Ove Ukahi Nokulandula Nawa Kristu?

“Ngetyi mukahiale nokuenda, . . . tualeiko okutyilinga vali nawa.”​—1 TESSALONICENSES 4:1.

1, 2. (a) Ovipuka patyi ovinene ovanthu ovanyingi vamuene etyi Jesus ankho ekahi pano pohi? (b) Omokonda yatyi ononthiki mbuno nambo mbakolela?

OKUTI wasokeliale oñgeni otyiwa unene okukala na Jesus etyi ankho ekahi pano pohi? Ove upondola okusoka okuti inkha wavela, Jesus mekuvelula nokukutyilika komauvela nokovitateka ovikuavo. Ine upondola okusoka kehambu enene liokutala nokutehelela Jesus—nokulongeswa nae ine okutala tyina alinga omahuviso. (Marcos 4:1, 2; Lucas 5:3-9; 9:11) Otyiwa unene ngatyi inkha tuakalelepo etyi Jesus ankho alinga ovilinga ovio aviho! (Lucas 19:37) Okupolelela opo, kutupu vali ovanthu ovakuavo vamuene ovipuka ngovio, iya etyi Jesus alingile pano pohi “etyi eliava oe muene ngotyilikutila” katyikapitululwa vali.—Hebreus 9:26; João 14:19.

² Omuwo uno tukahi, tupu wakolela unene. Omokonda yatyi? Onthue tukahi momuwo Ovihonekwa viapopia okuti “omuvo wonthyulilo” no “nonthiki mbahulako.” (Daniel 12:1-4, 9; 2 Timóteo 3:1) Mokueenda kuomuwo oo, Satanasi watahua keulu. Apa katutu, makutua ayumbwa “mo abisimu.” (Revelação 12:7-9, 12; 20:1-3) Tupu mokueenda kuomuwo ou tukahi tuna elao limwe enene liokuivisa “onondaka onongwa mbouhamba wa Huku” ouye auho, okupopila ovanthu konthele yekevelelo liomphangu yombembwa—otyilinga tyahakapitululwa vali.—Mateus 24:14.

3. Etyi Jesus alonda keulu oityi atuma ovalongwa vae okulinga, iya otyo tyakutikinya tyi?

³ Etyi Jesus nkhele eheneende keulu, wapopilile ovalongwa vae okuti: “Onwe mamupewa ononkhono amukala onombangi mbange mo Jelusalei no mo Judeia no ko Samaria, alo kononthele mbokokule-kule mbo ohi.” (Atos 1:8) Ovilinga ovio viokulongesa vikahi nokulingwa ouye auho. Opala tyi? O pala okulinga ovalongwa—okuyawisa kovalanduli va Kristu—tyina onthyulilo yeheneye. (Mateus 28:19, 20) Oityi tuna okulinga inkha tuhanda okufuisapo nawa otyilinga tuapewa na Kristu?

4. (a) Onondaka mba Petulu mbukahi mu 2 Pedro 3:11, 12 mbulekesa esuko patyi? (b) Oityi tuesukisa okulityilika?

⁴ Tala onondaka mba apostolu Petulu: “Muesukisa okukala ovanthu patyi, konthele yovituwa viasukuka novilinga vilekesa onthilo na Huku. Tyina mukevelela nokuanoñgonoka nawa okuya kuonthiki ya Jeova!” (2 Pedro 3:11, 12) Onondaka mba Petulu mbutoneka esuko liokutualako okutala nawa mokueenda kuononthiki ombu mbonthyulilo opo tukale nonthumbi yokuti tuna omuenyo waviuka movilinga via Huku. Otyo tyakutikinya okuivisa onondaka onongwa. Tyituhambukiswa unene, okutala ombili yovakuatate vetu ouye auho vekahi nokufuisapo ovilinga viokuivisa tuapewa na Kristu! Tupu tuimbuka okuti, tuesukisa okuliyunga kese nthiki komahongaiyo ouye wa Satanasi nokulityilika komahando olutu luetu okuhatepulula ombili tuna movilinga via Huku. Moluotyo, tutalei oñgeni tupondola okukala nonthumbi yokuti tukahi nokutualako okulandula Kristu.

