Oityi Jesus Alongesile Konthele Yae
“Jesus ankho utyii oe olie, opi atunda, omokonda yatyi eila pano pohi, netyi ankho tyimukevelela komutwe wandyila.”—OMUHONEKI HERBERT LOCKYER.
TYINA nkhele tuhenetavele nokukala nekolelo movipuka Jesus alongesa, onthue tuesukisa okunoñgonoka ovipuka vimwe konthele yae. Tyotyili Jesus olie? Opi Jesus atundile? Olipi ehando liae momuenyo? Mono Evandyeliu—Mateus, na Marcos, na Lucas, na João—tuvasamo omakumbululo a Jesus.
Jesus ankho oko eliale etyi nkhele ehenetyitwe pano pohi Jesus wati: “Etyi nkhele Abraiau ehenetyitwe, ame ankho oko ndyiliale.” (João 8:58) Abraiau wakalele omanima 2.000 etyi Jesus ehenetyitwe. Tyotyili, Jesus ankho oko eliale etyi Abraiau nkhele eheneye kouye. Mahi, opi Jesus ankho akala? Oe wati: “ame natunda keulu”—João 6:38.
Omona wa Huku Jeova una ovana ovanyingi onoandyu. Mahi, Jesus oe vala aike. Oe welipopia okuti: “Omona wongunga wa Huku.” (João 3:18) Onondaka ombo mbulekesa okuti Jesus watungwa muene na Huku. Huku Nomona wae wongunga vatunga ovipuka aviho.—Colossenses 1:16.
“Omona womulume” Jesus wapopia onondaka ombo ovikando ovinyingi pokupopia konthele yae muene. (Mateus 8:20) Oe ankho ha andyu yelipilulula olutu luovanthu. Mahi, oe ankho omunthu. Huku nospilitu sandu yae, watumikisa omuenyo Womona wae meimo liomumphembela Maliya pano pohi. Ngotyo, Jesus atyitwa omunthu wehena nkhali.—Mateus 1:18; Lucas 1:35; João 8:46.
O Mesiya walaelue Omukai omu Samalitana watolela Jesus okuti: “Ame ndyityii okuti Mesiya meya.” Jesus emukumbulula okuti: “Ame, ndyipopia nove, ame yatyo Kristu.” (João 4:25, 26) Ondaka “Mesiya” na “Kristu,” mbuhangununa “Omulembulwa.” Jesus walembulua, ine waholovonua na Huku pala otyilinga tyimwe tyakolela mokufuisapo omilao via Huku.
Etyi tyaetele Jesus pano pohi Jesus wati: “Ndyina okukaivisa onondaka onongwa Mbouhamba wa Huku komapundaumbo omakuavo, mokonda etyi, otyo natuminwa.” (Lucas 4:43) Namphila alingile ovipuka ovinyingi oviwa pala ovanthu vesukisa, okuivisa Ouhamba wa Huku ankho otyipuka tyakolela vali momuenyo wae. Etyi alongesile konthele Youhamba oo, matukelilongesa tyo.
Tyotyili, Jesus ankho hamunthu ko vala nga vakuavo.a Ngetyi matukatala, omuenyo ali nao keulu wayawisa ehangununo lionondaka apopile pano pohi. Katyituhuvisa okutala okuti onondaka Jesus aivisile mbakuatesileko ovanthu ovanyingi mouye auho?
[Onondaka Poutoi]
a Opo unoñgonoke vali konthele ya Jesus notyilinga tyae mehando lia Huku, tala okapitulu 4, momukanda Oityi Ombimbiliya Tyili Ilongesa? walingua no Nombangi mba Jeova.