Omalumono Ana Atunda ku Huku
INKHA ove ukala nekolelo mu Huku, mekekuavela omalumono? Tyafuile, mahi, hamalumono ove ukevelela. Tala ongeleka ya Maliya ina ya Jesus. Oandyu Gabriel yamonekele ku Maliya, aimupopila okuti oe “wapandua unene” na Huku iya matyiti Omona wa Huku. (Lucas 1:28, 30-32) Mahi, oe ankho hamuhona. Etyi Maliya akutula Jesus, waavelele otyilikutila, “omakuti evali ine onopomba onombali,” otyiawa ovahepi ankho vaava ku Jeova.—Lucas 2:24; Levítico 12:8.
Mokonda Maliya ankho omuhepi, okuti otyo tyilekesa okuti oe ankho kapandelwe na Huku? Au, anthi, etyi Maliya akatalelapo ombunga yae Elisabete, “Elisabete wakalele tyeyula ospilitu sandu. Iya apopila peulu okuti: ‘Ove wapeua ononkhano onongwa pokati kovakai, nauna matundu meimo liove apewe ononkhano onongwa!’” (Lucas 1:41, 42) Maliya ankho una elao liokukala ina Yomona wa Huku onthyolwa.
Jesus ankho hamuhona. Oe katyitilwe vala mepundaumbo liahepa nokutekulwa mombunga yahepa, mahi tupu mokueenda kuomuenyo wae pano pohi kakalele novipuka ovinyingi. Oe wapopile omulume umue ankho uhanda okukala omulongwa wae, okuti: “Ovimbandye vina omaleva, oviila vina apa vilapela, mahi Omona womunthu utupu apa alangeka omutwe.” (Lucas 9:57, 58) Tupu, ovipuka Jesus Kristu alingile etyi ankho ekahi pano pohi, viaavelele omphitilo ovalongwa vae opo vakale nomalumono omanyingi. Apostolu Paulu wahonekele okuti: “Oe welikalesa omuhepi mokonda yenyi, opo mukale ovahona mokonda youhepi wae.” (2 Coríntios 8:9) Omalumono patyi Jesus avelele ovalongwa vae? Iya olumono patyi onthue tuna hono?
Omalumono Patyi?
Ovikando ovinyingi, okukala nomalumono omanyingi tyityilika ovanthu okukala nekolelo, mokonda ovanthu ovahona vayumba vali onthumbi momalumono avo tyipona ku Huku. Jesus wati: “Katyapepukile kuvana vokuna onombongo okunyingila mouhamba wa Huku!” (Marcos 10:23) Jesus kaavelele ovalongwa vae omalumono onombongo.
Tyotyili, Ovakristau ovanyingi pomuvo wono apostolu, ankho ovahepi. Etyi omulume umue watyitua tyalemana aita onombongo, Petulu akumbulula okuti: “Ndyitupu opalata no olu, mahi etyi ndyina otyo mandyikuavela: Menyina lia Jesus Kristu, woko nazare, katuka oende!”—Atos 3:6.
Onondaka mbo mulongwa Tiaku tupu mbulekesa okuti ewaneno Liovakristau ankho lina unene ovanthu ovahepi. Tiaku wahoneka okuti: “Tehelelei vakuatate vange ononthyolwa. Kaholovonene Huku vana vokuahepa komaiho ouye, opo vakale ovahona mekolelo, novapiñgani vouhamba, una alaa kuvana vena ohole nae?” (Tiago 2:5) Tupu, apostolu Paulu wapopile okuti, “havanongo ovanyingi,” ine “ovanyingi vokuna epondolo,” ine “ovanyingi vokuankhimana” vaihanwa opo valinge onthele Liewaneno lio Vakristau.—1 Coríntios 1:26.
Inkha Jesus kaavelele ovalongwa vae omalumono onombongo, omalumono patyi eveavelele? Momukanda Jesus ahonekela ewaneno lioko Esmirna, oe wati: “Ame ndyii ononkhumbi mbenyi noluhepo, mahi, onwe muvahona.” (Revelação 2:8, 9) Ovakristau ko Esmirna, namphila ankho ovahepi, ankho vena omalumono akolela vali tyipona opalata no olu. Ankho ovahona mokonda yekolelo liavo noukuatyili mu Huku. Ekolelo liakolela mokonda “havehoko vena ekolelo.” (2 Tessalonicenses 3:2) Vana vehena ekolelo hono, ovahepi komaiho a Huku.—Revelação 3:17, 18.
Omalumono Atundilila Kekolelo
Omononkhalelo patyi ekolelo liakolela? Vana vena ekolelo mu Huku vapola esilivilo “komalumono okankhenda kae, noumphua-lundo.” (Romanos 2:4) Tupu “ononkhali [mbavo] mbuevelwa” mokonda yekolelo liavo motyilikutila tya Jesus. (Efésios 1:7) Nkhele ovo vena ounongo “Ondaka ya Kristu” yavela vana vokuna ekolelo. (Colossenses 3:16) Tyina velikuambela ku Huku nekolelo, “ombembwa ya Huku, ipona onondunge nomalusoke aeho,” ipameka omitima viavo no malusoke, nokuveetela ehambu.—Filipenses 4:7.
Okuyawisako kovipuka ovio aviho oviwa, vana vokuna ekolelo mu Huku Nomona wae, Jesus Kristu, vena ekevelelo liokukakala nomuenyo wahapu. Onondaka mbuiwe mba Jesus Kristu, mbati: “Mokonda Huku una oluembia olunene novanthu, waava omona wae wongunga, opo kese omunthu umukolela ahakanyimueko, mahi akakale nomuenyo wahapu.” (João 3:16) Ekevelelo olio ewa, lipamekwa tyina omunthu akala nenoñgonoko liafuapo konthele ya Tate, Nomona, mokonda tupu Jesus wapopile okuti: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.”—João 17:3.
