“Alo Nalupi . . . Ndyina Okuliyavela Okuita Ombatelo?”
Jayne weliyava okuti, “ame ndyihanda vala onongembia mbutule!” Oe ankho una ouvela utiwa cancer, iya ankho ukahi nokuliyandyana nolutu luae aluho. Ombunga yae nomapanga, ankho vahanda ñgeno upolwa vala ouvela wae no noluihamo! Avelikuambela ku Huku opo emukuateseko. Okuti wevetehelela? Okuti wemukuatesileko?
HUKU weete nawa onkhalelo yovanthu. Ondaka yae Ombimbiliya, yati: “Ovipuka aviho viaetuako aviho kumwe vitualako okukema, aviho vina onongembia alo pahetyino.” (Romanos 8:22) Huku utyii okuti kuna ovanthu ovanyingi vena onongembia nga Jayne kese nthiki, molutu ine omomutima. Huku uluete onomiliau 800 mbovanthu valala nondyala kese tyinthiki, na vana valuiswa nombunga yavo. Tupu, uluete ovohe ovanyingi vasukalala nonkhalelo ongwa yovana vavo. Okuti welipulileale inkha Huku makatetulula ovitateka ovio? Tyotyili, inkha onthue tuhanda okuvatela vana tuhole, okuti Huku kahande okuvatela ovanthu oe atunga?
Inkha lumwe walingile omapulo ngoo, haveko vala. Okulamba po manima 2.600 konyima, Habakuke omulume umwe wekolelo, nae ankho ulitehelela ngovanthu ovanyingi hono, iya apulu Huku okuti: “Alo nalupi Jeova ndyina okuliyavela okuita ombatelo, iya ove ohanthehelela? Alo nalupi mandyiliyavela kuove undyakulile koungangala, iya ove ohandyovola? Oityi monthalesila ovipuka ovivi? Otyo utualako nokutala ononkhumbi mbovanthu? Omokonda yatyi ndyitalela ovivi noungangala, no nondyaya, novilwa?” (Habacuque 1:2, 3) Habakuke, omuuli omu Hebreu, ankho uluete ovipuka ovivi vioungangala nokuliluisa vilingwa kononthiki mbae. Hono, ovipuka ovio ononthiki ambuho vikahi nokunumanesa ovanthu vokankhenda.
Okuti Huku ankho kasukile notyiho tya Habakuke? Ankho wasuka. Moluotyo, watehelela omapulo a Habakuke ankho atunda komutima, emuugumanesa nokupameka omulume oo ankho waihamenua. Jeova Huku wapamekele ekolelo lia Habakuke, nomulao wati Oe makanyimako ononkhumbi. Onondaka mba Huku konthele yekevelelo, tupu mbupondola okukupameka ngetyi mbapamekele Jayne nombunga yae. Ononthele mambulandulako, mambukakumbulula omapulo aa: Oñgeni matukala nonthumbi yokuti tyotyili Huku wasuka nonthue? Oityi Huku makalinga opo amaneko ononkhumbi? Onalupi meketyilinga?