Omapulo Alingwa Novatangi

Okuti olukembe lunkhia tyina luhenetyitwe ine opokutyitwa, malukatutila?

Vana vehenenkhise olukembe, kavetyivili okusoka oluihamo lua vana vapita motyitateka otyo. Ovohe vamue valila unene tyina vamapiti motyitateka otyo. Omukai umue wankhisa ovana vetano puetyi nkhele vehenetyitwe. Etyi palamba omuvo umue, omukai oo akutula ovana vevali vakongoka nawa. Mahi, nkhele uhinangela ovana vae vetano vankhia. Mokueenda kuomuenyo wae, oe ankho usoka okuti inkha ovana vae vakalele nomuenyo, ñgeno pahe vekula. Okuti Ovakristau ovo vapondola okukala nekevelelo liokuti ovana vavo mavakatutiliswa?

Tyotyili, onthue katutyii. Ombimbiliya nalumue yapopile konthele yokututilisa omalukembe okuankhia puetyi nkhele vehenetyitwe ine vokuankhia konyima yokutyitwa. Mahi, Ondaka ya Huku ina onondonga mbutuala kepulo, nokutuetela epameko.

Tupopiei konthele yomapulo evali. Tete, komaiho a Jeova, omuenyo womunthu uhimbika nalupi, putyina olukembe lukahi meimo, ine tyina luamatyitwa? Vali, oñgeni Jeova atala olukembe luhenetyitue, ngomunthu ine ngo noselula vala mbukahi meimo liomukai? Ombimbiliya yaavela omakumbululo ayandyuluka konthele yomapulo oo.

Otyitumino tyapelwe Moisesi ankho tyilekesa okuti, omuenyo kauhimbika vala tyina olukembe luamatyitwa. Ñgeni ngotyo? Tyalekeswa okuti una wipaa olukembe lukahi meimo, nae una okuipawa. Tala otyitumino tyati: “Una okufeta omuenyo, nomuenyo.”a (Êxodo 21:22, 23) Moluotyo, olukembe lukahi meimo lia ina, luna omuenyo iya omunthu. Okunoñgonoka otyili otyo, tyikahi nokuvatela Ovakristau ovanyingi okulityilika kotyituwa tyokupolapo omaimo, vaimbuka okuti oyo onkhali onene ku Huku.

Tyotyili, omona ukahi meimo lia ina, una omuenyo. Mahi, okuti omuenyo oo, una esilivilo komaiho a Jeova? Otyitumino tuapopia pombanda, tyilekesa okuti omunthu upondola okuipawa inkha aipaa olukembe lukahi meimo. Tyayandyuluka nawa okuti, omuenyo wolukembe olo, luna esilivilo enene komaiho a Huku. Tupu, onotestu ononkhuavo, mbulekesa okuti Jeova utala olukembe luhenetyitue ngomunthu. Mongeleka Ohamba Davi wapopila Jeova okuti: “Wanthyoleka meimo lia me yange. . . . Omaiho ove amona etyi ankho ndyikahi meimo, iya ononthele ambuho ankho wembuhoneka momukanda wove, konthele yononthiki mbalingwa.”—Salmo 139:13-16; Jó 31:14, 15.

Tupu, Jeova utala okuti olukembe luhenetyitue luna ovituwa vielikalela, iya upondola okukala omunongo omunene komutue wandyila. Etyi Rebeka omukai wa Isake ali omulemi womapaha, Jeova wapopia eulo konthele yovakuendye vevali ankho vekahi nokulwa meimo liae. Otyo tyilekesa okuti Jeova ankho wamona muvo ovituwa mavakakala navio.—Gênesis 25:22, 23; Romanos 9:10-13.

Ehipululo konthele ya João Batista, tupu liakolela. O Evandyeliu ipopia okuti: “Etyi Elisabete eiva Maliya ukukunya, omona meimo liae ahomboka, iya Elisabete akala tyeyula ospilitu sandu.” (Lucas 1:41) Etyi ondotolo Luka apopia konthele yotyo, waundapesa ondaka yo Gregu ipondola okuundapeswa konthele yolukembe lukahi meimo lia ina, ine olukembe luatyituale. Oe tupu waundapesa ondaka oyo pala okupopia konthele yolukembe Jesus walangekua momutemba.—Lucas 2:12, 16; 18:15.

