Omamonekelo Omphangu Yopaspilitu
UPONDOLA okutala nawa-nawa keulu omuvo omunyingi, mahi, kumamono omunthu nawike wopaspilitu. Tehelela nawa-nawa, kumeivi nawike. Mahi, kala nonthumbi yokuti oko vekahi. Kuna ovanthu vokuna ounongo omunyingi nononkhono onene, velikalaila nokuna omanyina elikalaila. Vamwe vetulingila oviwa ovakuavo vahanda okutilinga ovivi. Aveho vesuka nonthue.
Huku yotyotyili nae Ospilitu. (João 4:24) Oe una enyina lielikalela limupunga po vikahuku ovinyingi viomatutu. Enyina liae o Jeova. (Salmo 83:18) Omuhoneki wo salmu wahoneka okuti: “Jeova omunene, nokuna okuhivilikua unene. Oe uhuvisa tyipona ono huku ononkhuavo ambuho. Mokonda ono huku ambuho mbovanthu, ono huku mbahasilivila. Mahi Jeova oe muene walinga eulu. Kolupala lwae kuna omunkhima, nounene, momphangu yae muna ononkhono nokuehiwa.”—Salmo 96:4-6.
Omamonekelo a Huku Yotyotyili
Ombimbiliya yati: “Nawike omunthu wamuene Huku.” (João 1:18) Onthue katupondola okunoñgonoka otyifuika tyae nounene wae, ngetyi omunthu omumphoki ahapondola okumona ovivala. Mahi, ngetyi omulongesi omuwa ahangununina omulongwa ovipuka viepuiya monkhalelo yapepuka, Huku uundapesa Ondaka yae Ombimbiliya, opo ahangunune ovipuka tuhapondola okumona, mokuundapesa vina tupondola okumona. Nomamonekelo Jeova aavelele ovanthu vae vekolelo kohale, oe utukuatesako okutala oñgeni keulu kukahi, nokunoñgonoka oupanga tuna na vana vakala ko.
Mongeleka, emonekelo limwe liapelwe omuuli Ezekiele, oe waelekele omunkhima wa Jeova notupia, nomuliaimo, nemanya lio safira, nomuvia wonkhongolo. Memonekelo ekuavo, o apostolu João wamona Jeova wapumphama kotyipundi tyae. Iya João apopi okuti Huku “welifua nemanya litiwa jaspe, nemanya enkhuhu liakolela” ayawisako okuti “konthele yotyipundi tyae kuna omuvia wonkhongolo welifua nemanya litiwa esmeralda.” Omamonekelo oo, etulekesa okuti omunkhima wa Jeova welikalela, nomuwa unene, nokuhuvisa, nokuhambukiswa.—Revelação 4:2, 3; Ezequiel 1:26-28.
Tupu omuuli Daniele wali nemonekelo lia Jeova, muna amuene “ovityita novityita viomakwi [ono andyu] vekahi lutai kolupala lwa [Jeova].” (Daniel 7:10) Otyo tyemuhuvisile unene! Okutala oandyu ike alo umwe memonekelo, tyihuvisa unene, pahe soka okutala ovityita novityita viomakwi onoandyu!
Mombimbiliya onoandyu mbapopiwamo ovikando vihika po 400, iya mbumwe ono serafim ononkhuavo ono kerubin. Mombimbiliya mo Gregu no mo Hebreu ondaka oandyu ihangununa okuti “omutumwa-ndaka.” Onoandyu mbupondola okutomphola poyambo iya kohale ankho mbupopia novanthu. Onoandyu havanthu vokohale ankho vakalele pano pohi. Jeova walinga onoandyu ombo kohale etyi nkhele ehenelinge ovanthu.—Jó 38:4-7.
Memonekelo lia Daniele, onoandyu ononyingi amuene ankho mbeliongiya pala otyilinga tyimwe tyakolela. Daniele wamuene umwe “ukahi ngomona womulume” wafuena potyipundi tya Jeova “apewa outumini, nounene, nouhamba, opo ovanthu aveho, novilongo, nomalaka vemuumbile.” (Daniel 7:13, 14) “Omona womulume” wakolela unene momphangu yopaspilitu, omututiliswa Jesus Kristu, wapeua outumini omunene kombanda yoohi aiho. Outumini wae maukapingako omautumini aeho ovanthu aukamanako omauvela, novivi, nokumoneswa ononkhumbi, noluhepo, nononkhia.—Daniel 2:44.
Okuvialekwa kwa Jesus kuaetela ehambu limwe enene onoandyu ononyingi mbekolelo, mbuhandela oviwa ovanthu. Mahi, haambuho onoandyu mbetyihambukilwa.
