Oñgeni Upondola Okunoñgonoka Ombimbiliya 1. Ita Ombatelo ku Muene

Omuhikuena umue utiwa o Ninfa ukala ko Italia wati: “Ankho pena omuvo umue ndyitanga Ombimbiliya apeho tyina nkhele nehenelangalepo. Ankho ndyilinga ngotyo mokonda ndyityii okuti oyo Ondaka ya Huku, iya namphila nehetyihole, ame ankho ndyihanda okunoñgonoka oityi Huku ahonekela Mombimbiliya. Ame ankho ndyihanda okuitanga aiho. Ponthyimbi ankho tyapepuka, mahi, andyihimbika okutanga ononthele ankho mbepuiya vali, konyima andyitalama okutanga.”

OKUTI nove wapita motyitateka ngo tya Ninfa? Ovanthu ovanyingi vena. Ngetyi tyapopiwa monthele yokualamba, Muene Wombimbiliya, Jeova Huku, uhanda ove unoñgonoke Ondaka yae. Oñgeni upondola okukala nenoñgonoko olio? Otyipuka tyotete una okulinga okuita ombatelo ku Muene wayo.

Ono apostolu mba Jesus ankho vapopiwa okuti “kavatangele nokuhena esilivilo,” mokonda kavalongehilwe monosikola ononene mbo nongeleya. (Atos 4:13) Anthi, Jesus wevepameka okuti ovo vapondola okunoñgonoka Ondaka ya Huku. Ñgeni ngotyo? Jesus wahangununa: “Omuvateli, ospilitu sandu, Tate matumikisa menyina liange, maimulongesa ovipuka aviho.” (João 14:26) Huku waundapesile ospilitu sandu yae ine ononkhono mbae pala okulinga oohi novipuka aviho viokuna omuenyo vikahimo. (Gênesis 1:2) Oe tupu weyundapesa pala okutuma ovalume 40 okuhoneka omalusoke ae Mombimbiliya. (2 Ped. 1:20, 21) Tupu, ononkhono ombo mbukuatesako aveho vahanda okunoñgonoka Ombimbiliya.

Oñgeni upondola okupewa ospilitu sandu ya Huku? Ove una okuiita nekolelo. Tyotyili, una okuita apeho. Jesus watile: “Tualeiko okuita, iya mamupewa, inkha onwe . . . mutyii okuavela ovana venyi ovipuka oviwa, iya Tate keulu, wavilapo vali maavela ononkhono mbae vana vemuita!” (Lucas 11:9, 13) Jeova maavela ononkhono mbae vana vemuita nomutima auho. Ononkhono ombo mbupondola okukuatesako okunoñgonoka ehangununo lionondaka mbahonekwa Mombimbiliya omanima omanyingi konyima. Ononkhono mba Huku tupu mbupondola okukuavela ounongo wesukisa opo uundapese onondaka Mbombimbiliya mbokuna epondolo momuenyo wove.—Hebreus 4:12; Tiago 1:5, 6.

Apeho tyina upumphama pala okutanga Ombimbiliya, likuambela ku Huku, muiita ospilitu sandu yae opo ikukuateseko okunoñgonoka Ondaka yae.