Okutala ononthele ombo ambuho no notestu, okuti Ombimbiliya ipungulula olukembe meimo lia ina, na luna liokuatyitwa? Au. Iya otyo tyelikuata netyi tyipopia ovanongo vomouye. Mongeleka, ovanongo vomouye velilongesa okuti, olukembe lukahi meimo lutehelela atyiho tyikahi nokupita kondye. Moluotyo, katyituhuvisa tyina ina ayawisa ohole yae kolukembe lukahi meimo liae.

Olukembe lutyitwa vala tyina pahe luekula nawa meimo lia ina. Tala ongeleka ei: Omukai umue wakutula olukembe etyi nkhele ehenetuukise onohanyi etyive, etyi palamba vala ononthiki mbumue olukembe alunkhi. Omukai omukuavo watuukisa umue onohanyi etyive, mahi, olukembe alunkhila meimo. Okuti omukai wotete una ekevelo lietutilo mokonda olukembe luae luatyitwa etyi nkhele ehenetuukise onohanyi etyive? Iya omukai wavali, okuti utupu ekevelelo olio mokonda olukembe luae luankhila meimo?

Monondaka mbehehi, Ombimbiliya ilongesa nokuayandyuluka nawa okuti omuenyo wolukembe luhimbika tyina ina amakala omulemi, iya Jeova utala omuenyo wolukembe luhenetyitue ngatyina omunthu. Mokonda yotyili otyo tyikahi Movihonekwa, vamue kavetavela okuti petupu ekevelelo nalike pala okututilisa olukembe luankhila meimo. Tyotyili, ovo vapondola okusoka okuti olusoke ngo olo kaluelikuatele notyili tulongesa tyikahi Movihonekwa konthele yokupolapo eimo.

Kohale omukanda ou walingile omapulo amue konthele yokututilisa omalukembe okuankhia puetyi nkhele ehenetyitue, iya omapulo oo, ngoti anguanguanesa ovanthu konthele oyo. Mongeleka, okuti Mouye Omupe Huku makapaka vali meimo lia ina omuenyo wolukembe luna luokuankhia? Ononkhalamutue mbo Nombangi mba Jeova, vakala omuvo omunyingi nokulilongesa, nokusokolola, nokulikuambela, iya avanoñgonoka okuti ehunga olio tyotyili, litupu esilivilo enene kekevelelo lietutilo. Jesus wapopile okuti: “Huku utyivila okulinga ovipuka aviho.” (Marcos 10:27) Ongeleka ya Jesus yalekesile otyili otyo, Jeova wapola omuenyo wae kuna keulu iya eupake meimo liomuhikuena omumphembela, otyipuka tyimue ovanthu vehevili okulinga.

Onondaka ombo ambuho mbapopiwa mbulekesa okuti Ombimbiliya ilongesa okuti ovana vokuankhia puetyi nkhele vehenetyitwe mavakatutiliswa? Onthue tualekesa nawa okuti Ombimbiliya kaikumbulula epulo olio, ngotyo tutupu ehunga pala okutualako okupopia okuti mavakatutiliswa. Okupopia konthele oyo tyipondola okukatula omapulo omanyingi, iya onthue tyotyili katuhande okupopia etyi tuhei. Onthue tuanoñgonoka okuti: Jeova Huku oe utyii etyi makalinga, mokonda una ohole onene, nokankhenda. (Salmo 86:15) Tyotyili, Huku uhanda unene okututilisa vana vokuankhia. (Jó 14:14, 15) Tupondola okukala nonthumbi yokuti Huku apeho ulinga etyi tyaviuka. Oe makaundapesa “Omona wae opo amaneko ovilinga aviho vie Liapu,” vikahi nokutumonesa emone hono.—1 João 3:8.

[Onondaka Poutoi]

[Olutalatu pefo 23]

Jeova makamanako ovipuka aviho vitumonesa emone