Mokonda ononkhano onongwa Huku etuavela, mbelikuata kumwe noupanga wetu nae, tupu mbutuetela ouwa momalusoke no kovituwa. Tala ongeleka, ya Dalídio ko Brazil. Puetyi nkhele ehenekale nenoñgonoko liafuapo konthele yehando lia Huku, oe ankho unwa unene. Otyo tyahanyauna oupanga wae nombunga. Tupu, akala novitateka ovinyingi konthele yonombongo. Mahi, etyi ahimbika okulilongesa Ombimbiliya no Nombangi mba Jeova alingi omapiluluko omanene omuenyo wae.
Ovipuka Dalidio elilongesa Mombimbiliya viemukuatesako okuyekapo ovituwa viae ovivi. Watualako okuundapesa momuenyo wae etyi elilongesa Mombimbiliya, iya apopi okuti, “Ame ankho ndyihole okuenda mbale na mbale, mahi, pahe ndyenda umbo na umbo.” Oe wanyingila movilinga viomuvo auho. Opiluluko olio, kaliaetele vala ouwa kekongoko liae, mahi, tupu liemukuatesako okutetulula ovitateka viae konthele yonombongo. Dalídio wati, “Onombongo ankho ndyuundapesa pala okulanda ovikunwa, pahe ndyimbuundapesa pala okukuatesako vakuetu, nokulanda ovipuka nesukisa.” Tupu walinga oupanga wotyotyili novanthu vatala ovipuka monkhalelo Huku evitala. Dalídio pahetyino una ombembwa momutima, nehambu enene ankho ehena etyi nkhele ehenelilongese konthele ya Huku.
Ongeleka onkhuavo yomunthu wapeua ononkhano onongwa momuenyo mokonda yekolelo liae mu Jeova Huku, o Renato. Tyina utala ehambu liae hono, tyipuiya okutavela okuti oe ankho una omahunga omanyingi pala okusoka okuti watekulua noonya. Etyi ankho nkhele olukembe, me yae wemusapo. Wemupaka mosako, eisipo mombuelo yotyipundi, olutu luae ankho luanyawa-yawa nokuna ovipute, tupu ondyemba yae ankho nkhele yakutwa. Ovakai vevali ankho vekahi nokupita, vatala osako mombuelo yotyipundi ikahi nokupikita. Tete, ovo vasoka okuti omunthu umue wasapo okambisi. Etyi vankhindulula osako muna olukembe, ovo avapolo liwa olukembe olo okulutuala kosipitali ankho ikahi popepi opo lukahakulwe.
Umwe povakai ovo ankho Ombangi ya Jeova, iya apopila Rita Ombangi onkhuavo konthele yolukembe. Rita ankho apeho ukutula omalukembe otyo ankhia, iya ankho una vala omona wike omukainthu. Ankho uhanda unene omona omukuendye, moluotyo watokola okukala na Renato.
Puetyi Renato ankho nkhele omututu, Rita wemupopila okuti oe ha me yaeko wotyotyili. Mahi oe wemutekula nohole onene iya alingi ononkhono ononene opo emulongese Ombimbiliya. Etyi ekula, ahimbika okukala nesuko Nombimbiliya. Olupandu luae monkhalelo oyo ihuvisa ayovolwa, tupu lueliyawisa. Omaiho ae eyula ononkhuka apeho tyina atanga onondaka ombu mba David omuhoneki wo Salmu mbati: “Inkha tate yange na me yange vanthyapo, Jeova manthambula.”—Salmo 27:10.
Pala okulekesa olupandu luae kovipuka aviho Jeova emulingila, Renato, wambatisalua mo 2002, iya menima lialandulako anyingila movilinga viomuvo auho. Oe nkhele kenevase he na ina yae vokuemutyita, tyafuile nalumue mekevevasa. Mahi, Renato ulitehelela okuti otyipuka otyiwa vali apewa, okunoñgonoka, nokukala nekolelo mu Jeova, Tate yae wokuemutekula noluembia.
Ehando liove hamwe okukala noupanga na Huku, upondola okukuavela ononkhano onongwa. Omphitilo yokukala noupanga oo na Jeova Huku no Mona wae, Jesus Kristu, yaikulilwa aveho, tyilinge ovahona novahepi. Otyo hamue kamatyikuetela ouhona, mahi, matyikuetela ombembwa momutima, nehambu lihapondola okulandwa nonombongo ambuho mbomouye. Onondaka mbukahi mu Provérbios 10:22, ombotyotyili, mbati: “Onkhano ongwa ya Jeova, oyo yetela omunthu ouhona, kaimuyawisilako omuihamo nawike.”
Jeova Huku wesuka unene novanthu vafuena kwe: “Inkha wetavelele tyilityili ovitumino viange! Ñgeno ombembwa yove yakala ngenyana, iya ouviuki wove ngomakufikufi elunga.” (Isaías 48:18) Iya oe walaa okuti maavela ondyambi ongwa vana vafuena kwe nomutima wasukuka: “Ondyambi yokuliola omutima nokukala nonthilo na Jeova, omalumono, nenkhimano, nomuenyo.”—Provérbios 22:4.
[Ehangununo liolutalatu pefo 5]
Namphila ombunga ya Jesus pano pohi ankho yehena omalumono omanyingi, yapewa ononkhano onongwa na Huku
[Ehangununo liolutalatu pefo 6]
Ekolelo mu Huku, lieta ombembwa, nehambu