Vetupu Vali Owoma Wonthyulilo
MENIMA 1970, Gary na Karen vakalele nonthumbi yokuti onthyulilo youye ikahi popepi. Moluotyo, vailuka mepundaumbo avakakala mokati kotyilongo, avatokola okulinga ovo muene ovipuka aviho vesukisa. Ankho vahanda okuhupa.
Opo vakale nenoñgonoko ankho vesukisa, valanda omikanda, avaende monosikola no monosiminaliu, nokupopila ovanthu ovanyingi ankho vavasa. Valima omapia nokutuika omiti 50 viima ovinyango. Vaongiya ombuto, nomatemo novikuavo vali pala okuundapesa. Velilongesa okulima nokupaka nawa atyiho valima. Epanga liavo umwe wevelongesa okuipaa ovinyama nokupaka nawa ohitu. Karen welilongesa okuimbuka omiti nomii viofika vitavela okulia, inkha okulia kuavo kupwa. Gary welilongesa okulinga ongasolina yovilia, atungu ofolono yotyivela yenda ononkhuii nondyuo imwe onene nawa.
Karen wati, “mokonda yonkhalelo ombi youye pomuvo opo, ankho ngoti ouye wovanthu maupuko liwa-liwa.” Gary wahangununa okuti: “Ngetyi ankho tyilinga ovakuendye vakuetu, naame ankho ndyilinga ononkhono mbokumanako oundyale pokati komihoko, Novita mo Vietnam, novivi ovikuavo. Mahi liwa-liwa andyisoyo. Tyina ndyitala ngoti ovanthu ankho mavelinyimiko ovo muene.”
Gary wati, “Otyinthiki tyimwe ankho andyikala nomuvo omunyingi, moluotyo, andyipolo Ombimbiliya andyiitange okupolela pu Mateus alo pu Revelação [Apocalipse]. Mokueenda kuovinthiki ovikuavo vikuana, andyiitange otyivali. Monthiki yatano komuhuka andyipopila Karen okuti: ‘Tukahi kononthiki mbahulililako. Huku apa katutu makasukukisa oohi. Onthue tuesukisa okuvasa vana mavakahupa.’” Gary na Karen avahimbika okueenda monongeleya, okuovola ovanthu vahanda okulipongiya pala onthyulilo.
Konyima yomuvo uhehi, umwe Ombangi ya Jeova watotola pepito liavo, iya ahimbika okulilongesa navo Ombimbiliya. Karen uhinangela okuti: “Andyihambukwa unene mokonda ankho ndyikahi nokuhangununinwa nawa Ovihonekwa. Ankho ndyikahi nokuovola otyili konthele yomuvo wonthyulilo, iya pahe netyivasa. Ankho pahe ndyina ekevelelo liotyotyili komutwe. Anthi, tyakolela vali, ame nahimbika okukala noupanga omuwa na Tate yange keulu, Omutungi wouye auho.”
Gary wati: “Omuenyo wange pahe una ekevelelo liotyotyili. Tyina ankho namahimbika okulilongesa Ombimbiliya, ankho hihande okutalama. Ame natanga omaulo Ombimbiliya, andyiovolola nawa oñgeni afuiswapo, iya andyiimbuka okuti otyili, nokukala nonthumbi yokuti apa katutu Huku maeta onthyulilo. Andyisoko okuti, ‘Ovanthu vesukisa okulipongiya, hapala otyiponga, mahi o pala omuenyo Huku etuhandela.’” Gary na Karen pahe vena olusoke luaviuka konthele yo komutwe. Pahe vetupu vali owoma wonthyulilo youye, anthi vena onthumbi yokuti Huku makamanako ovitateka viovanthu nokupilulula oohi ikale omphangu yombembwa.
Oityi Gary na Karen pahe valinga, mokueenda kuomanima 25 tunde opo? Karen wati: “Ame natualako okupameka ohole yange na Jeova Huku nekolelo liange mwe. Tupu, natualako okukuatesako vakuetu navo vakale noupanga ngoo. Gary na ame tulivatela pokati, otyo tutualako okupameka nokuwaneka ombunga yetu mefendelo lia Huku. Tulinga ononkhono mbokukala tyelionganeka nawa, nokutyinda omuenyo wapola pokati, opo tutyivile okusuka na vakuetu nokuvevatela.”
Gary ayawisako okuti: “Apeho ndyilikuambela okuita opo Ouhamba wa Huku uye okuyovola ovanthu ovanyingi. Kese muvo ndyipopila vakuetu onondaka onongwa Mbouhamba wa Huku, nokulikuambela opo ndyikuateseko ovanthu okukala nekevelelo litunda Mombimbililya. Mokueenda kuomanima 25, mokankhenda kae Jeova ukahi nokukumbulula omalikuambelo oo. Karen na ame tutavela okuti apa katutu, Jeova makalinga omapiluluko omanene kombanda yoohi, mahi onthue tutupu vali owoma wonthyulilo.”—Mateus 6:9, 10; 2 Pedro 3:11, 12.
[Ehangununo liolutalatu pefo 9]
Gary na Karen pahe vena ehambu liokukuatesako vakuavo okukala nekevelelo litunda Mombimbililya