Onondyale mba Huku no Mbovanthu
Konthyimbi yovanthu, onoandyu imwe yakalele nepeleyo enene liokuhanda okufendwa, aityitukilapo Jeova aikala Satanasi, tyihangununa okuti “ondyale.” Satanasi onkhalamutwe yovivi, wahimbika okutyitukilapo Jeova, Huku yoluembia. Onoandyu ononkhuavo mbelipaka kumwe na Satanasi okutyitukilapo Jeova. Mombimbiliya mbuihanwa okuti ovindemoniu ine ovilulu. Nga Satanasi, ovindemoniu viakala onondyale ononene mbovanthu. Ovivi ovinyingi vimoneka pano pohi, okuliipaa, nomaluhepo, novita, vituka kehongiliyo liavio.
Namphila hono onongeleya ononyingi mbo Vakristau vomouye kavapopi konthele ya Satanasi movikapela viavo, Mombimbiliya omukanda wa Job upopia nawa oñgeni oandyu oyo ikahi, nomahando ayo. Yati: “Ankho onthiki yovana va Huku yokuliongiya na Jeova. Iya alo umwe Satanasi nae anyingila pokati kavo.” Metompho lialandulako, Satanasi wapopia okuti Job ankho uumbila vala Huku mokonda una etyi emuavela. Opo alekese okuti etyi apopia otyili, Satanasi aetela Job ononkhumbi ononyingi, okuipaa ovipako viae novana vae aveho ekwi. Konyima, aetela Job ovinthimba ovinene olutu aluho. Mahi, muotyo atyiho Satanasi ketyivilile okunyona ekolelo lia Job.—Jó 1:6-19; 2:7.
Kuna omahunga omanyingi omokonda yatyi Jeova ayekelako Satanasi omuvo omunyingi, mahi kamakakalako apeho. Apa katutu Eliapu malipoluako. Kualingwale vimwe pala okumupolako, iya otyo tyahonekwa momukanda wa Revelação, omu muapopiwa ovipuka viakolela viaendele keulu pala ouwa wetu. Tutangamo okuti: “Kuakatuka ovilwa ovinene keulu: Mingeli [Jesus Kristu omututiliswa] no noandyu mbae avalwisa enyoka [Satanasi], iya enyoka no noandyu mbalio onombi, navo otyo valwa. Anthi, oe katuaileko, avahakala vali nomphangu keulu. Ngotyo, enyoka enene liatahelwa pombuelo, onyoka yokonthuko, iihanwa okuti Eliapu Satanasi, likahi nokuyondya ovanthu aveho. Liatahelwa pombuelo, pohi, no noandyu mbalio mbatahelwa kumwe nalio pombuelo.”—Revelação 12:7-9.
Tala okuti Satanasi wapopiua okuti ukahi “nokuyondya ovanthu aveho.” Oe uyondya ovanthu nomatutu onongeleya opo ovanthu vayapuke ku Jeova no Mondaka yae. Omatutu amwe aundapesa okuti kese munthu tyina amankhi wenda momphangu yopaspilitu. Kuna omalusoke elikalaila konthele yotyo. Mongeleka, mo Afilika no mo Asia, ovanyingi vetavela okuti ovanthu vokuankhia vaya momphangu yopaspilitu okukelivasa novakuaukulu vavo. Omalongeso konthele yopulukatoliu no ifelunu tupu nao alekesa okuti omunthu tyina amankhi, utualako nomuenyo komphangu onkhuavo.
Okuti Omunthu Tyina Amankhi Ukatualako Nomuenyo Keulu?
Iya konthele yetavelo ovanyingi vena liokuti ovanthu aveho ovawa venda keulu? Tyotyili, ovanthu vamwe ovawa mavaende keulu, mahi ovanthu ovo kavehi okuveeleka novanyingi vokuankhia. Ombimbiliya ipopia okuti ovanthu 144.000, “mavalandwa pano pohi” avakaundapa keulu ngo “vanakwa nono hamba kombanda yoohi.” (Revelação 5:9, 10; 14:1, 3) Kumwe Nomona womulume, Jesus Kristu, ovo mavakatumina moutumini wokeulu, Mouhamba wa Huku. Outumini oo maukamanako Satanasi novilulu viae, nokulinga oohi omphangu yombembwa. Apa katutu ovanthu ovanyingi vokuankhia mavakatutiliswa nokukala apeho Momphangu Yombembwa pano pohi.—Lucas 23:43.
Okumanuhula, kuna ovanthu ovanyingi vakala momphangu yopaspilitu. Wavilapo pokati kavo o Jeova Huku, Watunga atyiho tyina omuenyo. Onoandyu ovityita novityita ekwi nomakwi vatualako okumuumbila. Onoandyu ononkhuavo, mbuhongolelwa na Satanasi, mbayapuka ku Jeova iya mbuundapa pala okukemba ovanthu. Tupu, kuna ovanthu vehehi “valandwa,” ine vaholovonwa pano pohi mavakakala novilinga viakolela keulu. Nolusoke olo, pahe tutale ovalie tupondola okutomphola navo momphangu yopaspilitu no ñgeni tupondola okutomphola navo.