2 Kala Nenoñgonoko Liaviuka Konthele ya Huku

“Omuenyo wahapu oyou, okunoñgonoka ove awike Huku yotyotyili.”​—João 17:3.

OTYIPI OTYITATEKA? Vamue vapopia okuti kutupu Huku. Ovakuavo vetavela okuti Huku hamunthu, anthi, ononkhono vala ononene. Aveho vetavela okuti Huku omunthu wotyotyili, valongesa ovipuka vielikalela konthele yae novituwa viae.

OÑGENI OVE UPONDOLA OKUTETULULA OTYITATEKA? Onkhalelo imue yokukala nenoñgonoko konthele ya Huku, okutala ovipuka alinga. Apostolu Paulu wahoneka okuti: “Ovituwa via [Huku] vihamonwa vimonekela nawa kovipuka atunga, okupolelela kouye alo kovipuka ovikuavo, tyetyi vinoñgonokelwa kovipuka viatungwa, tyilinge ononkhono mbae mbahapu, Nounene.” (Romanos 1:20) Tyina utala nawa ovipuka aviho viatungwa, upondola okulilongesa unene konthele younongo, nepondolo Liomupakeko wetu.—Salmo 104:24; Isaías 40:26.

Mahi, opo tukale nenoñgonoko liafuapo konthele yovituwa via Huku, kese umue wesukisa okutanga Ondaka ya Huku, Ombimbiliya, opo elitaleleko oe muene etyi ipopia. Uhayeke vakuenyi vekutolele etyi una okusoka. Anthi, landula elondolo eli Liombimbiliya liati: “Yekeipo okukala tyelifwa nouye uno, anthi kalei ovape, okupilulula omalusoke enyi, opo mutale onue muene okuti ehando lia Huku eewa liafuapo nokuaviuka.” (Romanos 12:2) Mongeleka, tutalei ononthele mbumue Mombimbiliya mbupopia konthele ya Huku.

Huku una enyina. Potete, etyi Ombimbiliya yahonekwa enyina lia Huku ankho livasiwamo ovikando 1000. Ovapitiyi ovanyingi, vakutikinya enyina olio mo Salmo 83:18, okuti: “Opo ovanthu vanoñgonoke okuti, ove utiwa Jeova, ove vala Omukulami ouye auho.”— Versão Almeida, revista e corrigida.

Ovipuka tulinga vipondola okuhambukiswa ine okunumanesa Huku. Etyi Jeova ayovola ovanthu vae koupika mo Egitu, ovo ovikando ovinyingi kavetavelele onondonga mbae. Oumphuki wavo “wemuihamesa omutima.” Ovipuka valinga “viaihamesa Huku yo Isilayeli.”—Salmo 78:40, 41.

Jeova utekula kese umue puonthue. Jesus wapopilile ovalongwa vae okuti: “Oviila vivali kaulandwa onopalata onombali mbahasilivila? Mahi, petupu aka katokela pohi otyo Tate yenyi ehetyii. Anthi, onohuki mbenyi mbo komitwe vienyi mbavalulwa ambuho. Moluotyo, muhakalei nowoma, onue muakolela vali tyipona oviila ovinyingi.”—Mateus 10:29-31.

Huku utupu okapungulula. Apostolu Paulu wapopila ova Gregu mo Atena okuti, “Huku walinga omalongo aeho ovanthu, opo vakale kombanda yoohi aiho.” Tupu wapopia okuti, Huku “kekahi kokule na kese umue puonthue.” (Atos 17:26, 27) Apostolu Petulu wapopile okuti: “Huku utupu okapungulula, mahi, oe utavela kese munthu una onthilo nae nokulinga etyi tyaviuka.”—Atos 10:34, 35.

ONDYAMBI PATYI MATUPEWA? Vamue vena “ombili na Huku, mahi, vetupu enoñgonoko liafuapo.” (Romanos 10:2) Inkha ove wii etyi Ombimbiliya tyili ilongesa konthele ya Huku, molityilika okulinga ovipuka ovivi nokukala tyafuapo pala “okufuena ku Huku.”—Tiago 4:8.

Opo unoñgonoke vali konthele oyo, tala okapitulu 1 komukanda Oityi Ombimbiliya Tyili Ilongesa?a, posapi yati, “Oityi Ombimbiliya ilongesa konthele ya Huku?”

[Onondaka Poutoi]

[Olutalatu pefo 6]

Onkhalelo imue yokukala nenoñgonoko konthele ya Huku, okutala ovipuka alinga