Huku Olie?

OÑGENI ove ñgeno wakumbulula epulo olio? Vamue vasoka okuti vei nawa Huku, oe epanga liavo. Ovakuavo vasoka okuti Huku ukahi kokule unene. Ovo vetavela okuti Huku okuekahi mahi vei vala katutu konthele yae. Inkha ove utavela ku Huku, oñgeni ove ñgeno wakumbulula omapulo aa ekahi pombuelo?

1. Okuti Huku omunthu wotyotyili?

2. Huku una enyina?

3. Okuti Jesus o Huku Wepondolo Aliho?

4. Okuti Huku wesuka naame?

5. Okuti Huku utavela ononkhalelo ambuho mbokufenda?

Inkha wita vakuenyi vakumbulule omapulo oo, mavekuavela omakumbululo omanyingi elikalaila. Tyotyili, ovanyingi vena omalusoke omavi, nokupopia ounkhembi, konthele ya Huku.

Omokonda Yatyi Omakumbululo Akolela Unene

Puetyi Jesus Kristu ankho ekahi nokupopia nomukai umue utavela ku Huku avasile ponyombo, walekesile esuko liokunoñgonoka otyili konthele ya Huku. Omukai oo woko Samaria, ankho utyii okuti Jesus omuuli. Mahi, ankho pena otyipuka tyimue tyemusukalalesa. Ongeleya ya Jesus ankho yelikalela noyae. Etyi omukai apopia etyi ankho tyemusukalalesa, Jesus emupopila okuti: “Onue mufenda etyi muhei.” (João 4:19-22) Tyotyili, ngetyi tupondola okutala, Jesus walongesile okuti havehoko ovanthu vonongeleya vei Huku.

Okuti onondaka mba Jesus mbulekesa okuti nawike upondola okuiwa Huku? Au. Jesus wapopile omukai oo okuti: “Ovafendeli votyotyili mavakafenda Tate nospilitu, notyili, mokonda Tate ovo ekahi nokuovola opo vemufende.” (João 4:23) Okuti noove ukahi pokati kaava vekahi nokufenda Huku, “nospilitu notyili”?

Tyakolela unene pala ove okutala nawa ekumbululo liepulo olio. Mokonda yatyi? Jesus walekesile esuko liokukala nenoñgonoko liafuapo etyi elikuambela okuti: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.” (João 17:3) Tyotyili, opo ukakale nomuenyo komutue wandyila, wesukisa okukala nenoñgonoko liotyotyili konthele ya Huku!

Okuti upondola umue okunoñgonoka otyili konthele ya Huku? Enga, upondola! Mahi, oñgeni upondola okunoñgonoka otyili konthele ya Huku? Otyo, Jesus wetyipopile konthele yae muene: “Ame ndyila, ame tyili, ame muenyo. Nawike uya ku Tate ahapiti puame.” (João 14:6) Tupu apopi okuti: “Petupu ou wii Tate, Omona oe vala umui, iya Omona umuhololola kuvana ahanda.”—Lucas 10:22.

Osapi pala okunoñgonoka Huku matuivasi momalongeso a Jesus Kristu, Omona wa Huku. Moluotyo, Jesus wetulaa okuti: “Tyotyili muvalongwa vange, inkha mutualako okukala mondaka yange. Iya mamunoñgonoka otyili, iya otyili atyimuyovola.”—João 8:31, 32.

Mahi, oñgeni Jesus akumbulula omapulo etano alingwa pombanda?

[Olutalatu pefo 4]

Okuti tyotyili ove ukahi nokufenda Huku umue uhei?