Tavela Ovilinga Upewa na Huku

5, 6. (a) Paulu wapandula ovakuatate vae mo Jelusalei mokonda yatyi, iya evelondola konthele yatyi? (b) Omokonda yatyi tuahapondola okutepulula kovilinga tuapewa na Huku?

⁵ Momukanda apostolu Paulu ahonekela Ovakristau ko Jelusalei, oe wapandele ovakuatate vae mokonda yekolelo liavo namphila ankho vamoneswa emone. Oe wati: “Anthi, tualeiko okuhinangela ononthiki mbokualamba, etyi konyima yokualongeswa nawa, amukoleleya mombuelo yononkhumbi.” (Hebreus 6:10; 10:32-34) Onondaka mba Paulu mbokupandula mbapamekele unene Ovakristau ova Hebreu. Anthi, momukanda watyo oo, Paulu tupu walondolele konthele yehando limwe, liesukisa okuyungwa opo tuahatepulule ombili yetu movilinga via Huku. Oe wapopile okuti Ovakristau vena okuliyunga opo “vehelityilike” ine okuyekapo okulandula ovitumino via Huku.—Hebreus 12:25.

⁶ Elondolo olio konthele yehando “liokulityilika” okutavela ovilinga omunthu apewa na Huku tupu opala Ovakristau hono. Onthue tutyii okuti tuesukisa okutokola okuhayekepo ovilinga vietu Vioukristau ine okutepulula ombili yetu movilinga via Huku. (Hebreus 10:39) Kuatyiho otyo, okulinga ovilinga via Huku tyakutikinya omuenyo ine ononkhia.—1 Timóteo 4:16.

7, 8. (a) Oityi matyitukuatesako okutualako nombili yetu movilinga via Huku? (b) Inkha ombili yetu yotete itepuluka oityi tuesukisa okuhinangela konthele ya Jeova na Jesus?

⁷ Oityi matyitukuatesako okulityilika okuanya okufuisapo ovilinga tupewa na Huku? Onkhalelo imwe okusokolola apeho momulao tualinga etyi tualinga elipakulo. Onthue tualinga omulao ku Jeova okuti tuhanda okupaka tete ehando liae momuenyo wetu, nokuhanda okutualako nomulao oo. (Tanga Mateus 16:24.) Ngotyo, tuesukisa okutalama nokulipula okuti: ‘Nkhele ndyilitehela okuti natokola umwe okutyinda omuenyo welikuata nelipakulo liange nalinga ku Huku etyi nambatisalwa? Ine ombili yange yatepuluka vali tyipona omanima nahimbika?’

⁸ Inkha tulipulusuna nawa ngotyo, atutyimono okuti tukahi nokutepuluka, otyiwa okuhinangela onondaka mbupameka mbapopia omuuli Sofonia. Oe wati: Monthiki muna Jelusalei mapopilwa okuti: “Omaoko ove ahasoye. Jeova Huku yove, ukahi pokati kove. Mokonda o Wepondolo aliho mekuyovola. Oe mekuhambukilwa.” (Sofonias 3:16, 17) Onondaka ombo mbepameko tete mbaundapesilwe mo Isilayeli yokohale, vakondokele ko Jelusalei okutunda koukonde Mombambilonia. Tupu, onondaka ombo tyotyili mbupameka ovanthu va Huku hono. Mokonda ovilinga tukahi nokulinga ovia Jeova, tupondola okukala nonthumbi yokuti Jeova Nomona wae mavetuvatela nokutupameka natufwisepo nawa ovilinga tuapewa na Huku. (Mateus 28:20; Filipenses 4:13) Inkha tulinga ononkhono mbokutualako okulinga ovilinga via Huku nombili, oe metuavela ononkhano onongwa nokutuvatela okukula mopaspilitu.

