Okuti Jesus o Huku Wepondolo Aliho?
Omakumbululo Ovanthu Vehole Okuava:
▪ “Enga, Jesus o Huku Yepondolo Aliho.”
▪ “Jesus wali elekeso lia Huku mopahitu.”
Oityi Jesus apopile?
▪ “Inkha munthyole, ñgeno muahambukwa mokonda mandyende ku Tate, mokonda Tate omunene vali kuame.” (João 14:28) Jesus wapopile okuti oe na Tate yae kavelifwile.
▪ “Ame mandyende ku Tate yange na Tate yenyi, ku Huku yange noku Huku yenyi.” (João 20:17) Jesus kapopile konthele yae muene okuti oe Huku, mahi, wapopile ngatyina Huku Omunthu welikalela.
▪ “Ame hapopile etyi nahanda, mahi Tate wokuanthuma wandongesa etyi ndyina okupopia noñgeni mandyipopi.” (João 12:49) Jesus kalongesile omalusoke ae muene, mahi walongesile omalusoke a Tate yae.
JESUS wapopile okuti Omona wa Huku, kapopile okuti oe Huku Wepondolo Aliho. Inkha Jesus o Huku, okulie ankho elikuambela etyi ekahi pano pohi? (Mateus 14:23; 26:26-29) Tyotyili, katyaviukile okusoka okuti Jesus ankho ukahi nokupopia konthele yae muene!
Etyi ovalongwa vevali va Jesus vemuita omphangu yakolela Mouhamba wae, oe wakumbulula okuti: “Okupumphama kokulio kuange nokokumbili kuange, hameko mandyityilingi, mahi o pala vana vaholovonwa na Tate yange.” (Mateus 20:23) Okuti Jesus ankho ukahi nokukemba etyi apopia okuti utupu epondolo olio? Au, kakembele! Anthi, nomutima weliola, wanoñgonokele okuti Huku oe vala una epondolo liokulinga etokolo olio. Jesus wapopile okuti pena ovipuka vimue oe, no noandyu vehei, mahi, viiwe vala na Tate yae.—Marcos 13:32.
Okuti Jesus ankho utavela vala ku Huku etyi ekahi pano pohi? Au. Ombimbiliya ipopia okuti alo umue etyi ankhia, iya atutiliswa watuaileko okutavela ku Huku. Apostolu Paulu utuhinangelesa okuti “omutue wa Kristu o Huku.” (1 Coríntios 11:3) Ombimbiliya itupopila okuti komutue wandyila “tyina ovipuka aviho viamapakua moutumini wae, konyima Omona makakala mombuelo youtumini wauna wemuavela ovipuka aviho, opo Huku akatumine ovipuka aviho.”—1 Coríntios 15:28.
Tyotyili, Jesus haeko Huku Wepondolo Aliho. Otyo aihanena Tate yae okuti “Huku yange.”—Revelação 3:2, 12; 2Coríntios1:3, 4.a
[Onondaka Pokatoi]
a Opo unoñgonoke vali nawa onthele oyo, tala pomafo 201-204 momukanda Oityi Ombimbiliya Tyili Ilongesa? Walingua no Nombangi mba Jeova.
[Onondaka Mbavilapo pefo 7]
Jesus wapopile okuti kuna ovipuka vimue oe, no noandyu vehei, mahi, viiwe vala na Tate yae