Otyipuka tyo 1

Kala Nohole Novanthu, Hanonombongo Nomalumono

OITYI OMBIMBILIYA ILONGESA? “Okukala nohole yonombongo, otyo omwii wovipuka aviho ovivi.”—1 Timóteo 6:10.

OTYITATEKA OTYIPI? Ovalandesi vetuhongiliya okuhahambukwa novipuka tuna. Vahanda tukale ovapika vokuovola onombongo opo tulande ovipuka ovipe, noviwa, novinene vali. Onombongo mbukengelela, iya onthue tupondola okukala liwa nohole nambo. Anthi, Ombimbiliya ilondola okuti omunthu uhole omalumono, nalumwe mahambukwa. Ohamba Salomau wahoneka okuti: “Una uhole onombongo kamatuuka onombongo, na una uhole omalumono katuuka etyi afetwa.”—Eclesiastes 5:10.

OITYI UPONDOLA OKULINGA? Hetekela Jesus, nokulilonga okukala nohole novanthu tyipona ovipuka. Jesus wakalele nehando liokusapo atyiho, alo umwe omuenyo wae, mokonda yohole novanthu. (João 15:13) Oe wati: “Okuava tyihambukiswa vali tyipona okupewa.” (Atos 20:35) Inkha tukala notyituwa tyokuavela vakuetu omuvo wetu nomalumono etu, ovanthu tupu mavetulingi ngotyo. Jesus wati: “Kalei ovakuatyali opo nonwe mupewe.” (Lucas 6:38) Aveho vaovola unene onombongo nomalumono, velietela omuihamo nononkhumbi. (1 Timóteo 6:9, 10) Tupu, ehambu liotyotyili litunda kokukala nohole navakuetu, nokuholwe.

Oityi uhatalela inkha upondola okutepulula ovipuka vimwe momuenyo wove? Upondola okutepulula ovipuka una ine wovola okulanda? Inkha utyilinga, mokala nomuvo omunyingi, nononkhono pala ovipuka viakolela vali momuenyo—okukuatesako ovanthu, nokuumbila Huku, wekuavela atyiho una.—Mateus 6:24; Atos 17:28.

[Olutalatu pefo 4]

“Kalei ovakuatyali opo nonwe mupewe”