopaspilitu’ ovakuatate vetu.—Tanga Romanos 1:11, 12; 10:13-15.
11. Oñgeni tuesukisa okutala otyilinga tyetu tyokuivisa onondaka onongwa nokupameka ovakuatate vetu?
11 Povilinga ovio vivali vio Vakristau, otyipi tyakolela vali? Okulinga epulo ngolio, tyelifwa nokulipula konthele yotyiila okuti: Pomapapatelo evali otyiila, olipi liakolela vali? Ekumbululo kalipuiya. Otyiila tyesukisa omapapatelo evali opo tyityivile okunthanana nawa. Tupu, nonthue tuesukisa ononthele ombo onombali movilinga tulingila Huku, opo tukale Ovakristau vafuapo. Ngotyo, otyilinga tyetu tyokuivisa onondaka onongwa, nokupameka ovakuatate, havilinga vivali. Anthi, tuvitala ngetyi apostolu Petulu na Paulu ankho vevitala okuti viendela kumue. Omonkhalelo patyi?
12. Oñgeni tuundapa ngotyiti pomavoko a Jeova?
12 Onthue ovaivisi vondaka, tuundapesa kese ounongo tuna, opo tuhikiye komitima viovanthu onondaka Mbouhamba wa Huku. Ngotyo, tukevelela ovanthu ovo, vakale ovalongwa va Kristu. Mahi, tupu tuundapesa kese ounongo noviawa ovikuavo tuapewa, opo tulunde ovakuatate vetu no nondaka novilinga vivepameka—otyilekeso tyokankhenda ka Huku tuahatokalele. (Provérbios 3:27; 12:25) Okulinga ngotyo, tuvevatela opo vatualeko okukala ovalongwa va Kristu. Okuivisa ondaka kounyingi “nokulivatela otyikati kese umue namukuavo,” tyituavela elao ewa liokuundapeswa na Jeova ngotyiti pomavoko ae.—Gálatas 6:10.
‘Kalei Noluembia Luotyotyili Kese Umue na Mukuavo’
13. Inkha tuyekapo “okulivatela otyikati kese umue namukuavo,” matukala ñgeni?
13 Paulu walondolele ovakuatate vae okuti: “Nohole youkuatate, kalei noluembia kese umue na mukuavo. Kalei ovatete kokulekesa ehumbilo kese umue na mukuavo.” (Romanos 12:10) Okukala nohole novakuatate vetu, tyituavela ondundo yokuveundapela ngovaumbili vokankhenda ka Huku tuahatokalele. Onthue tutyii okuti inkha Satanasi etyivila okututyilika “okulivatela otyikati kese umue namukuavo,” ngotyo metuyapaula. (Colossenses 3:14) Iya inkha tukala tyeliyapauka, kamatukala vali nombili movilinga vietu viokuivisa. Satanasi utyii okuti wesukisa vala okututeya epapatelo like, opo tuyekepo okufuisapo otyilinga tyetu.
14. Olie upola esilivilo kovilinga vietu “viokulivatela otyikati kese umue namukuavo”? Popiapo ongeleka imue.
14 “Okulivatela otyikati kese umue namukuavo”, katyivatela vala una upewa okankhenda ka Huku tuahatokalele, mahi tyivatela na una uundapela mukuavo. (Provérbios 11:25) Nkhele tala ongeleka ya Ryan na Roni ovalinepi vo kotyilongo tyitiwa Illinois, ko Amelika. Veiva okuti otyinimawe tyitiwa Katrina tyahanyauna onondyuo ononyingi mbovakuatate Onombangi. Ohole novakuatate vavo yevehindila okuyekapo ovilinga viavo neumbo liavo, avalande ondyuo ikahi ngetemba aveihake ketukutuku opo vakalalelalemo, avalingi oungendi wo no kilometu 1,400 okuenda ko Louisiana. Oko vakalako enima aliho okuava omuvo wavo nononkhono, okuvatela ovakuatate vavo. Ryan, wokuna omanima 29 wati, “ovilinga ovio viambatela okufuena vali ku Huku. Namona oñgeni Jeova atekula ovanthu vae.” Ryan ayauisako okuti: “Okuundapa kumue novakuatate ovakulu, tyandongesa unene oñgeni tuna okutekula ovakuatate. Tupu, naimbuka okuti meongano lia Jeova muna ovilinga ovinyingi pala onthue vakuendye.” Omukai watyo Roni, wokuna omanima 25, wati: “Ame ndyipandula unene mokuaundapa movilinga viokuvatela vakuetu. Ndyina ehambu enene nehenekale nalio momuenyo wange. Ame ndyityii okuti mokueenda kuomanima, mandyitualako okupola esilivilo kongeleka oyo ongwa.”
15. Omahunga patyi omawa tuna, opo tutualeko okuivisa okankhenda ka Huku tuahatokalele?
15 Tyotyili, okutavela otyitumino tya Huku tyokuivisa onondaka onongwa, nokupameka ovakuatate, tyietela ouwa aveho. Vana tukuatesako vapama mopaspilitu, iya onthue tukala nehambu litunda vala kokuava. (Atos 20:35) Ohole mewaneno maitualako okuliyawisa, tyina kese umue akala nesuko na vakuavo. Tupu, ohole tuna pokati ketu na vakuetu, mailekesa nawa okuti Tuvakristau votyotyili. Jesus wati: “Ovanthu aveho mavaimbuka okuti muvalongwa vange inkha mukala neholelo pokati kenyi.” (João 13:35) Haunene, Tate yetu Jeova unkhimanekwa, tyina ovaumbili vae valekesa ehando liae liokupameka vana vesukisa. Tuna omahunga omawa unene okuundapesa etyi tuapewa “pala okulivatela otyikati kese umue na mukuavo, ngovaumbili ovawa vaundapesa okankhenda ka Huku tuahatokalele”! Okuti ove motualako okulinga ngotyo?—Tanga Hebreus 6:10.
Okuti Ove Utyihinangela?
• Omononkhalelo patyi Jeova apameka ovaumbili vae?
• Oityi tuapewa?
• Omononkhalelo patyi mbumue tupondola okuumbila ovakuatate vetu?
• Oityi matyituavela ondundo yokutualako okuundapesa etyi tuapewa pala ‘okulivatela otyikati kese umue na mukuavo’?
[Omalutalatu pefo 17]
Okuti ove uundapesa “etyi wapeua” opo uumbile vakuenyi ine opo ulihambukiswe ove muene?
[Omalutalatu pefo 19]
Onthue tuivisa onondaka onongwa ku vakuetu nokuvatela ovakuatate Ovakristau
[Olutalatu pefo 20]
Ovaundapi vayumbwa onthumbi, vatokala okupandwa mokonda velipakula nononkhono