Nombili “Ovola Tete Ouhamba”

9, 10. Onthengele-popia ya Jesus konthele yondalelo imwe onene oityi ilekesa, iya oityi tupondola okulilongesilako?

⁹ Etyi ankho ekahi nokulia meumbo liomutumini umwe omu Faliseu, Jesus walinga onthengele-popia imwe konthele yondalelo imwe onene. Monthengele-popia oyo, oe wapopia omphitilo yapelwe ovanthu velikalaila opo vanyingile Mouhamba wokeulu. Oe tupu waava ongeleka ilekesa “okuanya.” (Tanga Lucas 14:16-21.) Vokuakongwa monthengele-popia ya Jesus vaanya okuya kotyipito. Umwe wati uhanda okuenda akatale epia liae ankho alanda. Omukuavo wati walanda onongombe uhanda okuenda ekembutale nawa. Iya omukuavo ati: ‘Ame hiende. Mokonda nanepa pahetyino.’ Aveho vaanyene. Tyina omunthu ahanda okulanda epia ine onongombe uvitala tyina ehenelande, ovio kaviesukisile unene okuvitala tyina wevilandale. Iya omokonda yatyi una wanepa pahe ankho kesukisa okuanya ekongwa olio liakolela? Tyotyili, hekulu yondalelo wapopiwa monthengele-popia anumana unene!

¹⁰ Ovanthu va Huku aveho vapondola okulilongesila konthengele-popia oyo ya Jesus. Oityi velilongesilako? Nalumue ovipuka vietu muene, ngevi Jesus apopia monthengele-popia, vipondola okukala viakolela vali tyipona ovilinga via Huku. Inkha Omukristau usukalala unene novilinga viae muene, ombili yae movilinga via Huku katutu-katutu maitepuluka. (Tanga Lucas 8:14.) Opo otyo tyahapite nonthue, tuna okutavela elondolo lia Jesus liati: “Tualeiko okuovola tete ouhamba wa Huku nouviuki Wae, iya ovipuka ovikuavo aviho mamuviyawiswa.” (Mateus 6:33) Tyipameka unene okutala ovaumbili va Huku—ovakuendye novakulu—vetavela elondolo olio liakolela! Tyotyili, ovanyingi vatepulula ovipuka vimwe momuenyo wavo opo vaundape vali unene movilinga viokuivisa. Ovo velilongesa okuti nombili okuovola tete Ouhamba tyieta ehambu liotyotyili nombembwa onene.

11. Ehipululo patyi Liombimbiliya lilekesa okuti tyakolela okukala nombili nokuumbila Huku nomutima auho?

¹¹ Pala okulekesa oñgeni tyakolela okukala nombili movilinga via Huku, tala etyi tyapitile nohamba yo Isilayeli Joasi. Mokonda ankho tyimoneka ngoti o Isilayeli maifindwa nova Silia, Joasi akalilila ku Eliseu. Omuuli emutumu ayahele pondyanena omuhongo okuviukisila ko Silia, okulekesa okuti ovo mavafindi elongo olio kononkhono mba Jeova. Tyotyili otyo tyapamekele ohamba. Konyima Eliseu atolela Joasi akuate omihongo viae ayahe pohi. Iya Joasi ayahe pohi ovikando vitatu. Otyo atyinumanesa unene Eliseu, mokonda inkha ayahele pohi ovikando vitano ine epandu, ñgeno tyalekesa okuti “mafindi o Silia aiho.” Anthi Joasi wahambukilua vala okufinda tutatu ahamane. Mokonda Joasi walingile nombili yehehi, wafindile vala katutu. (2 Reis 13:14-19) Oityi tupondola okulilongesila kehipululo olio? Tulilongesa okuti Jeova metuavela vala ononkhano onongwa inkha tulinga ovilinga viae nomutima auho nombili.

12. (a) Oityi matyitukuatesako okutualako nombili yetu movilinga via Huku namphila tulwa novitateka momuenyo? (b) Popia oñgeni ukahi nokupola esilivilo kokuundapa unene movilinga viokuivisa.

