Ospilitu Sandu Ononkhono Wesukisa Momuenyo Wove

“UHANDYUMBEHI kolupala luove. Iya uhamphole ospilitu sandu yove.” (Salmo 51:11) Olio elikuambelo Ohamba David alingile, etyi alinga onkhali onene.

David ankho epondolo liospilitu sandu uliiale momuenyo wae. Etyi ankho omukuendye, yemulundile okufinda Goliya—etolopa ankho litilisa owoma. (1 Samuel 17:45-50) Ospilitu yemuavelele epondolo liokuhoneka ono salmu ononyingi onongwa ahonekele. David ahangununa okuti: “Ospilitu ya Jeova yapopila muame. Iya ondaka yae ankho ikahi kelaka liange.”—2 Samuel 23:2.

Jesus Kristu watonekele okupopia otyilinga tyospilitu sandu momuenyo wa David. Onthiki imwe, Jesus wapopila ovateheleli vae okuti: “Nospilitu sandu David wapopia okuti: ‘Jeova wapopila Tatekulu yange okuti: “Pumphama kokulio kuange, alo ndyipaka onondyale mbove mombuelo yonomphai mbove.”’” (Marcos 12:36; Salmo 110:1) Jesus ankho utyii okuti etyi David ahoneka ono salmu mbae, wahongolelwa nospilitu sandu. Okuti no hono ospilitu sandu oyo ipondola okutuvatela?

“Tualeiko Okuita, opo Mupewe”

Tyipondola ove kunehoneke o salmu. Mahi, upondola okutumbukilwa novitateka, okupopiwa omapita nokulingwa omukuele ngetyi tyalingile Goliya. Nkhele tala etyi tyapita na Isabel.a Omulume wae wemusapo akahanda omufikuena omukuavo. Oe wemusila ongele imwe onene. Tupu, kemupe onombongo mbokumuvatela okutekula ovana vavo vevali ovakainthu. Isabel wati, “Ame ndyilitehelela okuti nalaviswa, ndyikahi ngatyina nasila. Anthi, tunde etyi anthyapo, ndyilitehelela okuti ospilitu sandu ya Huku ikahi nokumphameka.”

Okuti Isabel ankho ukevelela okupewa ospilitu sandu tyihalingi nonkhono? Au, oe ankho ononthiki ambuho wiita ku Huku opo emuavele ospilitu yae. Isabel ankho utyii okuti wesukisa ononkhono mba Huku, opo mbumuvatele okukoleleya nomutima wakola atyiho matyiya komutwe, nokutekula ovana vae monkhalelo yaviuka, nokupameka omutima wae. Oe wakoneka onondaka mba Jesus mbati: “Tualeiko nokuita, alo mupewa; tualeiko nokuovola, alo muvasa; tualeiko nokutotola, alo muyelulwa.”—Mateus 7:7.

Roberto, tupu nae ankho waimbuka okuti wesukisa ospilitu ya Huku, mahi otyitateka tyae tyelikalela. Oe ankho apeho una otyituwa tyokusipa omakaya nepangwe. Oe wakala omanima evali okulinga ononkhono mbokuyekapo otyituwa otyo, iya ovikando ovinyingi atokela mokusipa. Roberto uhangununa okuti, “Tyina uyekapo okusipa, umona ononkhumbi mbovipepe. Olutu lutualako okuita usipe epangwe kese nthiki.”

Roberto atualako nokuti: “Mahi, ame ankho natokola okupilulula omuenyo wange, opo ndyityivile okuumbila Huku monkhalelo apanda. Ame andyovola okuyulisa momutima wange omalusoke aviuka Ombimbiliya. Andyilikuambela unene kese nthiki, okuita ku Huku opo amphe ononkhono mbokuyekapo ovituwa ovivi. Ankho ndyityii okuti kononkhono mbange muene himetyivili. Iya andyiimbuka oñgeni Jeova akumbulula omalikuambelo ange, haunene tyina nasoya mokonda yokualinga otyiponyo. Ame ndyitavela okuti ononkhono mba Huku mbamphameka. Inkha ha nonkhono ombo, ame ñgeno hetyivilile okuyekapo ovituwa viange ovivi.”—Filipenses 4:6-8.

