4 Ovola Omakumbululo Tyina Wanguanguana
“Ove wekolelo lihehi, oityi wanguanguanena?”—Mateus 14:31.
OTYITATEKA OTYIPI? Alo umue ovalongwa va Jesus pamue ankho vanguanguana. (Mateus 14:30; Lucas 24:36-39; João 20:24, 25) Ombimbiliya ilekesa okuti okuhakala nekolelo “onkhali ituyondya tyihepuiya.” (Hebreus 12:1) Apostolu Paulu wahoneka okuti: “Havehoko vena ekolelo.” (2 Tessalonicenses 3:2) Otyo, katyilekesa okuti vamue kavapondola okukala nekolelo. Anthi, ovanyingi kavelikuatehila opo vakale nalio. Huku maavela ononkhano onongwa vana valinga ononkhono.
OÑGENI UPONDOLA OKUTETULULA OTYITATEKA? Imbuka ovipuka vikunguanguanesa. Omulongwa Tome, ankho ketavelele okuti Jesus watutila, namphila ovalongwa vakuavo vemupopila okuti vemumona. Tome ankho uhanda oku atalela. Iya atyiende ñgeni? Jesus emuavela enyingilikilo ankho esukisa opo akale nekolelo liapama.—João 20:24-29.
Mo Mbimbiliya, Jeova Huku utuavela omakumbululo tuesukisa, tyina tuna etyi tuhanoñgonokele nawa. Ovanyingi vetupu ekolelo mu Huku tyetyi vemuvela onombei mokonda yovita, noungangala, noluhepo, ovipuka vimonesa ovanthu ononkhumbi. Oityi Ombimbiliya ipopia konthele yotyo?
Huku haeko uhongolela outumini wovanthu. Jesus wapopile konthele yomunthu umue wopaspilitu utiwa o Satanasi, okuti “omutumini wouye.” (João 14:30) Satanasi wapopilile Jesus okuti inkha ufenda kuame mandyikupe outumini womauhamba aeho ouye. Oe wati: “Mandyikuavela outumini ou auho, nenkhimano liao, mokonda nevipewa iya ndyiviavela ou nahanda.” Jesus kapatanene okuti outumini oo ha wa Satanasi. Anthi, Jesus wati: “Tyahonekwa okuti: ‘O ku Jeova Huku yove, una okufenda iya oe vala una okuumbila.’” (Lucas 4:5-8) Satanasi nomautumini ovanthu ovo vekahi nokueta ononkhumbi mouye, ha Huku ko.—Revelação 12:9, 12.
Apa katutu Jeova Huku makanyimako atyiho tyieta ononkhumbi. Oe wapumphikale Ouhamba, mautuminwa no Mona wae Jesus Kristu, pala okutumina ovanthu. (Mateus 6:9, 10; 1 Coríntios 15:20-28) Okufuisapo etyi Ombimbiliya yapopia, onondaka onongwa konthele Youhamba wa Huku, hono mbukahi nokuiviswa kombanda yoohi aiho. (Mateus 24:14) Apa katutu Ouhamba oo, maukanyimako onondyale mbao ambuho, novipuka aviho vietela ovanthu emone.—Daniel 2:44; Mateus 25:31-33, 46; Revelação 21:3, 4.
ONDYAMBI PATYI MATUPEWA? Vana vanguanguana, vekahi ngomakufikufi elunga, vatahelwa oku no oko no “nomphepo ambuho mbomalongeso, nomatutu ovanthu” (Efésios 4:14; 2 Pedro 2:1) Mahi, vana vavasa omakumbululo aviuka omapulo avo, ‘vatualako tyapama mekolelo.’—1 Coríntios 16:13.
Onombangi mba Jeova, vokukahi nokulinga omukanda ou, vahanda okukuvatela opo uvase omakumbululo omapulo apondola okukunguanguanesa. Vekukonga opo ukeliongiye navo naulitaleleko muene kuetyi valongesa. Okulinga ngotyo, matyipameka unene ekolelo liove mu Huku.
Opo unoñgonoke vali konthele oyo, tala momukanda Oityi Ombimbiliya Tyili Ilongesa?a, mokapitulu 8 kati “Ouhamba wa Huku Oityi?” no mokapitulu 11 kati “Omokonda Yatyi Huku Ayekelako Ononkhumbi?”
[Onondaka Poutoi]
a Walingua no Nombangi mba Jeova.
[Ehangununo liolutalatu pefo 9]
Vana vavasa omakumbululo aviuka omapulo avo, vakala nekolelo liapama