¹² Ovitateka momuenyo vipondola okulola ombili yetu movilinga via Huku. Ovakuatate ovanyingi no nomphange vekahi nokulwa notyitateka tyokuhena onombongo. Ovakuavo vanumana mokonda vena ovitateka ovinene konthele yekongoko iya kavetyivili okuundapa unene movilinga via Jeova. Mahi, kese umwe puonthue una etyi apondola okulinga opo tutualeko nombili yetu nokutualako okulandula nawa Kristu. Mbambavo, tala onondonga mbumwe no notestu mbukahi mokakasa “Oityi Matyitukuatesako Okutualako Okulandula Kristu?” Tala oñgeni upondola okumbuundapesa. Inkha utyilinga, mopoloko esilivilo enene. Okuundapa unene movilinga viokuivisa tyitukalesa nomutima wahiliya, tyitukalesa nomuenyo omuwa, nokutuetela ombembwa onene nehambu. (1 Coríntios 15:58) Tupu, okuundapa nomutima auho movilinga via Huku, tyituvatela “okunoñgonoka nawa okuya kuonthiki ya Jeova.”—2 Pedro 3:12.

Tala Nawa Onkhalelo Yove

13. Oñgeni tupondola okutokola oityi tyihangununa kuonthue okuundapa movilinga viokuivisa nomutima auho?

¹³ Otyiwa okuhinangela okuti okuundapa nomutima auho katyitei vala komuvo tuundapa movilinga viokuivisa. Tyitei konkhalelo yomuenyo wa kese munthu. Omunthu uundapa o ola ike ine onombali movilinga viokuivisa kese hanyi, upondola okuhambukiswa Jeova inkha ekongoko liae limutyilika okuundapa vali unene. (Eleka na Marcos 12:41-44.) Moluotyo, opo tutokole oityi tyihangununa pala onthue okuundapa movilinga via Jeova nomutima auho, tuesukisa okutala nawa onkhalelo yomuenyo wetu nounongo. Mokonda tuvalanduli va Kristu, tupu tuhanda okukala nolusoke luelifwa noluae. (Tanga Romanos 15:5; 1 Coríntios 2:16) Oityi Jesus apakele tete momuenyo wae? Oe wapopililile ovanthu ovanyingi ko Kafarnau okuti: “Ndyina okukaivisa onondaka onongwa Mbouhamba wa Huku komapundaumbo omakuavo, mokonda etyi, otyo natuminwa.” (Lucas 4:43; João 18:37) Okusoka kombili ya Jesus movilinga viokuivisa, matyikuatesako okutala onkhalelo yove yomuenyo inkha upondola okuundapa vali unene movilinga viokuivisa.—1 Coríntios 11:1.

14. Omononkhalelo patyi tupondola okuyawisa ovilinga vietu viokuivisa?

¹⁴ Okutala nawa onkhalelo yetu yomuenyo matyitukuatesako okutala okuti tupondola okuundapa vali unene movilinga viokuivisa. (Mateus 9:37, 38) Mongeleka, ovakuendye ovanyingi novahikuena vamanuhula osikola, vekahi nokuundapa vali unene movilinga viokuivisa iya pahe vena ehambu liokuundapa nombili movilinga vioukokoli-ndyila. Nove uhanda okukala nehambu ngo olio? Ovakuatate vamwe nonomphange vatala nawa onkhalelo yavo yomuenyo avatokola okuilukila konthele onkhuavo motyilongo tyavo ine o kotyilongo otyikuavo kuna kuesukisa vali ovaivisi Vouhamba. Ovakuavo velilongesa elaka ekuavo opo vakuateseko ovanthu vapopia omalaka omakuavo. Namphila okuundapa unene movilinga viokuivisa katyapepukile, mahi otyo tyeta ononkhano onongwa. Tupu tupondola okukuatesako ovanthu ovanyingi “avakala nenoñgonoko liafuapo konthele yotyili.”—1 Timóteo 2:3, 4; 2 Coríntios 9:6.