Mavakanthanana “Ngo Nonkhombe”

Ngetyi tyapita na Isabel na Roberto, Onombangi mba Jeova, vehole okuvatelwa nospilitu sandu momienyo viavo. Ononkhono mba Jeova​—omafa aundapesa pala okutunga ouye auho​—nove mbupondola okukuvatela inkha wahanda. Huku uhanda okukuavela ononkhono mbae, inkha umuita nonthumbi. Anthi, opo utambule ononkhono ombo, wesukisa okulilongesa otyili konthele yae, nokuovola okulinga ehando liae nomutima auho.—Isaías 55:6; Hebreus 11:6.

Kepondolo liospilitu sandu, ove upondola okutambula ononkhono opo utyivile okuumbila Huku, nokufinda ovitateka vipondola okutumbukila. Ombimbiliya itupopila okuti: “[Jeova] ukahi nokuavela epondolo una wepuila, nokuavela ononkhono ononyingi una uhenambo. . . . Vana vakevelela ku Jeova mavakamona ononkhono. Mavakanthanana ngo nonkhombe. Mavakahateka, avahaponwa, mavakaenda mahi kamavepuila.”—Isaías 40:28-31.

[Onondaka Poutoi]

[Ononkhalelo Omu Ospilitu Sandu Ipondola Okutuvatela]

Ospilitu sandu ipondola okukupameka tyina tukahi nokuyondyua nokuyekapo ovituwa ovivi. Apostolu Paulu wati: “Huku wayumbua onthumbi, kamayeke mulolwe alo muhetyivili vali okukoleleya. Mahi, tyina mulolwa memupe omphitilo, opo mutyivile okukoleleya.” —1 Coríntios 10:13.

Ospilitu sandu ipondola okukuvatela okukala novituwa viapandwa na Huku. “Otyinyango tyospilitu, ohole, nehambu, nombembwa, noumphua-lundo, nokankhenda, nouwa-tima, nekolelo, nepoleyo, nokulikondola omutima.”—Gálatas 5:22, 23.

Ospilitu sandu ipondola okukupameka opo ukoleleye mononkhumbi. “Ame ndyina ononkhono movipuka aviho, mokonda ya una umpha epameko.”—Filipenses 4:13.

[Onondaka Mbavilapo pefo 8]

‘Ame andyilikuambela unene kese nthiki, okuita ku Huku opo amphe ononkhono. Ame ndyityii okuti kononkhono mbange ñgeno hetyivilile. Iya naimbuka oñgeni oe akumbulula omalikuambelo ange’

[Olutalatu pefo 7]

Huku waundapesa ospilitu sandu opo alinge oohi nouye auho. Omuhoneki wo Salmu wati: “Ovilinga viove ovinene Jeova! Aviho wevitunga nounongo. Kombanda yeheke kueyula ovilinga viove. Inkha utumikisa ononkhono mbove, ovipuka vitungwa.”—Salmo 104:24, 30; Gênesis 1:2; Jó 33:4.

Ospilitu sandu yavatela ovanthu va Huku okuhoneka Ombimbiliya. Paulu wahoneka okuti: “Ovihonekwa aviho viahonekwa kononkhono mba Huku nokuna esilivilo.” (2 Timóteo 3:16) Onondaka mo Gregu yapitiyua “viahonekwa kononkhono” mbuhangununa “okufilwa na Huku.” Ononkhono mba Jeova, mbahongolela omalusoke ovahoneki Vombimbiliya, moluotyo vapopia “ondaka ya Huku.”—1 Tessalonicenses 2:13.

Ospilitu sandu yalundile ovaumbili va Huku okupopia etyi matyikamoneka komutwe. Apostolu Petulu wahangununa okuti: “Omaulo Ovihonekwa, kaalingilwe kenoñgonoko liomunthu na umwe. Tyetyi omaulo kaahonekelwe kehando liomunthu. Mahi ovanthu vahoneka onondaka mba Huku kononkhono mbae.”—2 Pedro 1:20, 21; Joel 2:28.

Ospilitu sandu yakuatesileko Jesus novalume ovakuavo vekolelo, okuivisa onondaka onongwa Mbouhamba wa Huku nokulinga omahuviso. Jesus wati: “Ononkhono mba Jeova mbukahi kuame, mokonda oe wanaka opo ndyiivise onondaka onongwa kovahepi. Wanthuma opo ndyiivise eyovo lio nonkhuatwa, nokupatula omaiho ovamphoki.”—Lucas 4:18; Mateus 12:28.