Otyipuka tya 4

Holovona Omapanga Ove Nonondunge

OITYI OMBIMBILIYA ILONGESA? “Una wendaenda novanongo, nae makala omunongo”—Provérbios 13:20.

OTYITATEKA OTYIPI? Omapanga etu apondola okuyawisa ehambu lietu ine okulitepulula. Ovituwa viavo, nevi vapopia vihongiliya onkhalelo tutala omuenyo.—1 Coríntios 15:33.

Mongeleka, tala ehipululo Liombimbiliya konthele yovalume 12 vakalavele o Kanaa. Ovanyingi “vatualako okupopila ova Isilayeli ovipuka ovivi konthele yotyilongo vakalavele.” Mahi, no ngotyo, ovalume vevali puvo, vapopia nawa konthele yo Kanaa, avati “otyilongo otyiwa unene.” Mahi, onondaka onombi mbovalavi ekwi ambuliyandyana pokati kovanthu. Ehipululo liati, ovanthu aveho vakatula ondaka yavo, “iya ova Isilayeli aveho avahimbika okuñgoñga.”—Números 13:30–14:9.

Tupu hono, ovanthu ovanyingi “ovañgoñgi, vokuliyava onkhalelo yavo yomuenyo.” (Judas 16) Katyapepukile okutualako nehambu pokati komapanga vahahambukilwa natyike.

OITYI UPONDOLA OKULINGA? Soka nawa kuetyi uhole okuhipulula nomapanga ove. Okuti omapanga ove apeho velihapa novipuka vena, ine veliyava apeho mokonda yovipuka vehena? Iya omapanga ove ekutala ñgeni? Okuti ulinga etyi tyihindila ompanga ove okukulingila onkhi, ine otyetyi tyivelunda okuhambukilwa etyi vena?

Tala etyi tyaendele na David ankho makala ohamba, na Jonatan omona wo Hamba Saulu. David wakala omuvo umwe mehoko okutila Saulu. Ohamba Saulu ankho una owoma wokuti David memupingi kouhamba, iya ahande okumuipaa. Namphila Jonatan ankho oe omphinga youhamba, mahi, wakalele epanga enene lia David. Jonatan ankho waimbuka okuti Huku waholovona David opo akale ohamba, iya oe ankho una ehambu liokuvatela epanga liae.—1 Samuel 19:1, 2; 20:30-33; 23:14-18.

Ove wesukisa omapanga ngoo, alinga ononkhono mbokukala nehambu nokukuhandela ovipuka oviwa. (Provérbios 17:17) Tyotyili, opo ukale nomapanga ngoo, wesukisa okulekesa ovituwa ngovio.—Filipenses 2:3, 4.

[Olutalatu pefo 7]

Okuti omapanga ove ayawisa ehamu liove ine velitepulula?