Onongeleka Mbombimbiliya Pala Okulandula

15, 16. Ovalie tupondola okuhetekela opo tukale ovalanduli vombili va Kristu?

¹⁵ Oñgeni vamwe vakalele ono apostolu valinga etyi vakongwa na Kristu opo vakale ovalanduli vae? Konthele ya Mateusi ehipululo liati: “Oe wasapo atyiho, iya emulandula.” (Lucas 5:27, 28) Konthele ya Petulu Andre, ankho vokufwa onohi, tutanga okuti: “Vasapo omawanda, avemulandula.” Okulandulako Jesus amono Tiagu na João, ankho vekahi nokupangiya omawanda avo na tate yavo. Oñgeni vatala ekongwa olio lia Jesus? “Vasapo liwa-liwa owato na tate yavo, avemulandula.”—Mateus 4:18-22.

¹⁶ Ongeleka onkhuavo ongwa oya Saulu, wakalele apostolu Paulu. Namphila ankho atualako okuyeva ovalanduli va Kristu, oe wapilululile omuenyo wae akala ‘ngombiya yoluma yaholovonwa’ pala okutyinda enyina lia Kristu. Liwa-liwa etyi ankho ekahi mondyuo yokufendela [Paulu] ahimbika okuivisa konthele ya Jesus, okuti oo Omona wa Huku.” (Atos 9:3-22) Namphila amonesilwe unene ononkhumbi nokuluiswa, Paulu nalumwe atepululile ombili yae.—2 Coríntios 11:23-29; 12:15.

17. (a) Olipi ehando liove konthele liokulandula Kristu? (b) Ononkhano patyi una mokonda yokulinga ehando lia Jeova nomutima auho?

¹⁷ Tyotyili onthue tuhanda okuhetekela onongeleka onongwa mbovalongwa ovo atuhakala nowoma wokukala ovalanduli va Kristu. (Hebreus 6:11, 12) Ononkhano patyi onongwa tukala nambo tyina tutualako okulinga ononkhono mbokulandula Kristu nombili? Tukala nombembwa onene kokulinga ehando lia Huku, nokukala nehambu liokutavela ovilinga ovikuavo, novilinga mewaneno. (Salmo 40:8; tanga Tessalonicenses 4:1.) Tyotyili, putyina tulinga ononkhono mbokulandula Kristu, tukala nononkhano onongwa, nombembwa, nehambu, nokupandwa na Jeova, nokukala nomuenyo wahapu.—1 Timóteo 4:10.

Okuti Ove Utyihinangela?

• Otyilinga patyi tyakolela onthue tuapewa, iya oñgeni tuna okutyitala?

• Ehando patyi tuna okulityilika, iya omokonda yatyi?

• Oñgeni tuna okutala nawa onkhalelo yomuenyo wetu?

• Oityi matyitukuatesako okutualako okulandula Kristu?

[Olutalatu pefo 31]

Oityi Matyikukuatesako Okutualako Okulandula Kristu?

[Okakasa/​Olutalatu pefo 31]

▪ Okutanga Ondaka ya Huku nokusokolola kuetyi utanga.—Salmo 1:1-3; 1 Timóteo 4:15.

▪ Okulikuambela apeho okuita ombatelo nehongolelo liospilitu ya Huku.—Zacarias 4:6; Lucas 11:9, 13.

▪ Okukala na vana valekesa nomutima auho ombili movilinga viokuivisa.—Provérbios 13:20; Hebreus 10:24, 25.

▪ Okuimbuka okuti omuvo tukahi ukahi nokukanyauka.—Efésios 5:15, 16.

▪ Okuimbuka ovitateka ‘viokuyekapo ovilinga.’—Lucas 9:59-62.

▪ Okusoka apeho kelipakulo liove ku Jeova no nonkhano onongwa mbutundilila kokuumbila Jeova nokulandula Kristu nomutima auho.—Salmo 116:12-14; 133:3; Provérbios 10:22.